LIS ERMAS DU 02 JUIN 2021 PAR FELIP REIG - LI VIÈI

08 juin 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mecredis à 6h00, 13h30, 19h00.

--------------------------------------------------------------------------------------------------

LI VIÈI
Cars ami, la bono saludo en tóuti. Aquesto semano me venguè quatecant la pensado à l’entour di vièii persouno e dóu biais que sa vido s’acabavo. Aquelo idèio me venguè estènt qu’èro à pensa is establimen que ié dison lis Ehpad. Se dis que sian dins uno tempourado que li gand soun sèmpre mai noumbrous pèr s’óucupa de si felen. I’a pas rèn de nouvèu aqui dedins, d’autant que nòstis enfant soun óubliga de faire un mestié e garda sis enfant à-n-éli es un biais de lis ajuda à s’istala, croumpa un oustau e viéure nourmalamen, o gaire se n’en manco. Pamens quand aquéli grand venon trop vièi pèr lou faire, sis enfant li bouton dins uno Ehpad o un establimen de la memo meno. Me ramente quand ère enfant, li grand e de cop que i’avié, li rèire-grand demouravon emé sa descendènci. E la vido en famiho avié tout soun sèns. Sènso se n’en rèndre comte, li pichot èron emé si grand, aproufichavon de sa presènci e de soun amour. De-segur, èro pas toujour facile de viéure lis un ‘mé lis autre. Li counflit de generacioun mancavon pas. Verai que quand lou mounde venon vièi, prenon d’àutris abitudo, diferènto d’aquéli dis enfant e encaro mai diferènto de li de si felen. Lis enfant se rèndon pas comte que li vièi podon plus s’asata à tóuti li situacioun, que podon plus viéure coume éli, ‘mé lou meme ritme, lis mémis ouro. Quand venon dins l’age, lou mounde óublidon sa vergougno pèr se teni en deforo de causo que li councernon plus. Taison sis inquietudo d’arriba cap a la fin de sa vido e se retroubon soulet dins soun caire emé soun esperiènci de la vido vidanto que la podon pas parteja. La vièio Bertraneto de Galtier dins lou conte que soun titre es « L’autre coustat de la taulo », èro souleto davans la chaminèio quand soun ome avié parti. Sa fiho e sa feleno pensavon que sabié plus rèn e que couneissié pas rèn à la vido. Pamens, sènso se vira de-vers éli, sabié, la vièio, ço qu’èro à mand de se passa. Elo finiguè pèr faire parié que sa maire e, tout comte rebatu, sa fiho farié parié qu’elo-meme. Dóu mens, Bertraneto poudié ‘caba sa vido au mitan di siéu.
Li vièi dins si darrié jour se passon de-longo dins sa tèsto lou filme de sa vido e se ramenton pas que di bon moumen. La rodo viro coume se dis. Lis àvi nous dison la verita e nautre demouran incredule. Es de saupre qu’en fin finalo, avèn pas un jour lou courage, coume acò, de dire la verita. Intran simplamen dins un age qu’avèn plus besoun de dire de messorgo. Alor i vièi ié poudèn faire finsanço. Nous baion de bon counsèu. Li fau escouta quand raconton sa vido. Ié fai de bèn de n’en parla. Es quand soun encaro vivènt qu’avèn de ié dire nosto afecioun, noste amour. Es pèr acò que se pòu pas rèndre conte dóu mau que fasèn quand li recampan dins d’establimen sènso amo. Autro-fes, quand un vièi partié pèr se gandi à l’espitau, es éu que n’en fasié la chausido de soun sicap, pèr fin de pas geina sis enfant. Jamai sarié vengu à l’idèio dis enfant de se dessepara de si gènt, nimai de si grand. Acò venguè, brigo à brigo un proublèmo de soucieta. Boudou lou dis dins Catòia, Galtier e Jaussemin n’en parlavo tambèn dins soun obro Aro, pèr acaba, vous vau legi un tros de Las Papillotas de Jaussemin quand èro pichot e que veguè soun grand quita l’oustau famihau :
Ero un dilus , mous dèts ans s'acabàbon :
Fazian as jots , èri Rey , m'escourtâbon.
Mais ! tout d'un cot , qui bèn me desturba ?
Un bièl setut sur un faoulul d'aouba ,
Que sur dus pals , dus carretès pourtâbon !
Lou bièl s'approcho , enquèro , enquèro may
Diou , qu'èy jou bis ! qu'èy jou bis ! moun grand pay
Moun bièl gran pay que ma famillo entouro ,
Dins ma doulou , nou bezi quel : deja
Saouti sur el per lou poutouneja
Pel prumè cot , en m'embrassan , el plouro !
Qu'as à ploura ? perqué quita l'oustal ?
Perqué daycha de pichous que t'adoron ?
Oun bas , payri ? — Moun fil , à l'espital :
Acos achi que lous Jansemins moron
M'embrasso , et part en clucan sous 41s blus ;
Moun èl , loun-ten , lou sièt debat lous aoures.
Cinq jours apèy moun gran pay n'èro plus ;
Alor dounas en vòsti grand de message d’amour que n’an de besoun autant que li pichots enfant.
Vaqui, pèr aro es acaba. Pamens, vous doune rendès-vous la semano venènto pèr uno nouvello crounico. D’eici aqui, tenès-vous fièr e gaiard e avanças d’un pas lèri. Brave mounde, adessias !
Felip