Lis Ermas - La Santo Estello

14 octobre 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

LA SANTO-ESTELLO DE MENDE 2021


Cars ami, lou bon-jour en tóuti. Vuei, vous vole parla de la Santo-Estello dóu Felibrige de 2021. Pamens premié de tout belèu fau-ti baia quàuquis entre-signe à l’entour d’aquel acamp annau. D’efèt, cade an pèr Pandecousto, tóuti li felibre se recampon dins un rode pèr viéure soun Coungrès santestelen. La toco premiero es de faire soun acamp generau. Acò se tèn lou dilun de matin. I’a pièi de moumen indispensable au bon debana de la fèsto. Poudèn parla tre lou divèndre de se presenta à l’acuei di felibre mounte la Secretairis de la direicioun enregistre li felibre d’à mesuro se soun arribado. Acò’s la premiero causo de faire. Lou dissate de matin, i’a l’acamp dóu burèu generau dóu Felibrige que recampo lou Capoulié, lou baile e lou clavaire dóu burèu naciounau e li Sendi di siès mantenènço. Gaire de tèms après, es lou moumen de recampa li majouralo e majourau dóu Counsistòri, souto la presidènci dóu Capoulié En Jaque Moutet. Aqui se pren li gràndi decisioun pèr l’endevenidou dóu Felibrige. Toujour lou dissate à la debuto dóu tantost se debano l’Assemblado di Jouine, uno colo atravalido souto la presidènci de Guihaume Chevalier. Lou dimenche de matin es la grand messo celebrado sié pèr mounsegnour Desplanches, sié Jòrdi Passerat, tóuti dous felibre majourau, sèmpre emé lou councours dóu prèire de la glèiso. Tre l’óufice acaba, vèn l’ouro dóu passo-carriero emé li group fóuclouri de tóuti li mantenènço qu’es dubert pèr lou Capoulié e la gènto Rèino dóu Felibrige Adelino Bascaules-Bedin que rèsto dins li Pirenèu. Lou tantost li felibre podon vèire la court d’amour coume acò se fai despièi mant un siècle. Cado mantenènço presènto un group Es toujour un espetacle di bèu e gracious mai-que-mai. Pèr se pausa un pau, i’a pièi la leituro di laus. Acò s’amerito de quàuquis esplico. Quand un majourau fai sa despartido, de sa cigalo, se dis qu’es véuso. Lou Counsistòri dóu Felibrige à la Santo-Estello seguènto elegis un nouvèu majourau que la cigalo véuso se vendra pausa sus soun pitre e que ié revèn de prounóuncia lou laus de soun predecessour. Un biais de trasmetre li cigalo que counservon lou noum que ié dounè lou premié majourau. Ansin, pèr eisèmple, lou majourau Pau Astruc que demoro en Ausero óutenguè la cigalo de l’Ort o de Lansargue véuso dóu majourau Pau Valière que restavo en Limousin. Adounc, aquest an, à Mende, lou majourau Pau Astruc legiguè lou laus dóu majourau Pau Valière defunta. Lou dilun de matin es lou moumen de l’acamp generau. Aqui li felibre podon prene couneissènço di decisioun dóu Counsistòri, i’a pièi à-de-rèng li comte-rendu mourau dóu Capoulié, lou bilans financié dóu Felibrige e li Sendi alargon lou comte-rendu d’ativeta de sa mantenènço. I’a d’àutri questioun tambèn que soun previsto à l’ordre dóu jour. Après poudèn prene part à la Taulejado Soulenno de la Coupo que coumenço emé la presentacioun di nouvèu majourau, mèstre d’obro, mèstre en gai sabé e tóuti aquéli que recebon uno letro de felicitacioun pèr soun engajamen. Un cop lou repas quàsi acaba, vèn lou moumen di brinde. Aqui, li majourau e li sendi podon leva la Coupo e pourta un toast, lou brinde, pèr uno causo de sa chausido. Arribo pièi lou moumen que se fau dessepara e es toujour un crèbo-cor de parti. Pamens pèr li que volon o que podon, lou dimars es counsacra à’no escourregudo. Pèr aquéli qu’an de lesé, i’a d’espousicioun, de counferènci de vesito coumentado e que sabe encaro. Cade sèr, i’a un espetacle, emé de teatre vo de councert que soun sèmpre de requisto.
Aquest an, coume ja di, es la vilo de Mende, capitalo de Lausero, que recebié li felibre. La Santo-Estello fuguè remandado dous cop pèr l’encauso de la couvido e pèr un cop se debanè au mes de setèmbre. Laurèns Suau, lou maire de Mende e la premiero ajouncho Regino Bourgade faguèron soun proun pèr ourganisa un Coungrès de trìo. Coumençarian pèr desvela uno lauso pèr fin d’ounoura la memòri d’Óulivié del Fabre qu’enreguè la revisto Lou Païs i’a sieissanto-nòuv an d’acò. Aquest an visquerian un moumen di grand em’un poulit councert de Felip Vialard. De cansoun bèn chausido en lengo, segur que meteguèron en lume l’èime d’aquéli que se dison de la patrìo d’O. Felip realisè un tour de forço estènt que noun soulamen faguè canta tóuti li felibre, mai subre-que-tout li faguè dansa e s’escacalasa dóu rire. Imaginas la sceno ! Fuguerian pertouca pèr soun gentum abituau e fuguè un grand moumen de fe à l’entour de la lengo nostro. Pendènt mai d’uno ouro e miejo de tèms, i’avié plus ges de diferènci entre tóuti e tóuti se n’en coungoustèron. Soulide. Vaqui un pichot tros de musico…
N’i’aurié encaro de causo de dire, pamens, pèr aro es acaba. L’an venènt lou Coungrès santestelen dóu Felibrige se debanara en Arle pèr Pandecousto e sabès tóuti aquéli que volon veni, felibre vo noun felibre lou podon faire. Lou fau dire. Franc d’acò, vous souvète uno semano di bello e d’eici aqui, tenès-vous fièr e gaiard. Brave mounde, adissias !
Felip