LIS ERMAS DU 13 JANVIER 2020 PAR FELIP REIG - LA COUVIDO 19

13 janvier 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 13 Janvier 2021 : La Couvido 19

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 13 Janvier 2021 par Felip Reig.

_________________________________________________________________________

Cars ami, bèn lou bon-jour en tóuti. La semano passado erian à nous souveta la bono annado emé l’espèr
secrèt d’uno novo agradivo pèr coumença 2021. Ai ! las, lou gouvèr faguè pas d’alòngui pèr alarga un
marrit message un cop de mai. I’a toujours mai de mounde dins lou jambin e vesèn panca la sourtido dóu
pertus. Pèr lou counfinamen au mes de mars, se sarravian di bèu jour dóu printèms e riboun-ribagno nous
acountentavian di premié rai dóu soulèu que pounchejè. En mai d’acò, pensavian que belèu n’i’aurié pas
pèr long-tèms. Adounc avèn cresegu qu’un cop passa l’aurige nous aurian pouscu metre au se. Pamens
erian luen de se douta de la seguido que l’afaire èro pèr prendre. Adounc, l’annado s’acabè emé l’espèr
d’un chanjamen en 2021. Erian, tóuti tant que sian, ninoi de crèire qu’acò sarié un afaire de calendié.
Noun soulamen, sian pas lèst pèr sourti dóu fangau, mai sèmblo qu’avèn entamena uno cabussado que
n’en vesèn pas la fin. Lou vacin fuguè tout-bèu-just bon pèr souleva uno erso de mesfisanço. Es de vèire
la panico que se fai dins lou fenestroun. Es lamentable de vèire ço que venguè lou bèu mestié de
journalisto. Lou senòdi, lou sagan que mounto cade jour un pau mai fai mounta la maliço dins lis esperit
e lou mounde es en bousco de tout ço que poudra enmerda lou gouvèr. Pamens es simple de
coumprendre que n’avèn noste gounfle d’èstre permena d’un coustat e de l’autre pèr de mounde que fan
pas que de moustra soun incoumpetènci. O sàbi, coume se dis en Lengadò, es eisa de critica e avèn
espera avans que de coumença à lou faire. Mai aro, acò basto. N’i’a proun. E lou poudèn vèire tout autour
de nautre que lou mounde se degaio en plen. Avès vist lis american ? Siéu sèmpre à me demanda coume
faguèron pèr chausi demié tres cènt millioun d’estajan un nèsci, un cabourg un amòrri parié que lou
Trump ? Ço que se debano de delà de la grand mar es indigne d’un païs coume lis Estat-Uni. Lis american
fan vergoungno à soun drapèu. Es de crèire que la foulié venguè uno nouvello valour. Subre-tout qu’acò
baio un marrit eisèmple i generacioun que mounton. Que i’ague de mau-countènt, d’acòrdi, pamens de
coumpourtamen pariè es pas de crèire. Enfin, veiren la seguido dins quàuqui jour quand lou Trump, déura
leissa la plaço.
Pamens, pèr tourna encó nostre, pènse souvènt à-n-aquéli que soun en soufranço. Tóuti aquéli que
sougnon lou mounde e que fan un maratoun. Coume fan pèr teni targo au malastre ? Aquéli que voudrien
travaia pèr se gagna la vido, dins li restaurant, li cafè, sènso óublida lou mounde de la culturo, lis artisto,
tout aquéu mounde podon pas viéure de soun travai. Proche de nautre tambèn, emé li manadié qu’es de
cregne que n’i’aguèsse d’ùni dintre éli que se relevaran pas, es uno culturo qu’es en dangié. N’en fau
prene counsciènci pèr de bon. Sarié necite que la coumèdi dis un s’aplantèsse pèr metre fin à la tragèdi
viscudo pèr d’autre. Qùnto tempourado entristesido ! En mai d’acò, lou tèms es aragnous que-noun-sai.
Emé lou cuerbe-fiò que vèn toujours mai d’ouro, fasèn pas d’avans dins lou bon sèns. Ço qu’apound
encaro de proublèmo au proublèmo, es que sian arriva cap à la fin d’un sistèmo founda sus l’argènt que
tóuti aquéli que decidon lou volon pas abandouna. Lou vacin, vo pulèu li vacin fan pas qu’empura lou
gavèu. I’a de miliard en jo e crese que li labouratòri saupeguèron prene la fourtuno au péu. Aqui, es lou
tu-autem o s’amès miéus, sian au pica de la daio. La blouco es bloucado. La toco de tout acò èro li
dardeno. E nautre sian pèr engama tout ço que dison. Ièu, vole crèire qu’acò’s un escandale. Veiren bèn
ço que nous dira l’aveni. Avès vist pièi, desempièi la debuto de l’ivèr se parlo plus de gripo, de
gastrouenterito, de rèn. Tóuti que moron, pecaire ! parton de la couvido. I’a pas qu’acò que coumto.
Pamens veguère lou calendié de 2021. I’a deguno fèsto religiouso escricho. Plus de pascado, plus de
Pendecousto, rèn. Coume garda nosto fisanço en de mounde que soun de traito pèr noste païs ? Espèron
de nautre qu’óublidaren nosto istòri, nòstis óurigino sènso saupre se sian lèst pèr aceita un tal escorno ?
E bèn noun, voulèn pas d’acò. E deman, en dequé faudra renouncia ? Aquelo centralisacioun dóu poudé,
iéu, n’ai moun gounfle. Pèr quant à vàutri tóuti, sabe pas ço que n’en pensès, mai tout acò me fai chifra.
Siéu inquiet, carcagna pèr tóuti aquéli chanjamen que se fan en foro de noste avejaire. Soun li
Franchimand que decidon pèr nautre ço qua fau manja, qùnti soun nósti tradicioun, de qunt biais fau mena
sa vido e l’aurre. Avèn pas grand causo de vèire em’aquéu mounde. Nautre sian pas sènso liame emé
lou passat. Avèn un passat, uno istòri e es foro questioun de ié renouncia. Acó, fau que li Franchiand lou
saupeguèsson. Soulide.
Aro es acaba, verai la crounico es pas risènto aquesto semano. Mai poudèn rire au mitan d’aquéu
desordre ? Pamens, vous doune rendès-vous la semano venènto, meme endré, memo ouro. Brave
mounde, vous fau la brassado. Adessias en tóuti !