LIS ERMAS DU 20 JANVIER 2020 PAR FELIP REIG - LI BÈSTI DEVOURANTO

20 janvier 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 20 Janvier 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 20 Janvier 2021 par Felip Reig.

_______________________________________________________________________

Cars ami, bèn lou bon-jour en tóuti. Dins l’istòri dis ome, un cop i’avié uno bèsti devouranto. Aquelo
bestiolo tuavon de mounde sènso vergougno, crudelamen. Pèr ié teni targue, mandèron de mounde dóu
gros grum, vole dire dóu pessu arma jusqu’i dènt. Pamens l’èsse uman aguè lèu fa de coumprendre que
sarié pas poussible de l’espóuti, de desenja aquelo meno de bestiolo, en un mot coume en cènt, l’ome
fuguè despoutenta e noun la pousquèsse estermina. Fau dire que se l’afaire èro aragnous, es que fuguè
pas poussible de la vèire aquelo la bestiolo. Belèu, avès ‘no narrado à respèt de ço que n’en parle ? Acò
vous dis pas rèn ? Noun ? Pas meme uno fumado ? O, quand meme ! La babaroto de la couvido ? Que
noun ! Vouliéu parla de la bèsti dóu Givaudan. Ah ! segur vous diguère pas qu’en fin finalo reüssiguèron
à la tua l’orro bèsti, mentre que pèr la bestiouleto que nous agarris despièi quàsi un annado, fan chi. Acò’s
la provo soulido que li bèsti mai meichantasso soun pas li que soun li mai grosso. Pamens, pèr tourna à
noste item, la bèsti dóu Givaudan n’en faguè raja d’encro e de salivo. Aquel afaire se debanè dóu mes de
jun 1764 juqu’au meme mes de 1767. En aquelo tempourado, i’avié forço loup dins lou relarg de la Lousero
atualo. Se dis qu’en Franço, n’i’avié peraqui vint milo. Ja, Poudrian parla dóu laid regard de la Biblo à
respèt dóu loup que passo pèr un faus proufèto, un sedusèire, un mescresènt e un pagan que devouravo
lis innoucènti fedo crestiano. Lou rôle dóu pastre es d’apara l’escabot, jusqu’en aquéli que se soun
esmarado. Part acò ! dins Esaïe, lou païs ideau es-ti pas ‘quéu, mounte « lou loup sejournara ‘mé
l’agnèu » ? Dins la mitoulougìo, Letó fuguè trasfourmado en loubo pèr Zeus pèr fin d’escapa à la coulèro
d’Hera, l’espouso jalouso. À l’age mejan, la licantroupìo trasfourmavo lis uman en loup-garou. Se dis
tambèn crese un louberou dis d’ùnis endré. De delà de l’image di Tres Pichot Poucièu vo d’aquelo dóu
Pichot Capeiroun rouge, l’image dóu loup devouraire de fedo es tras-que presènto dins la counsciènci
atualo, ligado à ‘no atualita recourrènto que sourgènto dins la realita de la vido pastouralo. Encaro à l’ouro
d’aro, charrave ‘mé Pèire, un pastre que gardo dins lis Aupiho, es lou felen dóu grand pastre Marcèu
Cazeau, que me disié que li loup rodon de-longo dins lou relarg entre Eigaliero e Mouriès. Pamens, i’a
d’endré coume en Egito mounte lou loup es un animau venera e Anubis presidavo-ti pas au rire funeràri ?
Quau abaliguè Remus e Romulus vue siècle avans Jèsu ? Li fabulisto proun couneigu que soun Eisop,
Fèdre vo Jan de la Font fan referènci au loup quatorge fes dins si fablo. Lou loup es de cregne e au cop
es respeta e belèu que l’istòri mouderno l’óublido souvènt. Proun souvènt. Dise tout acò pèr-ço-que la
bèsti dóu Givaudan se dounavo d’èr emé un loubas demasia que tuè mai de cènt persouno dins d’ourrìbli
coundicioun e lou premié cop fuguè proche de Langogno. La babaroto de la couvido n’aclapo, elo souleto,
à milerado, pecaire ! Pamens tóuti dous, que siegue lou courounavirus o la bèsti dóu Givaudan soun
invesible. Faguè que lou rèi éu-meme, Louïs lou XVen, s’óucupavo d’aquel afaire. Pamens i’aguè sèmpre
mai de vitimo. Après tres mes de casso, lou vint de setèmbre 1765, Francés Antòni, lou porto-arquebuso
persounau dóu rèi de Franço tuè un gros loup à Nosto-Damo de Chaso. Pendènt un parèu de mes i’aguè
ges de vitimo. Ai ! las, la tuarié, lou chaple tournè mai fort, e dins l’autouno de 1766, deplouravon mai de
quaranto agressioun suplementàri. Alassa d’acò, lou rèi n’en vouguè plus entèndre parla, d’aquel afaire.
Pamens, la mort d’uno chato de dès-e-nòuv an que ié disien Jano Bastido, óubliguè lou jouine marqués
d’Apchier à se rounsa dins de nouvèlli batudo. Lou dès-e-sèt de jun 1767, entre qu’i’avié uno d’aquéli
batudo, Jan Chastèu, un cassaire, toumbè nas à nas ‘mé la bèsti. Pamens, ço estrange es que la bèsti
leissavo lis ome se sarra d’elo, coume s’èro adoumesticado. D’un soulet cop de fusiéu Chastèu abateguè
la grosso bèsti. Sus lou cop, Chastèu venguè lou sauvaire dóu Givaudan. Pamens, après li premié
moumen, la facileta qu’espeliguè dins lou biais qu’aquel afaire se desnouguè, interrougavo lou mounde.
Couneissié-ti aquelo bèsti ? Belèu que l’avié dreissado pèr desafama si marrìdis envejo, si vice, si deco,
sa couquinarié ? Coume que n’en fuguè, la legèndo de la bèsti dóu Givaudan nasquè. D’enquèsto
fuguèron entre-presso que moustravon que li nafraduro facho au mounde avien quicon que venguè de
l’esperit uman. Ansin, Jan Chastèu e soun fiéu Antòni venguèron au cor d’un mouloun de sóuçoun.
Fuguèron pas soulet estènt qu’i’avié tambèn Jan-Francés-Carle de la Molette, comte de Morangiés qu’èro
tambèn sóuçouna. Fau dire tambèn que Jan Chastèu èro escais-nouma « de la masca » e acò pleidejavo
pas en sa favour. Ma fisto, i’a de questioun que soun encaro vuei sènso responso... Coume pèr la
couvido !


Vaqui, aro es acaba. Pamens, vous doune rendès-vous la semano venènto, meme endré, memo ouro.
Brave mounde, vous fau la brassado e basto que lou tèms fuguèsse doucinèu. Adessias en tóuti !