Lis Ermas du 23 juin 2021 par Felip Reig sur Radio Nîmes - LOU PAIRE PÈIRE CAUSSE

28 juin 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mecredis à 6h00, 13h30, 19h00.

--------------------------------------------------------------------------------------------------

LOU PAIRE PÈIRE CAUSSE
Cars ami, lou bon-jour en tóuti. En 1921, i’aguè entre autre evenimen impourtant, n’en counvène qu’èron pas li soulet, dous evenimen que nous pertocon vuei. Premié, la levado di fèrri de la Nacioun de Bouvino que i’avian ja counsacra un parèu de crounico, e la neissènço de Pèire Causse qu’èro pèr veni membre de la Coungregacioun de la Messioun Lazaristo, Majourau dóu Felibrige ‘mé la Cigalo de Buzet o de l’Agout e óumouinié naciounau di Bóumian. Pèr sis ami, lou Paire Causse sabié baia de recounfort e d’ajudo à-n-aquéli qu’avien de besoun. Èro un grand umaniste. Quàuqui persouno anounime que se soun recampa souto lou noum d’Association Souvenir Pierre Causse, vouguèron ié rèndre l’óumage que s’ameritavo. De manifestacioun que se debanèron à Lunèu, Salinello s’esperlounguèron à Nosto-Damo de Primo-Coumbo, qu’es un rode mounte venon de roumiéu, proche Fountanés de Gard s’esperloungaran à la fin de l’annado à Lunèu.
Pèire Causse nasquè lou 23 de janvié 1921 à Lunèu. Manjavo dins si trege an, èro en 1934, que rintrè à l’Escolo apoustoulico de Primo-Coumbo. En 1937, entre que li Felibre faguèron soun roumavage à Primo-Coumbo, Pèire Causse faguè lou rescontre de Louïs Abric que venguè felibre majourau emé la Cigalo de Roussihoun en 1936, Anfos Arnaud, éu, qu’èro Capitàni de la Nacioun Gardiano e que fuguè elegi felibre majourau en 1934 emé la Cigalo de la Mar e l’abat Jóusè Salvat, felibre majourau en 1927 emé la Cigalo de Buzet o de l’Agout. Pèire Causse integrè lou seminàri de Primo-Coumbo e en 1948 fuguè ourdouna prèire pèr Mounsegnour Matiéu à Nosto-Damo dóu Poui à Das dins lou despartamen di Pirenèu Óucidentau. Lou ministèri religious dóu Paire Causse prenguè d’envanc la memo annado de 1948 quand fuguè nouma père rejougne lou Paire Gibert à Toulouso emé la toco d’oubra pèr de messioun parrouquialo. Uno amista soulido s’establiguè lèu entre lis dous prèire. Coume s’entendien bèn, l’Archivesque de z-Ais-de-Prouvènço demandè is dous prèire de veni lis animatour religious dóu roumavage di Sànti-Marìo-de-la-Mar. En 1962, lou Paire Causse rejougneguè l’Oustau de la Tourre-Santo de Marsiho e dins lis annado 1968-69, la glèiso fisè au Paire Causse uno messioun au grand Seminàri de Mount-Pelié. Ai ! las, lou Paire Gibert defuntè en 1969 de la malautié. Li dous Prèire faguèron soun intrado à l’Escolo apoustoulico de Primo-Coumbo ensèn quand èron encaro de jouìni garçoun e lou Paire Gibert aguè lèu fa de prene uno plaço grandarasso dins lou cor e l’esperit dóu Paire Causse e tóuti dous veguèron soun amo s’espandi à l’aflat de sa fe religiouso, en pantaiant de veni prèire un jour à soun tour, ço que fuguè fa dins uno poulido coumpliceta. Pièi, après que subre-mountèsse un crèbo-cor, en 1973, lou Paire Causse veguè la Cigalo de Buzet o de l’Agout se pausa sus soun pitre à la seguido de Jóusè Salvat que mouriguè lou 29 de desèmbre 1972.
En 1976, lou Paire Causse afouga de lengo prouvençalo publiquè uno « Messo en lengo nostro », pièi, lou « Missau e rituau en lengo nostro » tambèn. L’interès que dounavo is èsse uman lou faguè nouma Óumouinié di Bóumian de 1977 à 1983. Diguè de messo en prouvençau pèr la Nacioun Gardian pendènt mai de cinquanto an. Escriguè pièi d’obro en prouvençau, emé la fiho de soun ami Andriéu Sauveplane pèr lou libre que soun titre es Sansogno. En 2008, arrestè sis ativeta e se retirè à l’Oustau de retirado Sant-Vincèn-de-Pau à Mount-Ouliéu. Partiguè pèr li Camp d’Alis en 2008. En 2009, fuguè lou Paire Miquèu Desplanches que recebè sa Cigalo de Buzet o de l’Agout à Seloun-de-Crau. Vuei lou Paire Desplanches es Vicàri principau de l’Archevesque de z-Ais e d’Arle, Mousegnour Cristòu Dufour. Adounc, aquelo colo d’anounime de Lunèu rendeguè un óumage di bèu au Paire Causse e avèn viscu em’éli uno journado inóublidablo à Primo-Coumbo tóutis ensèn. D’ùni que lou couneiguèron nous countèron quàuquis aneidoto que fan la mostro dóu Crestian e dóu bon-vivènt qu’èro lou Paire Causse que tenié soun amour pèr la lengo d’o de si gènt qu’èron de viticultour que charravon en lengo, proche di gardian, di pouèto, di gènt de la Terro. Legiguè Lou Flourilège de la Nacioun gardiano, Mirèio e intrè au Felibrige, sèmpre en faire lou liame entre la culturo nostro e sa fe religiouso imbrandablo, afouga dòu bèu e dóu verai. Troubavo, e lou disié, que l’obro mistralenco èro pastado d’aquel amour universau e acò bastavo pèr ié pourgi de bonur. Óublidè jamai dins sa vido touto sa fe de lazaristo que farguè sa persounalita. I’aurié tant de bèlli causo de dire encaro à respèt dóu bèu Paire Pèire Causse. N’en poudèn trouba dins lou libre que la colo d’Ami an escri. Basto de lou demanda à Jan-Pèire Sabatier au numerò de telefounet : 04 67 83 35 39. Soulide.
Vaqui, pèr aro es acaba. Pamens, vous doune rendès-vous la semano venènto pèr uno nouvello crounico. D’eici aqui, tenès-vous fièr e basto que lou tèms fuguèsse doucinèu. Brave mounde, adessias !
Felip