Lis Ermas - ENSIGNAMEN DE LA LENGO

14 octobre 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

Cars ami, lou bon-jour en tóuti. Aquesto semano voudriéu tourna sus uno questioun que nous fara chifra encaro mai-que-mai. Es la de l’ensignamen de la lengo e dóu soustèn d’aquéli que decidon. De n’en parla fai pas ‘vança l’afaire, pamens acò permet de coumprene lis acioun que soun d’entre-prene e li que soun entre-presso. Basto, pièi de verifica se i’a de liame entre li dous, valènt-à-dire se lou remèdi es asata au mau. Alor me ramente lou bon tèms, avans la reformo dóu bacheleirat que lis estudiant chausissien l’oupcioun « lengo d’o » pèr endrudi lou saquet di poun pèr fin d’óuteni soun diplomo. D’aquelo tempourado, acò’ro intéressant. De moun coustat, fasiéu d’ensignamen en de chato que n’avien ges dins soun licèu e que voulien passa l’oupcioun pèr recoulta quàuqui poun precious. Aquéu biais de faire couneiguè de sucès e de bèlli reüssido e countentavo tout lou mounde…
Malurousamen, acò decessè d’èstre interressant emé la reformo dóu bacheleirat. Li lengo regionalo venguèron coume uno autro lengo, sus lou meme pèd d’egalita que de matèri essencialo. Sus lou cop, se poudrian dire qu’èro uno causo di bello de vèire s’enaura la counsideracioun qu’èro pourtado i lengo regiounalo. Dins la realita avèn vist lou noumbre d’estudiant que chausissien la lengo en oupcioun se foundre e veni lèu coume d’aigo-nèu. Falié pas gaire de tèms pèr vèire lou mounde vira l’esquino à sa lengo maire. D’ùni jouine diguèron à soun proufessour : « Nous demandas de segui tres ouro de cous de lengo cado semano. Perdequé faire ? Pèr rèn o quàsi. Sariés-ti d’acòrdi, vous, pèr travaia sènso èstre paga ? ». Ansin, brigo à brigo, aquelo reformo venguè à l’óurigino d’uno meno de desafecioun, tant sarié meme de desamour di jouine pèr sa lengo. Li chifro nous esbalausisson. Sian espanta de vèire qu’en cinq an, li licèu enregistron -40 % d’estudiant que fan la chausido di lengo regionalo. Pèr aro, es panca grèu pèr li coulège. Pamens fau pas faire d’alòngui e ana vite pèr tua lou mau. Sènso acò, lis estudiant saran en fàci d’uno roumpeduro dins l’aprendissage di lengo regionalo. Ja, en Prouvènço es plus poussible de segui un parcours licènci - mestrìo - dóutourat. I’a tout-bèu-just un diplomo universitàri à-Ais-de-Prouvènço. Es mens grèu au pounènt de Rose, mounte l’Óufice publi de la lengo d’o, l’OPLO, es à mand d’engaja dous cènt milo éuro, en dos annado, pèr assaja de teni targo au dessecamen dis efetiéu. Pamens aviéu lèu fa de me demanda se l’argènt avié lou poudé de gari la malautié. Acò me tafurè bèn talamen que finiguère pèr souna Gaël Tabarly à l’OPLO que me baiè d’entre-signe emé gentum. Aquel ome me diguè que li que decidon soun dins lou refus, es à dire en franchimandeja, dans le déni. Dison que li jouine soun pas interessa pèr li lengo. Lou sabèn nautre que quand un bestige se dis dins la capitalo, acò vèn uno verita universalo. La provo, nòstis àvi li galés… Basto, Es verai tambèn que sian encaro dins la cacoufounìo dóu Counsèu coustituciounau. Pamens semblarié que Matignoun aguèsse engaja uno refleissioun pèr valourisa lou bacheleirat. Couioun que soun, ié falié pas touca. Ja un raport interne douno pèr li licèu di regioun Nouvello-Aquitàni e Óucitanìo : -30 dóu cènt despièi Jun 2018 et -40 dóu cènt despièi jun 2016 d’escoulan óucitanoufone que s’interesson à sa lengo, mentre que jusqu’en tresenco, la situacioun boulègo quàsi pas. Pèr lou moumen en tout cas. Gaël Tabarly perseguiguè en baiant d’entre-signe, meme se recounèis que l’argènt aura pas lou poudé d’enversa la tendènci. Pamens en dounant de mejan, emé de libre, d’enfourmacioun, en finançant d’acioun dins li licèu, tout acò pòu tourna douna à-n-aquéli qu’aprenon l’amour de sa lengo. Councretamen, i’a d’acioun qu’eisiston ja que van èstre reóurienta e que councernaran pas que li licèu. S’agis de chèque-libre, de journado de sensibilisacioun e d’afichage tambèn. I’a pièi de causo nouvello pour douna lou goust de l’aprendissage de la lengo, coume de councours de creacioun e l’aurre. Es miéus que de beissa li bras. Acò se fara à parti de la rintrado de 2022 dins 635 licèu di dos regioun que l’avèn ja di soun la Nouvello-Aquitàni e l’Óucitanìo. Afaire de segui. Fau leva lengo tambèn sus la Felco que soun presidènt es Óulivié Pasquetti de Niço. Emé la cosecretairis Marìo-Jano Verny soun esta recebu pendènt un ouro e miejo de tèms pèr moussu Dàvi Bauduin qu’es counseié encarga dis afaire pedagougi e pèr moussu Jan Hubac, souto-direitour de l’inouvacioun, de la fourmacioun e de ressourço. La reformo dóu bacheleirat tourné dins la counversacioun emé l’aplicacioun de la lèi Molac. Vaqui un pres-fa di bèu que pòu faire toumba li fru de l’aubre. Lou souvetan dóu bon dóu cor. Eh ! es que la paio vau lou caucage coume disien nòstis àvi. Soulide.
N’i’aurié encaro de causo de dire sus aquel item e n’en diran encaro, pamens, pèr aro es acaba. Acò di, vous souvète uno semano di bello e d’eici aqui, tenès-vous fièr e gaiard. Brave mounde, adissias !

Felip