Lis Ernas du 6 Mars 2019 par Felip Reig - Lou founs di mar, vitimo dis uman

08 mars 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 6 Mars 2019 Lou founs di mar, vitimo dis uman - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Lou founs di mar, vitimo dis uman

Emai sus la terro i’aguèsse tant de bèlli causo que s’ameriton d’èstre remirado, sian pas tóuti li jour à s’escacalassa. Eh o, coume se dis, cado medaio à soun revès. Pamens fau pas crèire que dins li founsas di gràndi mar e dis oucean, li pèis festejon de-longo.

Lis oucean cuerbon quàsi li très quart de la surfàci terrèstro. E dessouto, dins aquélis aigo founso, i’a un servo gigantesco de biodiversita. Mai d’à cha pau, desempièi la coumençanço dóu siècle vinten, se trobo d’idroucarbure, de degaiadis endustriau, agricolo e doumesti, dóu plasti, d’escourriho de touto meno e que sabe encaro iéu. Bèn talamen que lou règne animau e vegetau es menaça. Mai quau lou saup ? Quau lou pren en comte dins soun coumpourtamen ?

Fau pas óublida dins aquel afaire lou role de l’aigo e dóu carbone emé d’escàmbi entre l’oucean e l’atmousfèro que permeton d’assourbi mai d’un tiers dis emessioun de CO2 ligado is ativeta umano. En revenge es de saupre que se d’un coustat lou carbone contribuïs à l’equilibre fisicochimi dins l’aigo, quand n’i’a trop, acò fai veni l’aigo acido e represènto un pouisoun vertadié pèr la biodiversita marino. La temperaduro de l’aigo es tambèn impourtanto pèr d’ùni meno de courau que se bouton à rebuta lou fitoupantoun e finisson pèr mouri. Mai li courau soun prefound, mai acò vèn verai. Se vèi ansin que li gas que venon de l’efèt d’escaufadou - vole dire les gaz à effet de serre -, an uno impourtanço grandarasso sus la santa dis oucean. Malurousamen, se saup que la temperaduro dis oucean va countinua de crèisse e lou plantoun despareira toujours mai. Pamens fau souna campano à brand estènt que se lou plantoun despareissié de-founs, sarié la vido souto marino touto que s’amoussarié.

I’a pièi uno autro formo de poulucioun, la que l’uman n’es à l’óurigino. Verai, dins la naturo, de-pertout, se vèi d’escoubiho e de dagaiadis en plasti. Li ribièro, li flume carrejon tout acò dins li mar e lis oucean. Segound lou vejaire de l’Ourganisacioun di Nacioun Unido, cènt vint milo tros de plasti floutant caupon dins cade kiloumètre d’oucean. E, ma fisto, de que se fai ? Pèr dire lou verai, pas grand causo. Alor avèn vist desparèisse li pèis de surfàci e aro lis espèci que soun au founs coumençon de faire parié. Fau dire que sian dins la subre-pesco despièi uno bravo vóuto.

Fau leva lengo pièi sus l’endustrìo que remando de metau lourd dins li mar e lis oucean. Acò’s uno poulucioun tras-que noucènto e perniciouso, subre-tout emé lou metilmercùri qu’es un pouisoun di mai marrit qu’agarris lou sistèmo nervous di pèis que n’assourbisson.

Pèr acaba, poudrian parla de la mangiho manlevado de la mar. Belèu que faudrié chanja noste biais de manja. D’efèt mangèn peraqui uno deseno d’espèci de pèis mentre que n’i’a bèn mai de cènt qu’eisiston. Bessai, fauto de bar faudra manja mai d’auriòu e leissa tranquille la merlusso e la solo e douna la preferènci à l’arenc e i pèis d’aigo douço. En fin finalo, avèn de nous óurienta de-vers de filiero de pesco durablo. Ço segur es que la pesco loucalo sarié miéus que li gròssi pescarié se voulèn limita lis emesiioun de CO2.

Pamens leva dóu coustat que poudèn faire, degun vòu faire rèire dins soun biais de vueja lis oucean di pèis e de lis empli d’escoubiho. Es de crèire coume lou dis l’adàgi que l’ome passo la maje part de soun tèms à ressa la branco mounte s’es asseta. Alors, crese qu’apartèn, en tóuti tant que sian, de faire mèfi e respeta la naturo. Emai Franço fuguèsse lou païs que fai lou mens de poulucioun, fau countinua la lucho pèr leissa à nòsti pichot un mounde que sara encaro capable de li nourri. Acò’s lou bon sèns. Mai es enca luen de la soupo à la bouco. Coume que siegue, se marquèn noste respèt pèr lou fin founs dis oucean e la naturo, acò nous sara rendu. Lou countràri, tout-parié. 

Felip Reig (Mèstre d’obro dóu Felibrige) 

Lou fin founs, es au bèu founs, li founsas o li founsau de la mar,