Lis Ermas du 9 octobre 2019 par Felip Reig - L'Acadèmi d'Arle2

10 octobre 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 9 Octobre 2019, L'Acadèmi d'Arle2 - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Lis ermas du 9 Octobre 2019 par Felip Reig

L'Acadèmi d'Arle 2

Cars ami, brave mounde, la bono saludo en tóuti ! Pèr counta lou resumit de l’istòri de l’Acadèmi Reialo d’Arle, avèn vist qu’aquelo Acadèmi nasquè en 1666 e que decessè sis ativeta ‘peraqui en 1734. Lis encauso eisato d’acò soun descouneigudo e diren qu’acò venguè d’un councous de circoustànci. E aquelo Acadèmi intrè dins un som de quàsi dous siècle. Lou paradosse es que pendènt dous siècle de tèms que l’Acadèmi d’Arle durmissié, dins aquel entre-vau d’àutris Acadèmi nasquèron de pertout dins Éuropo touto. Pamens, la fiho einado de l’Acadèmi Franceso tournè naisse en 1941. Segur qu’èro foro questioun de counserva lou noum d’Acadèmi Reialo e segur tambèn que soun noum venguè Acadèmi Regiounalo d’Arle. Poudèn dire que fuguè uno Acadèmi diferènto de la proumiero. Mai de que s’es passa après 1734 e avans 1941, segur estènt que la nouvello Acadèmi espeliguè pas subran ? Lou mounde que s’ilustrèron dins aquelo tempourado nasquèron à la debuto dóu siècle dès-e-vue e la maje part dintre éli sourtiguèron de la bourgesìo. D’aquelo pountannado la bourgesìo venguè toujours mai impourtanto dins lou païs d’Arle. L’istòri, l’arqueoulougìo, mai tambèn lou prougrès rurau, souciau, l’artisanat, e lou coumerce èron li sujèt que li saberu d’aquéu tèms amèron lou miéus. Pamens d’àutri saberu s’interessavon à la pouësìo e à l’estùdi di doumèni agricolo. D’à cha pau, d’ourganisme de mounde sapiènt apareiguèron que dintre éli i’avié Emile Fassin (1842-1922) que dounè d’envanc à la recerco etnoulougico e à l’espelissoun de revisto istourico. Pamens èro pas soulet, mai sarié trop long de n’en faire la tiero de tóuti aquéli qu’an adu sa pèiro au clapas, coume Aguste Lieutaud pèr eisèmple.
Entre que la Soucieta arqueoulougico fasié bono obro, en 1886, l’abat Jóusè Rance èro à mand de publica soun estùdi à l’entour de l’anciano Acadèmi d’Arle e demandè à Frederi Mistral de n’escriéure la prefàci. Mistral mandè un tèste tras-que criti. Pèr lou premié cop, fuguè pausado la questioun de la lengo. Fau dire que l’Acadèmi de 1666 èro estado un istrumen que sa toco èro, tre la debuto, d’espandi lou francés au cor dóu païs prouvençau. Dóu cop demanda à Mistral de faire la prefàci d’un libre que countè l’istòri d’aquelo Acadèmi èro uno empego de premiero. Pamens, li mot dóu Mèstre de Maiano fuguèron publica e acò nafrè degun e tóuti coumprenguèron sa pousicioun. À la bartavello di siècle dès-e-nòu e vint, la vido culturalo arlatenco venguè sèmpre mai tihouso. La soucieta d’arqueoulougìo penequejè e en 1903 nasquè l’assouciacioun que ié disien Les Amis du Vieil Arles. Se trobo que lou goust pèr l’etnougrafìo creissié à bèl èime en Arle, bèn talamen que venguè meme la veirino de la vilo emé la foundacioun dóu Museon Arlaten que fuguè inagura en 1899. Dins la tirassiero mistralenco, en francés dirian la mouvance mistralienne, se creè un maiun fa d’ome, de femo e de groupamen dins tout lou relarg. Leo Lelée (1872-1947) s’impausè naturalamen coume lou cap de filo de l’imajarié arlatenco. La vilo d’Arle s’endrudissié de l’Escolo Mistralenco en 1905 que publiquè uno revisto tre 1907 que soun titre es En Terro d’Arle e de l’Estello de l’Aveni en 1906. Sènso óublida « Lou Coumitat dóu Museon Arlaten » que fuguè crea en 1906 e que publica, éu tambèn, sa revisto regiounalisto titrado En Provence que pareigu- de 1923 enjusqu’en 1930. I’aguè d’àutris iniciativo emé Charloun Rieu, Jóusè d’Arbaud e alia. Fau subre-tout pas óublida Folcò de Baroncelli, marqués de Javon que fuguè l’enventaire dóu « mite camarguen ». L’istitucioun de la Rèino d’Arle en 1930 pèr marca l’anniversàri centen de la neissènço de Frederi Mistral es en drecho ligno de la preso de counsciènci dóu pople prouvençau que cridè soun identita. La guerro aduguè un courrènt pouliti nouvèu emé lou retour à la terro e li mestié tradiciounau. Es beléu à la flour de camin d’aquéu courrènt e de l’interès pourta à la cerco etnoulougico e à l’istòri que nasquè l’Acadèmi Regiounalo d’Arle. Un parèu d’ome fuguèron à l’óurigino d’aquelo reneissènço : premié, Jan des Vallières (1895-1970), souto-prefèt d’Arles en nouvèmbre 1940 qu’aduguè loup es dóu mitan amenistratiéu e pouliti ; e segound, Fernand Benoit (1892-1969) qu’èro un espert scientifi que faguè d’un biais requist la sintèsi entre arqueoulougìo, istòri e etnougrafìo. De mounde qu’an marca l’istòri dóu Païs arlaten rejougneguèron Jan des Vallières e Fernand Benoit. S’agis de Leo Lelée e Folcò de Baroncelli que n’avèn ja parla adès, Jaque Gilles, Ivan Audouard paire, Cristòu Yonnet e Marius Fayard, mèstre de masseto dóu group Li Cigaloun Arlaten que venguè pièi presidènt de la seicioun dóu Felibrige e di tradicioun de l’Acadèmi Regiounalo d’Arle. Aquéli persouno se recampèron pèr farga un principe nouvèu e countribuïguèron à l’espandimen dóu regiounalisme prouvençau. Adounc, fuguè bono-di lou liame entre poulitico e regiounalisme que la sesiho inaguralo de l’Acadèmi Regiounalo d’Arle se debanè au teatre municipau d’Arle lou 16 de mars 1941. Lou cop venènt veiren l’acioun culturalo de l’Acadèmi Regiounalo d’Arle.
Adounc, aro la vostro emessioun es acabado. Se capiterèn mai la semano venènto. D’eici aqui que lou tèms fuguèsse doucinèu. Brave mounde, adessias !
Felip Reig (Mèstre d’obro dóu Felibrige)