LIS ERMAS DU 15 AVRIL 2020 PAR FELIP REIG - ENCARO LOU COUVIDE

21 septembre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 15 avril 2020 : ENCARO LOU COUVIDE

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 15 avril 2020 par Felip Reig.

Cars ami, bèn lou bon-jour en tóuti, basto qu’enduressias eisadamen lou counfinamen e que patiguessias
pas di coundicioun de vido atualo. Es de remarca qu’emai aquéu couvide aguèsse lèu fa d’aclapa
l’ecounoumìo moundialo, i’a quicon que bourroulè pas uno santo brigo, es la fe. Un cop de mai, l’esperit
venguè mai fort que la matèri. S’acò vous ramento rèn, Felip Martel sara pas countènt. Basto, Andriéu
Gide lou diguè dins Si le grain ne meurt : « L’homme produit plus avec son esprit qu’avec son corps ».
Franc d’acò, à bèlli fes, recebe de cascareleto raport i counsequènci de la situacioun que couneissèn vuei.
I’a de causo famouso. Pèr eisèmple, l’istòri d’uno famiho de dous enfant que soun counfina au siéu, que
Carle, lou paire, a escri soun journau de trencado que dedins i’a d’escri :
« Lèu lou pichot Pèire, lou fiéu de Jano e Carle apren que faudra faire si devé encò siéu pèr
courrespoundènci, vole dire emé l’ourdinatour. Adounc, tóuti sian counfina e à la debuto tout se debano
dóu miéus poussible. Ges de novo de la regènto - que voulès, fau de tèms pèr s’ourganisa -, lou matin au
jardin, aperitiéu en famiho à dina, jo dins lou tantost, lipitarié pèr lou gousta… brèu, li vacanço ! Tout anavo
charmant. L’endeman, premié toundage de la tepo de l’annado e es un chale vertadié de senti l’óudour
de l’erbo daiado, emé la greiado, li tulipo qu’espelisson e l’aurre. Nadon dins l’aigo roso. Lis enfant, Magali
e Pèire que jogon au baloun se carpinon, coume de coustumo… Ma fisto ! tout va siau. Au tresen jour, li
premié devé arribon. Pèire dèu revisa li divisioun e Magali fai pèr si gènt de dessin bèu que-noun-sai. Un
parèu de jour après, lou jardin es bèu coume à Versaio e Jano, a li man dins la farino e se fau ja mesfisa
dóu subre-pes pèr l’encauso di noumbrous rejauchoun. Lou papié es de manco à Magali e coustat di
divisioun, sian panca rendu. Brigo à brigo, lou tèms s’achavanis… Uno semaneto de counfinamen après,
Magali avié escracha tóuti li pouncho dis estilo-féutre e se lagno tout lou sanclame dóu jour e se Pèire
demando un cop de mai à soun paire, la diferènci entre lou divisour e lou dividènde, crese que ié fai manja
soun cahié. Mèfi ! la castagno tubo. Jano pièi alestis uno pastissarié roumano à la purèio de marroun e
de prunèu. Tout tourno plan. Pamens, uno deseno de jour après, Pèire coumpren pas rèn i divisioun e es
tardié d’uno semano pèr rèndre li devé e dis l’entrevau, lou Carle a boumi lou gatèu di marroun.
L’endeman, lou voungen jour, la bouito dis óutis es neto e lusènto e li clau bèn arenjado segound sa
grandour. Li martèu soun arreingueira tambèn dóu mai pichot au mai gros e Carle a tria tout ço que poudié
l’èstre dins l’oustau : li clau, li vis, li boutoun, li tacheto pèr coulour, tout i’es passa. Bèn talamen que sa
visto s’enneblavo. Pèr lou jour quatourgen dóu counfinamen, Pèire s’interesso au preterit. Carle vòu
escriéure au papo pèr canounisa la regènto. E Pèire escrièu : « Les enfants prenâmes le goûter sur la
terrasse ». Aqueste cop es segur Pèire aura jamai lou prémi Nobel de letro e Carle se bouto à pantaia
que se va marida emé la regènto. Vai dins soun garage pèr passa l’aspiradou e escouta Celino Dion.
Sabèn panca quau fasié lou mai de brut. Mentre que Magali regardo lou fenestroun de-longo. Jano, elo,
se bouto à faire uno pèço mountado de cinq estànci. Lou jour d’après, Carle vèi qu’a pres cinq kilò e la
pèço mountado toumbo pèr sòu. Dès-e-vue jour après, lou Carle estaco soun bout emé Dieu pèr lou
premié cop de sa vido ; es pèr veni gaga. L’endeman, Carle manjo la pajo dóu libre de counjuguesoun…
lou proublèmo dóu preterit es regla. La pichoto Magali se douno d’èr emé un couniéu qu’aurié la
meissoumatòsi mescla à-n-uno escoubo O’cedar. L’endeman encaro, sèmblo à Carle que pèto un ciéucle
que vèi passa dins lou prat darrié soun oustau la regènto que tèn à l’estaco soun Bescherelle. Un mes
après, Annado 3020, ges de farino dins li boutigo, Jano es assetado sus uno cadiero dins la cousino e
parlo au four. Pèire assajo de divisa lou preterit e Magali se coungousto davans lou fenestroun. Ai ! las,
reservo de pastaga es agoutado. Jour quaranten : fan de chichourlo, sian lou 38 d’abriéu 2028, avèn
remounta lou tèms… Mai quau es la pichoto assetado dins un caire de la cousino e que ricano ? Aro, es
uno masco que charro emé lou four que ié respond dins uno lengo que lou Carle counèis pas. Acò douno
la petarufo… Aqueste cop es la fin…
Jour cinquanten. S’es passa quaucarèn. I’a de mounde qu’arribon d’en-pertout pèr carriero. S’ausis « Es
acaba ! Es acaba ! » « Plus de counfinamen ! » Coumprene pas coume acò viro. Me rounse deforo.
Respire à plen póumoun e toumbe dins li poumo. Direicioun lis Urgènci.
Divèndre, 15 de mai, jour seissanten. Represo dóu travail. Magali, Pèire e Jano soun gaiard. La vido
vidanto tourno nourmalo, leva qu’ai de kilò en soubro, de diabèto, de coulesteròu e de treble de la
persounalita (moun double me parlo pas qu’au preterit e vòu divisa tout ço qu’es poussible). Pamens, sian
vivènt. Rendès-vous emé la siquiatre deman à 3 ouro e miejo dóu tantost…
E vaqui de qunt biais uno famiheto traversè la criso dóu couvide ! Souvète que fuguèsse mai eisa pèr
vàutro tóuti.
Anen ! n’en fau leissa un pau is autre e dóu cop, pèr aro, es acaba. Se voulès, se capiteren mai la semano
venènto e anan faire un cop de mai uno capelado di bello pèr aquéli que soun sus lou front pèr mena
batèsto. Li faudra pas óublida tre l’endeman quand tout tournara nourmau. Soulide que se n’en faudra
souveni après aquéu malastre. Osco ! à-n-éli. Vaqui, lou felip vous souvète proun courage e vous dise au
revèire. Brave mounde, adessias.


lou felip