Lis Ermas - Lou Louvi

19 mai 2022
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

LOU LOUVI
Cars ami, lou bon-jour en tóuti e siegues li bèn-vengu dins lis ermas. Sabès que Carle Galtier èro un escrivan, un pouèto, un
museoulogue, un etnoulogue, un antroupoulogue, e èro tambèn un countaire de trìo e un grand farcejaire. Alor vous vau counta
l’istòri « dóu Louvi » que Galtier escriguè dins soun recuei de conte titra La Pèiro d’Aiglo qu’espeliguè en 1996. Coume de
coustumo, lou falié asata pèr fin que rintrèsse dins lou mole. Vaqui… Sian à l’oumbreto souto lou fuiun di falabreguié. L’ouro
de la siesto a passa e venèn d’enterra un ome que degun lou couneissié e lou Benjamin me dis qu’èro de la parentèlo di
Pandeloun, uno famiho dóu vilage e au cementèri, i’a un toumbèu que porto aquéu noum.
« Mai mounte soun li Pandeloun aro ? ié fau.
— An tóuti despareigu, me respond Benjamin.
— Mai lis avèn bèn couneigu vèn Ramoun. Te n’en souvènes Benjamin.
— Vos pas que m’en souvène ! s’escris Benjamin. Ai passa lou counsèu de revisioun emé lou Louvi !
— Siés de la classo 20 ?
— Diantre ! Quent escandale !
Lou Paulin, qu’escouto, apound :
— Pèr encauso d’éu se n’en manquè pas gaire pèr que finiguessian tóuti en presoun.
— Mai de qu’avié fa ?
— Imagino-te qu’en plen counsèu de revisioun, en Ourgoun, davans tóuti lis autourita, lou Souto-prefèt, lou Courounèu, lis
Óuficié, li Majour, lis elegi despartementau, lou Maire meme, dins la grand salo de la Coumuno, lou Louvi se boutè à canta
l’Internaciounalo.
— Lou vese, quiha sus la taulo… Capoun ! dis Benjamin.
— Fau dire que d’aquéu tèms, se cantavo panca l’Internaciounalo meme à la televisioun. Alor davans lis autourita…Erian bon
pèr lou Counsèu de guerro... Basto, lou Maire pousquè adouba l’afaire, pamens, pas sènso peno…
— E te n’en rapèles, ié demando Ramoun que se n’en manquè d’un péu que ié coupessian la tèsto d’un cop de destrau ?
— Segur e s’aguèsse pas canta Viens Poupoulo, ié passavo. De que vos èro la nue e l’avian pas recouneigu. Sus aquéu cop aguè
uno bravo chanço.
— Fau dire qu’es toujour esta crespina lou Louvi. Quand me pénse que sus vounge, dès mouriguèron nega e éu, èro lou soulet
que n’en rescapè. Espèro qu’acò me venguèsse en tèsto… I’avié Batisto, Fanfan, Tòni, Poupau, ajudo-me Ramoun…
— Ciprian, Poupouno, Fineto, Tantan, acò n’en fai vue fai Ramoun.
— N’i’avié un que ié disien Barnabèu… apound Benjamin.
— N’en sian à nòu, dès emé lou Louvi…
— lou darrié soun noum m’escapo. Pamens… Lou Ramoun vèn :
— N’i’avié un autre estènt que lou Louvi èro lou soulet de la couvado que se n’en sourtiguè… Èro mai malin que lis autre lou
Louvi. Tóuti lis autre se soun nega dins lou gaudre de Liset quand la chavano davalè li mountagno …
— La couvado ? Mai quento couvado ? dise, iéu.
— La couvado que te parlan, dis Benjamin, aquelo di canard di Pandeloun.
— Coume, lou Louvi èro un canard ?
— Te l’avèn pas di ?
— E cantavo l’Internaciounalo ?
— Segur, l’Internaciounalo, la Madeloun e la Marsiheso !
— E passè lou Counsèu de revisioun ?
— Emé la classo vint qu’es la miéuno. Ah ! lou Louvi di Pandeloun èro un persounage…Lou Ramoun qu’acabo de bourra sa
pipo, tèto quàuqui boufado e dis :
— Aquéli Pandeloun, la femo ié disien Marto e à soun ome La Font, estènt que restavon dóu coustat de la Font de Sounègue.
Aquéli bràvi gènt avien ges d’enfant. Es pèr acò que dounavon de noum de persouno en tóuti si bèsti. Acò nous fasié rire. L’ase
èro Fernand, la saumo Fanìo, i’avié dos cabro Madeloun e Misè. I’avié ges de chin. Lou cat èro Moussu Gris e li catouno, ié
disien Julìo, Margarido e Cloutido. Pamens èro tout-parié pèr li lapin, li galino e l’aurre.
— E coume l’avès descurbi lou Louvi ?
— Fau dire qu’au moumen dóu Counsèu de revisioun, li couscrit qu’erian fasian lou tour di galinié pèr ié prene, ié rauba meme,
lou poudèn dire de que se faire un rebalun di bèu. Quand sian arriba encò di Pandeloun avèn aganta un canard. E au moumen de
lou tua ; vai-ti pas que se boutè à canta Viens Poupoulo. Alor ma fisto l’avèn garda ‘mé nautre e nous acoumpagné jusqu’à la
salo de la Coumuno pèr lou Counsèu de revisioun. Mai lou falié vèire quand anè cerca di cacalaus… Marto Pandeloun ié fasié
porta lou pichot panié et diguè au Louvi :
— Anen Louvi, anan querre toun goustat. E tóuti dous caminon coutrìo e lou Louvi, en se bidoursant, tèms en tèms boutè la
cansoun.
Vaqui l’istòri dóu Louvi qu’èro un canard estraourdinàri, parai ?
— Ah ! acò’s verai, ié dise.
En verita, encò de Galtier, lou conte s’esperloungo encaro. Pamens, pèr nautre,
e tra e tri, lou conte es fini, e tri e tra, lou conte es acaba. Vous doune rendès-vous la semano venènto. D’eici aqui, gardas
l’esperit siau e tenès-vous fièr. Vous brassège amistadousamen. Brave mounde, adissias !
Felip