Lis Ermas du 16 octobre 2019 par Felip Reig - L'Acadèmi d'Arle3

17 octobre 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 16 Octobre 2019, L'Acadèmi d'Arle 3/3 - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 16 Octobre 2019 par Felip Reig.

Cars ami, brave mounde, la bono saludo en tóuti !

Tresenco e darriero partido de l’istòri de l’Acadèmi d’Arle que nasquè en 1666 e s’amoussè tre 1721. De 1734 enjusqu’en 1941, i’aguè uno tempourado que se ié debanèron quàuquis aventure à l’entour de la Soucieta d’arqueoulougìo e i’aguè d’envanc pèr l’etnoulougìo que la vilo d’Arle se n’en faguè uno veirino. En 1903, fuguè creado l’a soucieta Les Amis du vieil Arles que créè soun buletin qu’eisisto encaro vuei, souto uno forma diferènto de la debuto. Es dins aquelo tempourado que s’ausissié lou noum de Fernand Benoit. Aro, imaginas que sian en 1941. Aqueste an d’aqui l’Acadèmi èro pèr tourna coumença, mai em’uno toco diferènto. D’efèt se la proumiero es estado creado pèr l’espandimen dóu francés, en 1941, l’Acadèmi regiounalo d’Arle voulié prene en comte lou regiounalisme et la lengo prouvençalo. Tre fourma, lou gouvèr de Vichi desvouloupo uno poulitico regiounalo. Lou fóuclore vèn coume un poun impourtant de dóutrino e de proupagando assoucia à-n-uno poulitico de retour is art e i tradicioun poupulàri, estènt que l’agriculturo e l’artisanat soun de coundicioun nécite au redreissamen de la Franço. Ansin Fernand Benoit vòu tourna founda uno Acadèmi dous-cènt-vint an après soun darrier acamp. Aquelo nouvello creacioun se fai lou 20 de janvié 1941 (publicacioun dins lou journau óuficiau dóu 15 de fébrié 1941, souto lou titre d’Académie Régionale d’Arles. Lou sèti de l’Acadèmi èro lou Museon Arlaten. La toco de l’Acadèmi èro de reviéuda l’esperit regionau pèr la restauracioun de tóuti li valour espiritualo dóu païs d’Arle. I’avié cinq seicioun qu’uno dintre éli èro dedicado au Felibrige e i tradicioun que souvetè persegui l’obro de Frederi Mistral, es à dire, manteni li tradicioun felibrenco e li fèsto loucalo. Èro l’ouro dóu retour di Fèsto Vierginenco que metien à l’ounour li chato que prenien lou riban pèr lou premié cop de sa vido. L’inaguracioun d’aquelo nouvello Acadèmi se debanè lou 16 de mars 1941 au teatre municipau emé la presènci dóu Maire e de Fernand Benoit. L’Acadèmi se boutè à publica uno revisto souto lou titre La Revue d’Arles qu’èro un ourgano d’enfourmacioun e de proupagando de l’arredounimen d’Arle. L’annado 1943 fuguè uno annado de roumpeduro e mant un membre fuguèron ramplaça. Emai la vilo d’Arle fuguèsse uno vilo d’erudicioun, se troubè pamens qu’èro mens fertilo au desvouloupamen academi. Verai, lis Acadèmi de letro, equèstro, de musico e de damo couneiguèron pas qu’uno vido efemèro. Bèn talamen qu’en 1945, l’Acadèmi, proun marcado di valour de la Revoulucioun naciounalo e estènt que de sóuçoun grèu pèson sus elo après la Liberacioun, fuguè refoundado, e li membre dóu Counsèu d’amenistracioun demessiounèron lou 7 de desèmbre 1947. Lou Coumitat loucau de Liberacioun revouquè Fernand Benoit et La Revue d’Arle francamen Petainisto fuguè arrestado. Un nouvèu presidènt, lou bèu-cairen qu’avié noum Jan Bessat fuguè elegi lou 11 de febrié 1945 e souto sa direicioun, le mot « regiounalo » despareiguè - trop Petainisto e l’Acadèmi venguè simplamen « l’Acadèmie d’Arles » que durbiguè uno nouvello pajo de soun istòri. En liò e plaço de La Revue d’Arles, l’Acadèmi decidè de tourna crea un bulletin d’enfourmacioun mesadié. Dins l’Acadèmi, se ié retroubè la maje part dis ancian membre emé Fernand Benoit, Louïs Jou que travaiè ‘mé Carle Galtier, mai tambèn Jaque Gilles, Carle Naudot, Leo Lellée, Andriéu Spitz e d’autre. Fau pas èstre estouna d’acò, estènt que i’aguè ges de purgo ideoulougico. Pèire Fassin, lou felen d’Emile Fassin, que s’entournè de cinq an de cativeta rintrè à l’Acadèmi tambèn. D’àutri noum espeliguèron que dintre éli i’avié lou de Marius Fayard, Micoulau Crouanson, presidènt dóu Coumitat di Fèsto d’Arle emai lou de Marcello Bissière que jouguè un rôle amenistratiéu e d’animacioun impourtant dins l’Acadèmi. Au mes de mars 1949, Pèire Fassin venguè presidènt de l’Acadèmi après lou despart de Rafèu Richard que sucediguè à Jan Bessat en 1947. Pèire Fassin faguè uno mandaturo longo de sege annado emé un ritme de travail qu’es pas de crèire. À la fin dis annado cinquanto, l’ativeta de l’Acadèmi s’amoussè un cop de mai e fauguè espera l’arribado de Jan Maurise Rouqueto pèr tourna vèire l’Acadèmi reprene de coulour. Li counferènci counsacrado i tèmo prouvençalisto descrèisson à bèl èime à l’entour de la lengo e dóu fóuclore e lis intervenant venguèron mens generalisto. Un fube de persounalita fuguèron evoucado, de Simono Weil, la filousofo à-n- Andriéu Villard, d’Anatole France à-n-Anfos Daudet, o encaro de Pau Arene à Micoulau Saboly. Ansin, en 1965, vint an après sa refoundacioun, la coumpagnié arlatenco renouvelado dins soun entié èro mai eisigènto, mai duberto e prenguè un ritme de prouducioun coustant enjuqu’au-jour-d’uie. Ansin, vaqui ço qu’es l’istòri de la bello Acadèmi de la vilo d’Arle.
Adounc, aro la vostro emessioun es acabado. Se capiterèn mai la semano venènto. D’eici aqui que lou tèms fuguèsse doucinèu.

Brave mounde, adessias !


Felip Reig (Mèstre d’obro dóu Felibrige)