LIS ERMAS - LI REINO D'ARLE

08 février 2022
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

LI RÈINO D’ARLE
Cars ami, lou bon-jour en tóuti e siegues li bèn-vengu dins lis Ermas. Lou darrié cop resumiguerian l’istòri dóu dessinaire di rèino d’Arle que ié disien Leo Lellée. Belèu que farié mestié que vuei nous boutessian à parla d’aquéli rèino de la vilo dóu Lioun. Adounc tout coumencè coume dins un conte : Un jour que i’avié, Arle se dounè uno rèino ! Aquest jour d’aqui, uno chato, que soun vèsti d’aparat èro lou coustume d’Arle, venguè la rèino d’un reiaume virtuau. L’eleicioun d’aquelo rèino fuguè istituïdo un jour de 1930, que se counmemourè lou centenàri de la neissènço de Frederi Mistral. Es ansin que lou prestige e la renoumado de la vilo prouvençalo fuguè fisa à ‘no damisello sourtido de l’anounimat. Despièi, 24 rèino se sucediguèron à-de-rèng sèmpre acoumpagnado de si damisello d’ounour, que soun tóuti la sanflourado de la jouinesso e de la bèuta. Soun li garanto de l’identita prouvençalo que desdegnon la modo parisenco pèr fin d’ounoura nòsti bèlli tradicioun. Cado rèino marco soun règne d’un biais particulié e tout acò se fai dins lou desinterressamen lou mai coumplèt. Jusqu’aqui, tóuti li rèino pousquèsson, gramaci sa coumpetènci e sa bèuta assegura un rôle publi, recebre lis oste célèbre que faguèron la chausido de veni en Arle. À soun tour, cado fes que lou falié, li rèino manquèron pas de parti luen dóu siéu pèr representa sa vilo de pertout dins lou mounde entié. Reüssiguèron tòuti tambèn d’enaura de soun rebat esbléugissènt li ceremounié arlatenco óuficialo. Soun li remiràblis embassadriço de noste terradou en Franço e dins li païs fourestié. Erian en 1930 e i’avié un lustre, es à dire cinq annado, que lou Coumitat permanènt di Fèsto d’Arle e soun premié presidènt Micoulau Crouanson, ourganisavon, di Jo Flourau, de fèsto pèr Rose, de passo-carriero coustuma e que sabe encaro, e mancavo pas en tout acò qu’un muso. Es de marca que li felibre avié sa rèino desempièi 1887 e en 1930, Arle s’endraiè dins li piado dóu mouvemen mistralen en counvidant li chato d’Arle e de Sant-Martin-de-Crau de se presenta couifado emé li dous bandèu de péu que se dis lou revesset. En mai d’acò, falié que carguèsson lou coustumo mouderne qu’avié vogo dins lou païs arlaten. Lou councours fuguè anouncia dins lou journau arlaten L’Homme de Bronze, li 1é e 22 de mars 1930. Li règlo d’aquéu councours changèron un brigoun à flour e à mesuro de l’istòri. Li chato èron chausido pèr uno jurado que sa decisioun èro inapelablo. Es sus lou bescaume de la Coumuno pièi que lou Maire d’Arle anouncio despièi la debuto : « Pople d’Arle, Veici ta rèino ! » Fau vèire l’estrambord de tout lou pople prouvençau ! Es veraiamen quicon de vèire. La grandour roumano e la bèuta grèco soun representado pèr la rèino e si damisello d’ounour. Es un simbole unique. La rèino e si damisello soun de chato devouado, gènto, emé d’envanc e amablo à la coumpagno. An de counèisse la lengo e la culturo nostro e sa toco es de servi la tradicioun de soun païs. Aro, la counsecracioun óuficialo d’aquelo eleicioun se debano dins lou teatre anti au pèd di dos Bessouno qu’es lou noum di dos coulouno que segnourejon lo mounumen, au mes de juliet, jour de la Fèsto dóu coustume, en seguido de la Fèsto Vierginenco creado en 1903 pèr Frederi Mistral. Li damisello elegido an carga soun coustume gansa lou mai bèu pèr aquelo ceremouié e la passacioun dóu poudé se fa entre l’ancian e lou nouvèu règne. E lou fau dire, aquelo ceremounié óuficialo marco la vido vidanto arlatenco d’uno pèiro blanco. Vist de l’esteriour acò pòu sembla trepassa, d’un autre tèms. Pamens li Prouvençau sabon tóuti que li rèino soun caro-virado de-vers l’aveni, gardant de valour mouralo au cor e ‘no pensado d’auto tengudo.
Acabarèn vuei emé la « dicho i chatouno » que Mistral alarguè i fèsto vierginenco de 1904 : « Gràci au diadèmo que vous cencho lou front e gràci au coustume que pourtas fieramen, patriouticamen, coustume qu’au-jour-d’uei es lou lou plus elegant de tóuti, sias la glòri d’un pople, sias lou signe vivènt de la Prouvènço lumenouso. E quand passas en quauco part, tout acò dis “Que soun poulido !ʹʹ ». Rendèn aro un óumage sincère à la memòri d’Angèlo Vernet que fuguè la premiero rèino d’Arle, que soun règne s’espandissié de 1930 à 1947.
Bono-di un coumpourtamen eisemplàri, tout acò toumbo pas dins la banalita, lou coumun. Es bèu de vèire un pople fièr de sa vilo, urous de viéure si tradicioun. Soulide.
Vaqui, pèr aro es acaba. Vous doune rendès-vous la semano venènto. D’eici aqui, avanças d’un pas lèri e tenès vous gaiard. Vous brassège amistadousamen. Brave mounde, adissias !
felip