Lis Ermas du 8 janvier 2020 par Felip Reig - Fourtuneto

09 janvier 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 8 janvier 2020 : FOURTUNETO.

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 9 janvier 2020 par Felip Reig.

Cars ami, brave mounde, la bono saludo en tóuti !

Premié de tout, souvète qu’aquelo annado fuguèsse pastado de pas e que vous gardèsse fièr e gaiard. Pèr coumença 2020 en bèuta, vous vau parla d’uno journado de 1890. Pau Marieton, grand felibre que foundè l’Escolo de la Sedo à Lioun e ami de Mistral, voulié ‘na à Mount-Pelié pèr assista à la Santo-Estello dóu Felibrige. Adounc, èro à espera lou trin à la garo de Lunèu. Tout d’uno veguè uno arlatenco de la caro palinello qu’avié carga un vèsti negre. Ni pèr acò, èro tras-que poulideto. Tre arriba à Mount-Pelié, Marieton countè soun rescontre à sis ami felibre qu’èron à espera Mistral e que ié diguèron : « Uno persouno tant galanto, nous la fau pèr nòsti fèsto ! » Èro pas necite de cerca bèn luen, la dono èro, elo tambèn, à espera lou Mèstre de Maiano. Autanlèu que Mistral apareiguè, vaqui la dono qu’anè croumpa di flour. Sènso faire d’alòngui, se sarrè de Mistral, estaquè lou bout en ié disènt un coumplimen. En seguido d’acò, l’embrassè e lou Mèstre tout reviscoula se pensè qu’aquelo arlatenco avié estado counvidado pèr li felibre à bèl esprèssi e ma fisto, uno cinquanteno de participant se gandiguèron à travers la vilo pèr un passo-carriero que Mistral n’èro lou cap de filo emé la bello arlatenco à soun bras. À bèlli fes, Mistral se virè lou cap e galantamen dEnmandè : « Quau es ? » Degun lou saupeguè, pamens Mistral s’esmouguè pas mai qu’acò.
Alor, quau èro aquelo bello arlatenco que s’arrapè lou bras dóu Mèstre e lou lachè plus ? Ié disien Enma Teissier que nasquè à Maussano lou 17 de janvié 1867 que soun paire Marcelin fasié mestié de sarraié. À-n-aquéu moumen de l’annado, en Prouvènço, se festejo sant Marcèu e à Barjòu dins Var, lou mounde danson li tripeto dins la glèiso. Belèu acò prefigurè la vido d’Enma que fuguè bèn bouleganto. Fuguè pas uno escoulano seriouso, e souvènti-fes fasié pèco, es à dire l’escolo bartassiero. Moustrè lèu un caratère independènt e ferouge. En 1885, manjavo dins si dès-e-vuech an, quand se maridè ‘mé Marc Jouve, un païsan encigala de-longo. Lou parèu plantè caviho à Moulès, proche Sant-Martin-de-Crau, e vaqui Enma que se faguè cabaretiero. Un drole que ié disien Jaque Marius Teoubald nasquè lou 9 d’abriéu 1887. Pamens, de bèlli fes la castagno tubavo à l’oustau pèr l’encauso dis infedileta d’Enma. Ai ! las, la defuntado dóu pichot Jaque lou 8 de mars 1890 - avié pas tres an, pecaire - marquè la fin de l’union d’Enma e de Marc. Enma demandè de se dessepara de soun espous e soun divòrci fuguè prounoucia lou 2 de desèmbre 1890. Pamens la separacioun èro enterinado desempièi uno bravo vóuto. Enma manjavo dins si vint-e-tres an, uno nouvello vido d’artisto coume se dis se durbiguè pèr elo qu’èro pèr farga sa renoumado. Ato ! pièi, deja en 1885, èro tout-bèu-just maridado quand se festejè l’anniversàri vint-e-cinquen dóu restacamen de Niço à la Franço. À-n-aquelo óucasioun, Enma se presentè à-n-un councours de bèuta. Óutenguè lou premié pres e dounè lis escus i paure qu’acò moustravo sa generousita e soun inchaiènço tambèn. Fuguè d’aquéu tèms qu’Enma coumencè de treva li felibre e li fèsto felibrenco. Es d’aquéu biais qu’Enma Teissier assistè au coungrès santestelen en 1890. Aquest an d’aqui, la vilo de Mount-Pelié festejè l’anniversàri sièis-centen de soun universita emé la presènci dóu presidènt Sadi Carnot. Lou sèr Mistral e Marieton dinavon emé la misteriouso arlatenco que se boutè à ié counta la siéuno jouinesso e si malur. Tout d’uno li felibre se diguèron que ié falié douna un noum. Marieton prepausè de ié douna lou noum de la pichoto faunesso de requisto de Calendal, Fourtuneto. Vague pèr Fourtuneto ! À Mount-Pelié, i’avié pièi un acamp emé de saberu que demié ‘li se troubèron Michèu Breal qu’èro un aparaire di lengo regiounalo e Camihe Chabaneau, grand filoulogue e proufessour d’universita qu’èro tambèn felibre majourau emé la cigalo de Nountroun. L’Acadèmi ounourè Mistral em’un pres pèr soun diciounàri e tout anavo bèn. Subran, tre acabado la dicho dóu felibre Déandreis, Fourtuneto jitè soun bout, diguè qu’èro Mirèio e se boutè à canta. Interpretè quàuqui cansoun,que d’ùni dintre éli èron de Charloun. Couneiguè un triounfle, bèn talamen que d’ùni diguèron que Fourtuneto avié escoubiha tóuti li dicho óuficialo. La Santo-Estello s’acabè coume se dèu e quàuqui jour après, Marieton reçaupeguè dos persouno que voulien vesita li terro santo di Felibre : la princesso, la fiho dóu cancelié de Russìo e sa cousino, Misé Photiadès. Tout aquéu mounde se passejèron dins lou relarg e lendeman se gandiguèron en Arle pèr ié vèire uno courso camarguenco. E aqui, Marieton rescountrè pèr cop d’astre, devinas quau… Fourtuneto, qu’avié carga un coustume de sedo, bello mai-que-mai e que charravo emé la princesso. La princesso Gortschakow diguè en Marieton : « Vène de descurbi uno arlatenco remirablo e espiritualo. Counviden-la se voulès ! » Marieton aguè bèn de mau pèr empacha lou proujèt. Mai l’istòri de Fourtuneto s’acabo pas aqui…
Pamens, pèr vuei, es acaba. Se capiteren mai la semano venènto. D’aqui en aro, tenès-vous fièr.

Bravo mounde, adessias !

Felip Reig (Mèstre d’obro dóu Felibrige)