LIS ERMAS DU 16 JUIN 2021 PAR FELIP REIG - SALINELLO

21 juin 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mecredis à 6h00, 13h30, 19h00.

--------------------------------------------------------------------------------------------------

SEGOUND RESCONTRE LITERÀRI DE SALINELLO

Cars ami, lou bon-jour en tóuti. Li segound rescontre literàri de Salinello se soun debana, bono-di lou testardige de Pau Martin e de l’Oustau literàri l’Aucèu Libre. Avian póu d’uno marrido nouvello au darrié moumen, pamens acò se pousquè faire. Ço meiour de reteni d’aquéli rescontre, ato ! pièi, de moun vejaire s’entèn, es l’ambianço d’aquéli retroubado. Verai, aguerian uno envirouno, perdounès-me lou neoulougousisme, dèuriéu dire uno ambianço di mai fraternalo. Erian tóuti urous de nous recampa tourna-mai pèr charra de literaturo e de dela. Aguerian la vesito de mounde de trìo : vendrié lèu mal-eisa d’assaja de n’en dreissa la tiero, pamens voudriéu cita Felip Martel e Marìo-Jano Verny, proufessour emerite à l’universita Pau Valery e escrivan, Jan-Ive Casanova, proufessour e escrivan emé Jan-Glaude Forêt, Jan-Lluis Lluis escrivan que venguè de Catalougno, Jan Ganhaire, escrivan limousi di grand, Joëlle Ginestet que parlè de Jan Bodon e soun libre Lo Libre dels Grands Jorns, Estello Ceccarini, escrivano elo tambèn, e perdounès-me de n’óublida. I’avié de sièsto pouëtico, de conte pèr lis enfant, de serado festivo e lou councèrt dóu group Coriandre e èro bèu de vièire lou mounde dansa. I’avié tambèn de mounde que s’ameriton forço d’èstre couneigu, coume Glaudia Feh especialisto di chivau e subre-que-tout dóu chivau de Przewalski que Glaudia a coumença d’introudurre tourna-mai en Moungoulió mounte avié despareigu completamen. Uno grando Damo. Anoliso Chevalier, especialisto de la Camargo, nous assabentè dóu sort d’aquelo encountrado preciouso e fragilo se fasèn pas mèfi, emai fuguèsse uno rode proutegi. Acò fasié lou liame entre culturo e lengo. I’a quicon que fuguè intéressant, es l’acamp dis editour de revisto que sabèn lou rôle essenciau d’aquéli revisto. Autour de Marìo-Jano Verny èron recampa li revisto Aquò d’Aquί, Lo Diari, la revisto Òc e Reclams. Avèn pièi agu lou grand bonur d’aculi Miquèu Feltin-Pallas de la revisto que ié dison L’Express. Miquèu es biarnés que charra sa lengo d’un biais agradiéu e nous mando cado semano sa letro à l’entour di lengo regiounalo. Es un soustèn tras-qu’impourtant encò di Franchimand jacoubin que pènso coume nautre que charra dins sa lengo es un dre elementàri que relèvo di dre de l’ome. Sabèn tóuti que i’a de grame à tria pèr faire respeta li lèi eisistanto. Coume la lèi à respèt di dre de l’enfant que dis qu’un enfant pòu grandi dins sa lengo. Acò’s escri, pamens de la soupo i bouco i’a de camin de faire. Lou soustèn de Miquéu es impourtant, mai lou devèn sousteni nautre tambèn, tóuti tant que sian. Nous lou diguè mant un cop dins la dimenchado :
-> Entre-visto Miquèu Feltin-Pallas.
Pèr baia de soustèn à-n-aquel ome, acò’s simple : basto de s’iscriéure pèr recebre sa letro semaniero. Pèr acó faire, n’i’a proun de pica sus google : Sur le bout des langues.
Adounc, dos bèlli journado à Salinello que poudèn dire nòsti gramaci à Pau Martin pèr soun obro de trìo e osco en tóuti lis autour e lis editour que nous ié venguèron regala e nous faire descurbi de tresor literàri.
Vaqui, pèr aro es acaba. Pamens, vous doune rendès-vous la semano venènto pèr uno nouvello crounico. D’eici aqui, tenès-vous fièr e basto que lou tèms fuguèsse doucinèu. Brave mounde, adessias !
Felip