LIS ERMAS DU 31 MARS 2021 PAR FELIP REIG - ISTÒRI DE LA COURSO CAMARGUENCO 3

31 mars 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - 31 Mars 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 31 Mars 2021 par Felip Reig.

_______________________________________________________________________

Cars ami, bèn lou bon-jour en tóuti. Lou darrié cop, nous erian aplanta au momen que li jo emé de biòu de Camargo èron pèr veni la courso libro. I’avié ges de reglamen proun clar, pamens lis espetacle de courso de biòu creisseguèron à bèl èime. La toco èro d’ourganisa uno coumpeticioun entre li grand biòu coucardié e li rasetaire e de valourisa e promóure la courso libro. Acò venguè lou credò dis enventaire dóu troufèu taurin : Jòrgi Thiel, journalisto, Marius Gardiol que fasié mestié de grafié de justiço e crounicaire taurin souto l’escais-noum Mariò e Pau Laurent, manadié e ourganisaire de courso que ié disien lou Papo de la bouvino. Aquélis ome aguèron uno idèio d’engèni. Aquéu troufèu èro beileja pèr li journau Midi Libre e la Prouvènço. I’avié tres divisioun : lou trofèu dis As, lou troufèu di rasetaire e lou troufèu de l’Aveni.
I’avié forço mounde dins li bancau vo li gradin, coume voulès. D’aquelo pountannado, i’avié pas que quàuquis escolo pèr aprene la teinico dóu raset e ma fisto, acò desrengè degun. Pamens venguè lèu necite que li courso s’ourganisèsson pèr l’encauso de la segureta dis ome e di bèsti. Fauguè, premié, anticipa lis acidènt estènt que de rasetaire paguèron de sa vido d’afrounta lou biòu negre dis lou round. D’un autre las fauguè prene en comte lis eisigènci ligado à la santa di biòu. Brigo à brigo se sentié qu’èro plus poussible de faire que que siegue. En mai d’acò, li rasetaire gagnavon de dardeno e d’ùni service publi coumencèron de se i’nteressa e ié demanda uno part d’aquéli gasan. De-vers 1975, d’assouciacioun eisistavon pamens èron recampado pèr ges d’estruturo e cadun batié sa marcho dins soun caire. Li clube de biòu, éli avien coumença de se fourma emé d’afiha desempièi uno bravo vóuto de tèms. Mai dóu coustat de la reglementacioun, i’avié pas rèn. Tout èro de faire. Se noumbrè d’aquéu tèms vuetanto-dous areno e i’avié peraqui vue-cènt courso dins l’annado. Pèr èstre miéus representa e pesa mai, estènt que falié fourça la recouneissènço, venguè necite de crea uno estruturo federairello, ex-nihilo. Pèr acò faire, un proujèt nasquè au coungrès de Mouriès, le sege de mars 1975. Aquéu proujèt prenguè lou noum de Federacioun Franceso de la Courso Camarguenco, la F.F.C.C. Tout acò se decidè entre Marcèu Mailhan, Pèire Sarguet e Jirome Vigne. Pèr clava sus lou chapitre de la neissènço, lou 27 de nouvèmbre 1975, Pèire Mazeaud, secretàri d’estat à la Jouinesso e is esport e Valèri Giscard d’Estaing, en vesito au Crès dins Erau fuguèron reçaupu à la coumuno pèr moussu Quet, maire de la viloto erautenco. Èron acoumpagna pèr Jan-Francés Deniaud, secretàri d’estat à l’Agriculturo. Aquel ome anounciè soulennamen que la Courso camarguenco èro proumougudo « Esport naciounau » à l’adreisso dóu numerò 22 de la carriero Jano d’Arc à Nime. D’aquelo pountannado, i’avie sege escolo taurino e tres-cènt-setanto-douge afiha. Quatre despartamen èron e soun encaro vuei councerna : Erau, Gard, Bouco-dóu-Rose e Vau-Cluso. I’aguè de discussioun estènt que d’ùni aurien miéus ama que la federacioun tenguèsse sa dependènci dóu Menistèri de la Culturo. La chausido dóu Menistèri de la Jouinesso e dis Esport fuguè facho à respèt dóu proublèmo di gasan di rasetaire.
Es Louïs Lacroix que prenguè la presidènci de la nouvello federacioun pendènt li dos premiéris annado, dounc de 1975 à 1977. Fuguè segui pèr Pèire Sarguet que tenié l’empento pendènt li tres annado seguènto e Jirome Vigne beilejè l’afaire jusqu’en 1988. Fuguè pièi Bernat Fesquet que prenguè la seguido pendènt un parèu d’annado. Seguiguè uno annado d’interim e finalamen Enri Itier venguè presidènt de la FFCC. Erian en 1991. Enri Itier chausiguè lou tèmo de : « Un esport au cor di tradicioun » pèr defini la courso camarguenco e acò recampè tout lou mounde. Enri Itier faguè uno presidènci remirablo e permeteguè à la FFCC de se croumpa un oustau à Nime e creè pièi la revisto La Fe di Biòu. À cha pau, un reglamen fuguè farga. Fau bèn dire que sènso aquéli chausido, i’aurié ‘gu de proublèmo qu’aurien trouba ges de soulucioun. E encaro, en 2021, tout acò’s pas ‘caba emé li tuadou e li coustrencho santàri. Lou biais de faire dis annado cinquanto emé d’à-pau-près fuguè enterra, emai fauguèsse garda nosto culturo e nòstis idèio. Enri Itier demourè lou cap de la Federacioun vint an de tèms, jusqu’en 2011. Seguiguè uno tempourado que vau pas la peno de n’en parla jusqu’en 2017 qu’Adrian Poujol venguè presidènt. Pamens i’aguè encaro de proublèmo e Adrian demissiounè en 2018 e fuguè ramplaça pèr Jan-Marc Soulas jusqu’en 2020. En fin finalo, Nicoulau Triol que fuguè rasetaire prenguè la presidènci de la Federacioun Franceso de la Courso Camarguenco la memo annado e Jan-Marc Soulas n’en fai toujours partido e beilejo la coumessioun Fourmacioun. I’a en tout sege coumessioun qu’obron coutrìo e voste servitour beilejo la coumessioun Culturo, Patrimòni & Tradicioun. Dóu cop, i’a ja forço causo qu’an chanja e acò fai pas que de coumença. De moun vejaire, aquelo presidènci vendra duradisso. La chourmo dins soun entié es atravalido, soulidàri e fraternalo. Ço que fau pèr faire bono obro en longo-mai ! Soulide.
Vaqui, pèr aro es acaba. Pamens, vous doune rendès-vous la semano venènto pèr uno autro istòri. Auras de novo d’aquelo bello federacioun, mounte la lengo nostro sara presènto. D’eici aqui, tenès-vous fièr e gaiard e avanças d’un pas lèri. Brave mounde, adessias !