LIS ERMAS DU 17 MARS 2021 PAR FELIP REIG - ISTÒRI DE LA COURSO CAMARGUENCO

18 mars 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - 10 Mars 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 17 Mars 2021 par Felip Reig.

_______________________________________________________________________

Cars ami, bèn lou bon-jour en tóuti. Se vous dise FFCC, en dequ’anas pensaemaquel acrounime ? Belèu
à la federacioun franceso de camping caravaning ? Noun. Alor bessai à la federacioun franceso de cyclocross. Re-noun. La FFCC es la Federacioun Franceso de la Courso Camarguenco. Aquelo federacioun
que fai lou liame entre li que soun afouga di tradicioun de bouvino e de roussatino e lou menistèri de la
Jouinesso e dis Esport. Pamens, l’istòri de la FFCC sourgentè dins li mas aluncha de Camargo à passatèms, tant sarié meme quand Berto fielavo. Es à saupre que la Counfrarié di Gardian nasquè en 1512.
Imaginas lou païs sóuvage que poudié’stre aquelo encountrado que ié dison vuei Camargo ! Lis gardobèsti, li ràfi e li pastre que travaiavon en Camargo rintravon pas souvènt encò siéu e belèu qu’èron
noumbrous aquéli que se levavon jamai dóu païs ounte travaiavon. Erian dins la pountannado di jo taurin
e encaro luen de la courso libro. Fauguè ‘spera qu’un arrestat pourtè qu’uno courso e un coumbat de biòu
fuguè ourganisa sus la baisso Sant-Michèu e fuguè pas un cas soulet à Marsiho. D’efèt acò tournè dous
cop, en 1775 e en 1819. Pamens i’avié ges de provo soulido pèr dire qu’acò venguè uno generalita. Aqui,
faudrié mena de recerco. La souleto causo que n’en sian segur, es que lou fenoumène de ço que venguè
la courso camarguenco nasquè en Arle, belèu pèr-ço-que aquelo vilo èro la mai proche de Camargo
mounte s’abalissié e s’abalis encaro vuei lou bióu negre. En parlant de la coulour negro, se gardaren de
faire s’endeveni semblanço e afihacioun entre d’espetacle que se debanèron çai e lai e dóu meme biais,
faren pas la coumparanço emé li vaco rabasseto d’Herens, en Souïsso que soun autant negro que li vaco
d’encò nostro.
Es de marca qu’aquéli vaco an forço temperamen e soun belicouso mai-que-mai. Acò ié douno la capacita
ereditàri de se batre e cade an, la meiouro es elegido « Rèino ». Pèr tourna à noste item, s’agoutara jamai
de dire tóuti li tentativo pèr ourganisa di jo taurin e emai l’istòri fuguèsse escricho, manco crudelamen
d’archivo cresablo. Pamens, se saup que li premié jo que poudèn ié dire « courso » fuguèron prepausa
au mounde quouro d’un biais improuvisa, quouro d’un biais ourganisa. Perdequé, de cop que i’avié faliéti improuvisa, estènt qu’èro miéus d’ourganisa d’espetacle pèr n’en poudé faire de proupagando e i’atraire
mai de mounde ? Rai ! pamens lou fa d’improuvisa permetié de davança l’intervencioun dis autourita
qu’aurien pouscu ‘nebi l’espetcale. Verai, li jo que meton en sceno d’animau an pas toujour agu la
benedicioun dóu poudé pouliti que siegue loucau vo naciounau e acò’s encaro mai verai aujoud’uei.
Aquelo oustileta dounè liò en de memouràblis afrountamen. Belèu qu’aquélis autourita ‘vien pas bèn fa la
mesuro dóu « Panem et circenses » e de soun poudé pèr mena li pople. De bèlli fes, galouia, afeciouna
pèr « la fe di biòu », lou mounde tenguèron targo is enebicioun e souvènti-fes saupeguèron impausa sa
chausido e afierma soun identita. Arribè meme que lis ourganisaire de courso tapèron sis auriho is
escoumenjo, is imprecacioun de la glèiso qu’ametié ges de councurrènci quand s’agissié de recampa lis
óuviho pèr lis óufice. En revenge, pretèndre qu’aquéu testardige es à l’óurigino de la courso camarguenco
sarié prene l’acourchi. Touto-fes, l’istòri nous dis que la brutaleta, la biestarisso envers lis animau aguè
coume counsquènci l’enebicioun d’aquéli divertimen. Ni pèr acò, se noto pas de lòngui roumpeduro dins
lou calendié dis espetacle taurin. De-segur, i’aguè d’acidènt, emé sèmpre li mémis efèt. Dins soun libre,
Andriéu Dupuy escriguè : « lou premié de mai 1883, dins uno courso, lou rasetaire Paulet Bartemiéu fuguè
tua. Lou prefèt, Moussu de Fersaint, taurophobe enrabia, escusas lou neoulougisme, enebiguè li courso
pendènt cinq ans de tèms. Pamens uno manifestacioun poupulàri levè l’interdit ». Fau dire qu’aquéu prefèt
finiguè pèr enebi tóuti li touroumachìo. Fuguè segui dóu prefèt Darcy qu’óuservè lou meme
coumpourtamen à respèt di courso, quand, en 1847, un autre rasetaire que ié disien Martin Chazal,
pecaire ! mouriguè souto li bano d’un biòu. Aqueste cop fuguè la revoulucioun de 1848 que permetié lou
retour di liberta. I’aguè forço àutris evenimen que s’acoumpagnèron de turt e d’afrountamen emé li forço
de l’ordre emé de barricado e de cop de fiò. Adounc, l’istòri de la courso camarguenco fuguè un long
flume, mai pas tranquille uno brigo. Pamens es légitime d’assoucia is enebicioun e autourisacioun la
persounalita dóu rèi, de l’emperaire, dóu presidènt o dóu prefèt, tant sarié meme la dóu maire de la vilo.
E fauguè espera li premiéri decenìo de la tresenco Republico, que soun tèms se debanè de setèmbre
1870 à juliet 1940, pèr vèire la fin di repressioun, emai i’aguèsse encaro de ràris eceipcioun. Es de nouta
que i’aguè dins lou despartamen de la Vau-Cluso, uno nouvelle enebicioun en 1886, pèr l’encauso de dos
persouno que fuguèron nafrado e d’uno autro qu’ai ! las fuguè tuado en pisto. De dramo, segur, mai que
pousquèron pas ‘moussa l’afougamen dóu publi. Se fau belèu metre dins lou countèste d’aquelo
tempourado estènt qu’es bon à saupre que i’avié pas soun-que li courso que dounavon souspicioun, mai
tambèn li carnavau pèr eisèmple. Vaqui, lou cop venènt sara question de D’Arbaud e Barouncèlli e de la
federacioun franceso de la courso camariguenco. Soulide.
Vaqui, pèr aro es acaba. Pamens, vous doune rendès-vous la semano venènto pèr la seguido d’aquelo
crounico. D’eici aqui, tenès-vous fièr e gaiard e basto que lou tèms fuguèsse doucinèu. Brave mounde,
adessias !