Lis ermas - De pèd e de man

17 février 2022
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

DE PÈD E DE MAN
Cars ami, lou bon-jour en tóuti e siegues li bèn-vengu dins lis Ermas. Aquesto semano, anan pas tourna parla de la couvido estènt que d’ùni dison que la pandemìo es à mand de s’arresta. Nous agradarié qu’aquéli mounde que dison acò aguèsson resoun. E coume avèn pas d’idèio qu’uno coucho l’autro, faguerian la chausido de jouga emé li mot. L’idèio venguè ja la semano passado quand diguerian que falié pas èstre en chancello pèr teni pèd bourdoun pèr ço qu’es de l’aveni de la lengo d’o. Alor, i’anen pas sus la solo di pèd, passen de pèd joun e intren de pèd ferme dins lou sujèt, espérant agué la man d’or o la man fado, coume voulès. M’anas demanda « quent es lou sujèt ? » Ma fisto s’agis de pèd e de man e franc d’acò n’en sabe pas mai. Verai, la tempourado d’aquelo debuto d’annado se debanè dins lou siau e faudra espera un brigoun avant d’intra de plen pèd dins lou trin di manifestacioun en liame emé la culturo nostro. Pèr nautre au Felibrige, es lou moumen d’ourganisa lis acamp generau di mantenènço. En Lengadò-Roussihoun, sara à Mandiuel, lou 26 de mars. Pamens fau pas espera mai pèr se bouta à l’obro e faire en modo que tout se debanèsse d’un biais de requisto. Alor fasen obro à pèd leva e tout anara meiour, d’autant que i’a sèmpre de mounde pèr douna un cop de man. Verai que de fes que i’a, sèmblo que poudèn pas teni pèd tant i’a de grame à tria. Pamens se metèn lou camin souto nòsti pèd sènso faire d’alóngui, arribaren dins un vira de man à l’ouro, à coundicioun de pas ‘na à pèd cauquet e metre pèd sus banc coume se dis dins la marino. Se fasènt bono obro, ausiren li picamen de man dóu mounde, pamens pèr acò faire, fau agué li quatre pèd blanc pèr demoura libre de si chausido. D’aquéu biais sian lèu en pèd pèr fin de prene li bòni decisioun. Pèr pas recebre un tai de man dóu mounde, vo un cop à man revèsso, anaren plan-planet e es foro questioun de parti à touto zuerto, valent-à-dire, di quatre pèd pèr engimbra l’afaire. S’acountentaren de parti dóu bon pèd, travaia de pèd e d’ounglo e faren pas d’alòngui pèr bouta man e subre-que-tout faudra pas metre man i marrìdi resoun. E basto que lou bon Dieu ié meteguèsse sa santo man. Acò bastara pèr que nous prenguessian pas un pèd au cuou. Faudra pas rèn óublida, es à dire, pensa en tout, de pèd en cimo. Pamens pèr vuei, emé lou cèu achavani qu’avèn, nous anan recata au pèd dóu fiò e garda li man caudo. Ansin, faren ounour au Mèstre de Maiano que li Prouvençau lou porton en paume de man. Esperaren pas l’endeman – sai-que de que fai aquéu aqui ? – pèr coumença à metre la man e s’anan boulega li pèd e menaren l’afaire de man de mèstre. Dins la colo qu’obro emé iéu, tóuti an lou cor sus la man. E sian segur que vendran noumbrous nous vèire pèr noste acamp, tóuti aquéli que demoron sus la man d’eila. Lou travail sara d’autant eisa de faire que degun noun boutara pas si pèd sus li nostre e caminaren la man dins la man. Ah ! se fau dire que li causo soun pas eisado coume au tèms que la rèino Pèd-d’auco fielavo e fau faire en modo que l’afaire faguèsse pas lou pèd-de-poulo, nimai lou pèd-de-porc. Fau agué bono man e pas se toumba dins li quicho-pèd. Coume lou diguè lou pouèto d’Avignoun Enri Morel : « E qu’acò rounflo coume la pedalo de l’orgue de la catedralo ». Mai de que fai la pedalo au mitan de noste afaire ? Enfin, faren li dos man pèr nafra degun e lucha à bono man. Coume que siegue, nautre sian tóuti di pèd-terrous, es à dire de mounde atravali. Asquerian pas emé de sedo dins li man e sian pas noun plus d’un grand pèd dins lou mounde. Pamens, nosto lengo e nosto culturo, lis avèn dins lou cor.
Basto, anan pas faire pèd e man à ço deja di, e coume se dis encò nostre : tau pèd, tau man. Tre la causo dicho, es facho. Soulide.
Zóu ! vau faire countourolle-P emé la man pèr estampa lou tèste. Vaqui aquelo crounico, dicho sènso faire di pèd e di man, es acabado. Vous doune rendès-vous la semano venènto. D’eici aqui, anan leva lou pèd, sènso tirassa li pèd. Vous brassège amistadousamen. Brave mounde, adissias !

felip