Lis Ermas du 15 janvier 2020 par Felip Reig - Fourtuneto Di Baus 2

16 janvier 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 15 janvier 2020 : FOURTUNETO DI BAUS 2.

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 15 janvier 2020 par Felip Reig.


Cars ami, brave mounde, la bono saludo en tóuti !

La semano passado avèn fa couneissènço emé Fourtuneto. Verai èro pas uno dono óurdinàri e forço se n’en mancavo. Pamens, dounè de coulour à la vido dóu Felibrige e i’aduguè un brigoun de sau. Après la Santo-Estello mount-pelierenco de 1890 e l’episòdi arlaten, se n’en parlè enca de Fourtuneto. Hóu ! se diguè qu’èro uno femo poupudo, se vesès, crouchounado mounte fau coume un bon pas, emé uno taio fino. Es pas estouna se garcè fiò dins lou cor dis ome miéus qu’uno brouqueto. En 1891 se n’entendié pas parla de Fourtuneto. Verai, i’avié proun de grame à tria au Félibrige. Pamens, au rebous de ço qu’èro de prevèire, en 1892, mentre que lou Coungrès santestelen se debanè i Baus-de-Prouvènço, La bello dono apareiguè tourna-mai. Uno soumtuouso calècho arribè. N’en sourtiguè Fourtuneto qu’avié carga uno raubo roujo, meravihouso entre-selhado de miejo-luno negro e daurado. Fourtuneto voulié prene part à la taulejado de la coupo. D’ùni la dissuadèron coume pousquèron. Pamens èstre galanto noun la rendié nèscio. Coumprenguè e garcè soun camp. Tre acabado la taulejado, venguè lou moumen de béure à la coupo. Tout-d’uno aduguèron uno biheto à Marieton ounte se poudié legi : « D’abord que Fourtuneto es pas digno de s’entaula emé li pouèto, pòu-ti pas servi li pouèto ? Voudrié passa lou vin de la Coupo santo. » « Bravo Fourtuneto s’escridè Mistral. Segur, que vengue ! parai Midamo ? Coume la Samaritano. » E, moudestamen, digno coume li de sa raço, Fourtuneto s’avancè, la jerlo pleno dóu vin de Castèu-Nòu e se boutè à servi li taulejaire à-de-rèng. Après li brinde, l’estrambord sourti de la jerlo de vin fasié soun efèt e lou mounde èron en aio ? Tout-d’uno, lou paire Savié de Fourviero, ajouca sus un escabeloun se boutè à crida : « Doune la paraulo à Fourtuneto ! » Sènso se faire mai prega, la bello arlatenco s’aussè sus uno taulo e entamenè uno cansoun seguido d’un parèu d’autro, tóuti dóu Charloun. E, ma fisto tóuti baièron d’ajudo à Fourtuneto pèr canta li refrin, li prèire, li femo, li gènt di mas e uno farandoulo gigantesco se dansè i Baus. Tóuti s’entournèron pièi e la caravano s’aplantè encò dóu Mèstre, dins lou jardin de soun oustau à Maiano. Davans un cinquantenau de persouno, Fourtuneto prenguè la paraulo e de sa voues lindo dins un prouvençau clar e di mai escrèt faguè un resumit galant de la journado e gramaciavo Dono Mistral pèr soun acuei. Segur que lou subre-endeman, li journau d’Arle e mai subre-tout li d’Avignoun vertuousamen enmalicia diguèron tout lou mau que pensavon dóu Capoulié de Savié de Fourviero e encaro mai de Marieton en plen desvergougna d’avè ramplaça li cantico pèr de cansoun embriagouno e bachico. Après aquelo escorno, Mistral declarè : « Poudèn souna acò l’epilogue dóu Felibrige, vo se voulès, la coumençanço de la fin d’aquelo vasto assouciacioun de fumisto sènso lou saupre. » Mistral demandè à Fourtuneto de se leva d’Avignoun. Pamens, n’en falié mai qu’acò pèr que la pas tournèsse dins lou Felibrige. Pèr li journau, lou grand coupable èro Pau Marieton. Se ié parlavo de l’escandale di Baus que Marieton avié óubliga Dono Mistral à reçaupre Fourtuneto dins lou siéu oustau. Qunto vergougno ! Aquelo empego ! Marieton èro furious que demouravo à Paris. Mistral i’escriguè que lou pensavo proun fort pèr teni targo à-n-aquélis escarnimen e insulto. Pau Arène, éu, s’enamourè un tèms de Fourtuneto e i’escriguè un parèu de quatrin : « Péu negre, iue negre, l’amo negro / E blanco, vièsti chimara / Tristo en dedins, deforo allegro. / Es Fourtuneto e soun retra. // Siéu Petrarco, siés ma Lauro, / O bruneto is iue trop fer / E baise, fòu coume l’auro, / Toun péu dru, coulour d’infèr. » Adounc, coume Mistral i’avié demanda, Fourtuneto quitè Avignoun e anè à Marsiho mounte Aguste Marin ié faguè d’acuiènço calourènto, bèn talamen que Fourtuneto cantavo si cansoun à L’Aucasar de 1892 à 1893. Pièi, anè canta à Touloun avans que de s’embarca pèr lou Brasil en 1894. Avié 35 an e s’enanavo faire la cantarello à Rio de Janeiro. Tenguè pièi un coumerce de capèu parisen. Avié forço prouteitour e menavo la grando vido. Faguè quàuqui vouiage en Éuropo en 1904. Aquest an d’aqui, li fèsto se debanèron en Arle. Emai Fourtuneto ié fuguèsse pas, soun esperit planè bas sus li tèsto. En 1931 tournè à Maussano. En 1943, Marcèu Prouvènço ié faguè uno vesito e diguè que Fourtuneto avié pas rèn óublida de sa jouinesso. Lou 3 de janvier 1944 Fourtuneto mouriguè à Seloun-de-Crau. Es enterrado au cementèri de Maussano. Se dis que quand tournè à Maussano venguè vèire Charloun pèr s’óufri à-n-éu que ié diguè : « Te gramacìe Fourtuneto, mai vole èstre pur quand rescountrarai ma femo. » Dos persouno, Charloun e Fourtuneto, eicepciounalo que marquèron l’istòri dóu Felibrige, caduno de soun biais. Aquest cop l’istòri de Fourtuneto es acabo en plen…
Se voulès, se capiteren mai la semano venènto. D’eici aqui, tenès-vous fièr e basto que lou tèms fuguèsse doucinèu.

Bravo mounde, adessias !


Felip Reig (Mèstre d’obro dóu Felibrige)