LIS ERMAS DU 19 MAI 2021 PAR FELIP REIG - L'ESTRE UMAN

20 mai 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mecredis à 6h00, 13h30, 19h00.

L'Estre Uman

--------------------------------------------------------------------------------------------------

L’ÈSTRE UMAN DINS TOUT ACÒ ?


Cars ami, la bono saludo en tóuti. E l’èsse uman dins aquel afaire de la couvido ? Es la questioun que me pause desempièi uno quingeno de mes o gaire se n’en manco, despièi que sian intra dins aquéu tèmple de la couvido. Lou fau bèn dire, aquelo esperiènci es l’evenimen moundiau, tant sarié meme un desfis maje, que ié fauguè teni targo e apoundre à-n-aquelo evidènci, qu’acò’s panca ‘caba. Uno autro causo qu’es un pau ma maire m’a fa, es que lou coumpourtamen dis èstre changè vertadieramen pendènt aquelo tempourado. Avès vist belèu coume la soucieta venguè vióulènto ? N’en fauguè pas mai que lou manco de papié pèr lou cagadou pèr nous chaupina la caravello e nous faire rena. Sian ja à nous dire que, bélèu, lou chanjamen de coumpourtamen sara duradis. Es-ti qu’acò aura de counsequènci sus noste biais de councebre, de parteja, de basti, de coumpara lis esperiènci e parla tambèn de ço que lou mounde souvèton e an de besoun ? Lou voulèn crèire e basto qu’acò se faguèsse souto lou signe de la soulidareta. Acò dépendra dóu biais que lou mounde, valènt-à-dire, li famiho e li maiun souciau respoundran. Poudèn pensa que dóu biais de viéure que couneissèn despièi mai d’un annado, n’en restara quicon dins l’après-couvido. Ato ! pièi, de l’après-couvido, n’en poudèn pantaia, aro, que li chifro fan la mostro d’uno tendènci encourajanto. Pamens, lis èstre au mitan d’aquéu malastre, de que van deveni ? E d’aquéli que faguèron sa despartido dins l’entre-vau. Se n’en parlara ? Faudrié que tóuti tant que sian se n’en ramentan toujour, nautre qu’avèn agu la chanço de passa pèr maio. E es tout-parié pèr li que soustènon un trin d’infèr pèr sougna lou mounde. Sarié mal-ounèste de lis óublida, de demembra lis esperfors que soun à faire sènso relàmbi, despièi de mes, pèr assaja d’aléuja lou charpin di famiho pertoucado pèr la malautié. La couvido nous baio de message que lou premié es de saupre qu’acò pòu tourna, es à dire que d’àutri persouno podon pourta de menaço invesiblo. Adounc, se ié fau prepara, pèr lis escolo, lou travail, li vacanço tambèn. Pèr faire en modo que fuguessian pas coustren de tourna faire targo i mémi proublèmo. Faudrié agué de toulerènci à respèt de counsigno. M’anas dire : « ounte vai aquel ome ? ». Pènse qu’en tout acò, ié fau chifra tre aro. La questioun que se pauso es la de la fisanço. De-segur, vendra tihous d’èstre tourna-mai proun fisançous. Aqui, i’a de grame à tria. Veiren, pamens faudra afourti aquelo fisanço. I’a pièi que sian esta fourça, au moumen de l’apougèu de la pandemìo, de passa dins un mounde virtuau pèr ço que pertoco lou travail, la counsoumacioun, la vido soucialo, li suen medicau, la fourmacioun e l’aurre. Es de prevèire que sarian tóuti dins la memo oulo e que lou mounde virtuau s’abrivara e prendra mai de plaço dins noste quoutidian. Adounc, fau pas faire d’alòngui pèr se famiharisa ‘m’aquéu biais de councebre nosto vido. I’a uno causo encaro, es que sara belèu mal-eisa pèr lou gouvèr de retrouba soun autourita. Aquelo questioun es ligado emé la de la fisanço. Lou gouvèr aura de faire jouga li grand ressort pèr fin que lou mounde óusservèsson un coumpourtamen couleitiéu que s’endevendra emé lis eisigènci dóu moumen. Acò’s pas gagna d’autant qu’aquelo autourita fuguè messo en chancello mant un cop.
Poudèn apoundre en tout acò lou proublèmo majourau dis estruturo de santa, vole dire dis espitau e sa capacita de recebre mai de mounde, estènt qu’avèn vist la falido d’aquest an. Verai, la santa venguè souto la formo d’uno proublematico ecounoumico, poulitico e estruturalo. Pas d’un biais sanitàri. D’efèt, quant de mounde veguèron soun ouperacioun remandado ? Lou fau bèn dire, un mouloun. N’i’a meme que soun esta rebuta de l’espitau, emai aguèsson besoun de suen urgènt. Mounte es l’interès pèr lis èstre aqui ? Pènse que faudra èstre lèst emé uno chourmo de medecin e de cercaire se fau, qu’aquesto cop, prenguerian lou bacèu en pleno caro.
Pèr acaba, faudra bessai tourna enventa la gestioun di desplaçamen, dóu counfinamen dóu mounde estènt que sian pas segur de pas li tourna viéure. La souleto certitudo es que sabèn pas grand causo à respèt d’aquelo babaroto que nous empouisouno la vido. Avèn encaro forço causo d’aprene dóu courounavirus. Pamens, l’avèn vist, aquelo malautié es uno vertadiero tempèsto pour lis èstre uman que li fau sèmpre óusserva coume l’óujeitiéu essenciau, que que siegue la situacioun. Es à dire que fau leissa lis èstre au cèntre dis interès. Soulide.
Vaqui, pèr aro es acaba. Pamens, vous doune rendès-vous la semano venènto pèr uno autro crounico. D’eici aqui, tenès-vous fièr e gaiard e avanças d’un pas lèri. Brave mounde, adessias !
Felip