LIS ERMAS DU 09 JUIN 2021 PAR FELIP REIG - LI BIÒU

15 juin 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mecredis à 6h00, 13h30, 19h00.

--------------------------------------------------------------------------------------------------

LI BIÒU AN TOURNA DINS LOU ROUND
Cars ami, lou bon-jour en tóuti. Aquest cop, li biòu an tourna dins lis areno dóu relarg. Verai, lis ai vist. Tout acò, lou devèn au travail achini e menimous dóu presidènt de la Federacioun Franceso de la Courso Camargenco, que ié dison Nicoulau Triol. N’ai faugu de discutido emé lis autourita, en coumençant pèr la Menistre de la Jouinesso e dis Esport. Ié falié defini e proumetre d’óuserva un proutoucole di mai serious. Es que l’afaire èro pas gagna quand couneissèn lou pople camarguen. Nautre, dins noste clube de biòu, lou Tridènt de Mandiuel avien ourganisa uno courso au mes de setèmbre 2020, crese. La resulto èro pas poulido emé de mounde sènso la masqueto, tóuti recampa davans la begudo. Li causo avien mau coumença tre la debuto. Emai se fuguessian estransina à pinta di tra au sòu pèr fin que lou mounde pousquèsson respeta li distanço avans que d’intra dins lis areno, à metre de riban rouge e blanc, de rubaliso coume se dis, de barriero e l’aurre, faguerian tóuti aquéli esfors pèr pas rèn en fin finalo. De-bado. Lou mounde voulien rintra pèr se retrouba dins l’ambianço di grand jour. Avian mes d’aficho de-pertout que i’avain escri lou proutoucole qu’èro de respeta. Aurié esta miéus d’escampa d’aigo dins un vióuloun. Èro tout-parié pèr la distanciacioun dins li bancau. Nicoulau rescountrè la prefèto tambèn e bono-di soun serious daverè lis autourisacioun pèr poudé prougrama de courso tourna-mai. Premié sènso mounde dins li bancau, pièi emé de mounde tourna-mai. Ansin qunt plasé de vèire li càrri desbarca de biòu is areno Jan Thibaud de Mandiuel ! Tre lou desbarcamen acaba, se sian recampa dins la salo pèr prene l’aperitiéu tóutis ensèn. Hòu ! de-segur emé mouderacioun… es à dire emé la mouderacioun camarguenco. Pamens lou maje plesi venguè quand fuguè poussible tourna-mai de lis escouta e lis óusserva aquéli manadié que counèisson tant de causo à respèt de soun mestié, di biòu, di chivau e dóu mounde de soun relarg. Es sèmpre un chale vertadié de li regarda emé si gèst famihié e soun biais de counta sis istòri. Quand arribon is areno, soun bravamen engimbra estènt que li jour de courso, se fau leva d’ouro pèr tria e encoucarda li bèsti. Li fau carga dins lou càrri e veni jusqu’is areno nostro. Un cop arriba, cargon un vèsti propre e se retrouban tóuti emé grand gau. En mai d’acò, lou mounde respoundeguèron presènt e nous coungoustavian de vèire que li bancau avien lèu fa de s’empli. Seguramen, li courso mancavon en tóuti. E coume un bonur arribo pas soulet, aquéu jour d’aqui avèn agu uno courso di bello. Li bèsti refusavon rèn is rasetaire que soun estrambord fasié gau de vèire. Nicoulau Triol, la patroun de la FFCC èro vengu vèire de qunt biais li causo se debanavon e aquest cop, tóuti avien decida de respeta li counsigno. Un miracle. Pèr pas que lou mounde se vènon agroumela davans la begudo, èro uno barrioto que passavo dins la contro-pisto pèr vèndre de bevèndo. Lou tèms èro siau e se sian proun regala. Pamens aguerian un bèl escaufèstre pèr lou darrié biòu dóu tantost. Camisard es lou noum d’aquéu biòu que venguè de si prat de Frànqui-vau mounte i’a la manado Martini. Pèr aquéli que counèisson aquelo manado sabon que li bèsti que n’en soun an tóuti ‘no bello estampaduro. Tre la debuto de la courso, i’avié d’espino à la merlusso : lou biòu espetè uno planche e coursejè lou jouine rasetaire Belkacem Benhammou. Lis enchèro decessavon pas de mounta pèr la premiero feicello e peraqui à ‘no minuto e miejo de la fin de sa courso, Camisard leissè ges de chanço au jouine Lucas Icard que fuguè retarda au moumen dóu rescontre e lou biòu arribavo à l‘aganta avans que lou jouine se pousquèsse evacua. Pèr éu, i’avié ges d’escampo. Camisard ié meteguè un cop de bano dins soun vèsti e lou mandè en l’èr qu’es pas de crèire. Urousamen lou rasetaire èro pas nafra, pamens l’endeman se n’en devié rapela d’aquéu turt e belèu que coumtavo pas si blau e si macaduro. Camisard voulié pas s’arresta ‘qui e quàuqui segoundo plus tard un autre joiune que ié dison Hedi Chebaïki leissè si braio sus li bano dòu biòu e tournè mita nus dins lou round pèr acaba la courso. Lou biòu, éu, rintrè encò siéu emé la segoundo feicello sus si bano. En fin finalo, èro uno represso di bello, li bèsti e lis ome an moustra soun envejo de ragala lou mounde. Emé de tàli courso, poudren vèire lou mounde tourna dins li bancau, belèu. E nàutri tóuti, lis afiha dóu clube, erian proun fièr d’agué buta à la rodo pèr acò. Basto qu’aquel esperit s’istalèsse pèr de bon. Aquelo courso es ja au noumbre d’evenimen majorau de l’annado. Soulide.
Vaqui, pèr aro es acaba. Pamens, vous doune rendès-vous la semano venènto pèr uno nouvello crounico. D’eici aqui, tenès-vous fièr e basto que lou tèms fuguèsse doucinèu. Brave mounde, adessias !
Felip