Lis Ermas du 2 octobre 2019 par Felip Reig - L'Acadèmi d'Arle1

03 octobre 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 2 Octobre 2019, L'Acadèmi d'Arle1 - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Lis ermas du 2 Octobre 2019 par Felip Reig

L'Acadèmi d'Arle

Cars ami, brave mounde, que diéu vous lou doune ! Dimenche passa me siéu ana passeja en Arle. Pas pèr vesita si mounumen que coumènce de li counèisse. Mai pèr assista à la presentacioun d’un ome que ramplaço aro JanMaurise Rouqueto dins lou fautuèi d’academician numérò 24. Vole parla de Francés Goven que fai mestié d’architeite. Lou nouvel academician avié de faire lou laus d’aquéu que ié laissavo sa plaço. Avèn après ansin que Jan-Maurise Rouqueto qu’èro lou presidènt rintrè à l’Acadèmi en 1954, quand manjavo dins si 23 an. Èro lou mai jouine dins l’istòri de l’Acadèmi. Avèn agu pièi un fube de detai sus tout ço que faguè Rouqueto pèr sa vilo que l’a quitè pas jamai, coume pèr eisèmple, de crea lou museon de la Camargo que vuei es sa fiho que lou beilejo e assistè lou chantié de l’atuau Museon despartementau de la Prouvènço Antico que l’architeite Enri Ciriani n’en faguè li plan. Dóu cop me tournè en memento l’istòri de l’Acadèmi d’Arle. L’Acadèmi reialo d’Arle fuguè creado en 1666, souto lou soulèu louisquatourgen pèr fin d’istala encaro mai la lengo franceso. Acò èro un marrit cop pèr lou latin, mai subre-tout pèr lou prouvençau. En 2016, se n’en festejè l’anniversàri tres-cènt cinquanten. Acò venguè d’un jour de 1660 que lou rèi s’èro vengu passeja en Arle. À la coumencènço ié disien « l’Académie de bel esprit et de la belle galanterie ». Lou biais qu’aquelo Acadèmi marchavo avié lèu fa de faire de jalousarié, subre-tout venènt d’aquéli que restavon sus soun lindau. Emai prenguèsse lou noum d’acadèmi pas que lou tresen d’avoust 1666 emé lou noum d’« Academia arelatensis », lis estatut de l’acadèmi soun esta fa pièi segound lou moudèle dis estatut dis acadèmi italiano. Lis estatut fuguèron adóuta lou 28 de setèmbre 1666. Lou blasoun pinta de l’acadèmi èro lou lioun d’Arle que tèn un bandèu mounte es escri sa deviso : « Laetabor guenuisse pares », es à dire « Me rejouïriéu de n’agué engendra de coume aquéli ». Lis ʹʹaquéliʹʹ soun de liounet o de liounèu, coume voulès que se trobon à coustat dóu lioun. À la debuto, de cop que i’avié lis acamp de l’acadèmi èron pas segui e arribè même qu’èron annula. Pèr faire crèisse à bèl èime la renoumado dóu « Pichot cors » dis academician, i’a de mounde que fuguèron iscri mentre que demandavon pas mai que de veni de membre esterne. Bèn talamen qu’à la fin de 1667, i’avié ja dès-e-vue membre iscri sus li vint previst pèr lis estatut. L’acadèmi óutenguè si letro de patènto de la man dóu rèi bono-di l’ajudo d’Antòni de Grille, lou fraire de Jaque de Robias qu’èro mèstre de l’oustau dóu rèi. En 1668, lou Pichot Cors dis academician se dounèron de tèms pèr demanda au rèi l’afihacioun de soun acadèmi à l’acadèmi franceso. Óutenguèron si letro signado de la man reialo. Fuguè li Conse d’Arle qu’encarguèron Gile de Roubin qu’èro à la cour reialo d’aquéu tèms, d’óufri au rèi uno estampo de l’oubelisco arlatenco que se vèi encuei sus la plaço de la Republico qu’èro lou simbèu de la reüssido dóu rèi de Franço. Dóu cop, l’acadèmi óutenguè dóu rèi de pourta lou noumbre dis elegi à l’acadèmi de vint à trento. En 1687, l’acadèmi èro en dòu après la despartido de dous academician au mes de jun e d’avoust. Un cop de mai fuguè Louïs quatorge que chausiguè si ramplaçant qu’un dintre éli èro lou marqués de Dangeau qu’èro tambèn de l’acadèmi franceso. Acò vauguè à l’acadèmi d’Arle de poudé pourta lou Pichot Cors de trento à quaranto academician. Un fa impourtant es l’amessioun dins lou Pichot Cors dis academician d’uno femo qu’avié noum Dono Deshoulières. Ço que n’en faguè la proumiero academiciano franceso. Après quàuqui décès, i premiéri lusour dóu siècle XVIII, d’academician, n’en soubravo pas qu’une quingeno. En 1721, la pesto n’en tuè encaro d’autre, bèn talamen que lou soulet subre-vivènt de l’acadèmi èro lou Chivalié de Roumieu qu’assajè pas de tourna crea l’acadèmi d’Arle, mai que rintrè à l’acadèmi de Marsiho quand fuguè creado en 1726. Mant uno resoun soun à l’óurigino de la despareicioun de l’acadèmi d’Arle. Premié li guerro que lou rèi s’i’èro engaja à la fin de soun règne escoufiguè la noublesso arlatenco, mai que la di vilo procho coume z-Ais-de-Prouvènço vo Marsiho. Pamens sarié pulèu pèr l’encauso dóu manco de presènci dis academician que l’acadèmi reialo d’Arle se desgrunè. Mai i’a ges de registre d’aquéu tèms. D’ùni dison que dins aquelo vilo de pichoto impourtanço, i’avié pas proun de « bèus esperit », valènt-à-dire qu’Arle èro pas un pesquié proun proudutiéu de mounde saberu, segur estènt que d’aquelo pountannado, èstre riche valié dire èstre saberu. Vous laisse juge d’aquelo equivalènci. Ço segur, es que l’acadèmi d’Arle, mai que lis àutris acadèmi dóu Miejour e même mai que l’acadèmi franceso, èro reservado à la noublesso. Pamens, pèr dire lou verai, un sounet publica dins Lou Mercure de France de 1732, atribuïguè au Chivalié de Roumieu la toco de restabli l’acadèmi d’Arle. D’efèt, uno nouvello acadèmi se devié ‘stre creado en Arle, mai èro uno acadèmi de teatre que Pèire de Morand voulié founda emé l’ajudo de Roumieu, qu’éu voulié tourna faire viéure l’acadèmi reialo d’Arle. Pamens, lou Chivalié de Roumieu mouriguè en 1734 e Pèire Morand partiguè à Paris e aquéu proujèt jamai crebè l’ióu. Èro la fin de l’acadèmi d’Arle ? Noun. Mai i’aura la semano venènto uno seguido à-n-aquelo istòri. Soulide.
Adounc, aro la vostro emessioun es acabado. Se capiterèn mai la semano venènto. D’eici aqui que lou tèms fuguèsse doucinèu. Brave mounde, adessias ! Felip Reig (Mèstre d’obro dóu Felibrige)