Lis Ermas du 10 Avril 2019 par Felip Reig - Visite Aigues-Mortes

10 avril 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 10 Avril 2019 Visite Aigues-Mortes - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Lis ermas du 10 Avril 2019 par Felip Reig

Lis escàmbi entre lis escolo de lengo felibrenco dins Gard se fan toujours mai. Ansin, lou dimars,
dous d’abriéu passa, lis escoulan de l’escolo felibrenco La Margarideto de Margarido, après
qu’aguèsson vesita Sant-Gile, Bèu-Caire e Valabrego se gandiguèron en Aigo-Morto pèr fin de
vesita la ciéuta medievalo. Fuguerian reçaupu pèr lou Ciéucle de lengo d’o e soun Cabiscòu
qu’es tambèn felibre majourau e Sendi de la mantenènço Lengadò-Roussihoun, vole nouma
Gabriéu Brun. Acò agradiéu èro de vèire quàuquis escoulan d’Aigo-Morto qu’èron vengu nous
faire d’acuiènço e nous presenta sa viloto.


Louïs lou nouven vouguè basti un port e uno vilo en ribo de l’estang de l’Abat. Pèr acò faire,
demandè de terro à l’abadié de Saumòdi. Entamena la bastisoun d’uno vilo ex nihilo en 1240
sourgentavo d’uno voulounta d’asseta encaro mai lou poudé reiau dins lou Miejour, à respèt dóu
comte de Toulouso. La batèsto de Muret en 1213 e lou trata de Meaux-Paris en 1229 marquè
pièi la fin de la crousado albigeso e preparè lou restacamen definitiéu di païs óucitan au doumèni
reiau capecian e Louïs lou nouven èro pas lou darrié rèi que vouguè espandi li terro de la
courouno de Franço estènt que Felipe II Aguste prenguè la Nourmandìo e l’Auvergno mentre que
soun fiéu, Louïs lou vuechen, lou paire de sant-Louis, s’emparè dóu Limousin, dóu Perigord e
dóu Peitau au nas dis anglés. Dins tout acò, d’aquéu tèms, s’entre-mesclavon de resoun
ecounoumico, poulitico e religiouso. Fau dire tambèn qu’èro interessant d’avé uno porto duberto
sus la Mieterrano pèr enanti lou coumèrci maritime e garda lou mounoupòli pèr li marchandiso
qu’intron e sorton dóu reiaume. Acò èro sinounime de recèto. Un mounoupòli que durè jusqu’en
1484. Ço que fai perpensa à-n-acò es de vèire lou maiun de canau que Louïs lou nouveau entreprenguè en direicioun de Mount-Pelié e subre-tout de la valado de Rose. Rose qu’èro la raro
entre lou reiaume de Franço e lou sant Empèri german. Coume que siegue basti uno vilo dins
aquéu rode fuguè uno escoumesso estènt que i’a pas proun de materiau, es à dire de peirau pèr
lou faire e li falié faire veni di carriero de Bèu-Caire e li carreja sus de batèu. En mai d’acò, falié
teni comte dóu sòu sablounous qu’impausè de basti sus de paufi, valènt-à-dire de poustèu de
bos. Pamens, acò se faguè, emé de tèms, mai se faguè. Bèn talamen que la vilo fuguè foundado
en 1246 e lou rèi faguè soun proun pèr atira de mounde. De-segur, la poupulacioun creisseguè
à bèl èime. Li bàrri fuguèron basti souto lou règne de Louïs IX ; pamens fuguèron acaba souto
Felipe Le Bèl à la debuto dóu siècle XIVen. La mar, elo, venguè jamai jusqu’en Aigo-Morto e SantLouïs la rejougneguè bono-di un canau, estènt que prenguè dous cop la crous : en 1248 e en
1270, annado de sa mort.


La tourre de Coustanço que lis aigo-mourten ié dison la Pounchudo, es lou soulet vestige de
l’epoco de Sant-Louïs. Es de remarca que lou noum de Coustanço sourtiguè lou premié cop qu’en
1396 e semblarié qu’aquéu noum aguèsse pas rèn de vèire emé la fiho de Louïs lou siesen, lou
rèi francés que mouriguè en 1137. Coustanço, elo, mouriguè en 1176 e fuguè maridado emé
Ramound V de Toulouso. Soun fraire, Louïs lou seten se maridè emé Alienor d’Aquitàni que
venguè la rèire-grand de Sant-Louïs. De-segur, l’image es de manco pèr moustra aquel aubre
genealougi. Basto, pèr tourna à la tourre de Coustanço emé la chifro, fuguè bastido entre 1241 e
1248, annado que Sant-Louïs partiguè en crousado lou premié cop. Aquelo tourre testejo autour
de 30 mètre e 17 mètre pèr lou fare que ié dison Carlemagno. A-n-un diamètre de 22 mètre.
Fuguè uno presoun d’estat e au siècle xviien venguè uno presoun ounte èron embarra lis
Uganaud. Es aqui que Marìo Durand fuguè engaubiado trento-vuech an de tèms.
Vaqui, vous doune rendès-vous davans la porto de la Gardeto dimècre venènt pèr faire la vesito
de la ciéuta. D’eici aqui tenès fièr e gaiard. Brave mounde, adessias !


Felip Reig (Mèstre d’obro dóu Felibrige)