LIS ERMAS DU 12 MAI 2021 PAR FELIP REIG - LI SCIÈNCI COUGNITIVO 2

13 mai 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - 12 mai 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 12 mai 2021 par Felip Reig.

_______________________________________________________________________

Cars ami, la bono saludo en tóuti. Avèn parla i’a pas gaire de tèms di sciènci cougnitivo. Verai que lou darrié cop avèn tout-bèu-just durbi lou bahut de Pandoro e frega lou sujèt tant i’aurié un mouloun de causo de dire. Pamens, i’a quicon d’impourtant pèr ço que pertoco, l’aprendissage, poudrian meme dire touto formo d’aprendissage : es lou questiounamen, l’autò-questiounamen. Pèr miéus coumprene, vous prepause d’escouta uno persouno saberudo à respèt di sciènci cougnitivo que ié dison Matiéu Gagnon. Matiéu Gagnon nasquè au Quebèque, es dóutour en sicoulougìo, ensignaire en sicoulougìo e cercaire en sicoulougìà educaciounalo au Coulège « Nouvelles Frontières. Baio d’entre-signe en tóuti aquéli qu’estùdion. L’anan escouta, en francés, segur :  Mathieu Gagnon (en français).
De que nous diguè Matiéu Gagnon emé soun acènt agradiéu ? Diguè dos causo : premié que fau mescla li cous e pas segui lou chapitre un, pièi lou dousen, lou tresen etc. Diguè tambèn que fau entre-mescla li matèri. De-segur quand acò’s poussible. D’un autre las, nous diguè tambèn uno causo di mai impourtanto. Assajan de coumprene : quand sian à escouta un cous magistrau, acò revèn à recebre l’enfourmacioun, basto pièi de l’encouda e la metre dins sa memòri. Pièi quand avèn uno evaluacioun o un eisamen, reprenèn aquelo enformacioun e la restituïssèn. Pamens acò’s pas un aprendissage serious. Matiéu Gagnon nous dis que recebre l’enfourmacioun es tout-parié que quand nous dounon lou pèis e qu’es miéus de l’ana pesca se-meme. Adounc, l’aprendissage meiour es quand lis estudiant van querre l’enfourmacioun. Valènt-à-dire que se fau questiouna. L’autò-questionamen es lou biais meiour pèr aprene. Quand sian à escouta lou proufessour, fasèn intra dins la memòri l’enfourmacioun pèr la restituï après. Dins aquéu proucessus, i’a ges d’aprendissage.
Dóu meme biais, poudèn crèire qu’aprene es legi, escouta, endica, surligna, rensigna de ficho e que sabe encaro, iéu. E bèn, noun, aprene es pas ‘cò. Pèr dire lou verai, acò’s un biais de famiharita, uno ilusioun de mestrejo que soun efèt es pas qu’à court terme. Se famiharisa es pas pas coumprendre, vesès ? Pamens, en ié regachant de proche, de que se passo ? Legi, escouta, escriéure permet de prendre couneissènço dóu sabé. Acò vòu pas dire coumprendre, parai ? Pèr saupre s’avèn coumprés, se fau questiouna e aqui, segound li responso, se vèi s’avèn coumprés o noun. Adounc, legisse, escoute, acò me permet de prendre couneissènço dóu sabé. Pamens retene pas rèn d’acò. Me questioune e aqui retène quicon.
Quand sian davans un aprendissage, lou cervèu se pauso de questioun. Dounc, en seguido d’acò, douno de responso, d’ipoutèsi. Se la responso es justo, sian dins un circuit de recoumpènso. Se la responso es fausso, avèn un retour negatiéu e sian óubliga de verifica e belèu, d’ana querre la bono responso. Aqui, aprenèn quicon e i’a un aprendissage vertadié. I’a rèn à-n-acò, verai, rèn aurre. Adounc, i’a ges d’aprendissage sènso errour. Valènt-à-dire que l’esperiènci vèn di dèco e dis errour e la reüssido vèn de l’esperiènci. Adounc, lis errour fargon l’esperiènci, dounc la reüssido tambèn. Soulide ! Un darrié mot pèr dire que i’a peraqui Sieissanto-dous óutis qu’eisiston pèr baia d’ajudi is ensignaire, coume Quizlet, Anki, Socrative e l’aurre.
Vaqui, pèr aro es acaba. Pamens, vous doune rendès-vous la semano venènto pèr uno autro crounico. D’eici aqui, tenès-vous fièr e gaiard e avanças d’un pas lèri. Brave mounde, adessias !