LIS ERMAS DU 23 MARS 2021 PAR FELIP REIG - ISTÒRI DE LA COURSO CAMARGUENCO 2

24 mars 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - 23 Mars 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 23 Mars 2021 par Felip Reig.

_______________________________________________________________________

Cars ami, bèn lou bon-jour en tóuti. Lou darrié cop, nous erian aplanta à la fin dóu siècle XIXen e avian coumprés que li tradicioun de bouvino rescountrèron d’empacho pèr óuteni l’autourisacioun dis autourita. Pamens, segur, lou marcage di vedèu e di vaqueto èron l’escasènço de recampa de mounde que baiavon d’ajudo au pelot e i gardo-bèsti. Lou bistournage tambèn. Aquéli biais de faire soun toujour estado de pratico pastouralo que, de dela de sa finalita zououteinico aguèron lèu fa d’avé un caractère festiéu e rituau.
Acò empachè pas que li premié rasetaire que toumbèron souto li bano di biòu meteguèron en chancello li maire e li prefèt pèr douna sa benedicioun en aquélis espetacle. Ni pèr acò, peraqui en 1880, la courso venguè un mejan de creé de liame entre lis estajant en afourtissènt soun identita. Enant d’aqui, lo jo venguè lèu uno coumpeticioun. Pèr gagna, falié leva uno coucardo pegado sus lou biòu qu’èro sié un riban vermihoun, sié un disque de cartoun cubert de riban. Aquéli rescontre se fasien dins de round de carreto engimbra à touto zuerto e lis ourganisaire emplegavon de besougno de touto meno pèr n’en faire de barricado. Li rasetaire que levavon la coucardo èron paga premié en naturo. Pamens li primo fuguèron pagado en espèci entre 1862 e 1865, ço que fai la mostro que l’interessamen venguè d’ouro dins l’istòri de la courso. À cha pau, la courso s’ourganisè. De miroundello fasien de proupagando pèr lis espetacle e meteguèron de noum sus li biòu que venguèron sèmpre mai agressiéu e acò pimpanejavo li courso. Un crouchet faguè soun aparicioun pèr baia d’ajudo i rasetaire pèr leva, valènt-à-dire croucheta lis atribut de la tèsto dóu biòu. Aqui erian proche dóu siècle vinten. Alor, lou fau dire et tourna dire. Se la courso camarguenco espeliguè vertadieramen, es bono-di d’ome coume Folcò de Barouncèlli, marqués de Javon e Jóusè d’Arbaud. Aguèron la chanço de gagna lou soustèn de l’Auto soucieta avignounenco que ié marquè soun respèt. À la debuto dóu siècle vinten, Barouncèlli seguiguè li fèsto d’Arle beilejado pèr Frederi Mistral. Quatecant fuguè apassiouna e lou diguè au Mèstre. Se saup que Mistral anavo pas souvènt en Camargo qu’èro un rode aluncha de Maiano, sóuvage e qu’i’avié pas forço routo pèr i’ana. Mistral fisè l’endevenidou de tradicioun de bouvino au marqués. Soun amista reciproco s’èro afourtido dóu tèms de l’Aiòli, lou journau qu’anavo cremant tres cop pèr mes. Èro estampa au palais dóu Roure. Lou marqués vouguè assoucia li gardian i fèsto arlatenco. Pèr acò faire, creè lou Coumitat vierginen en 1904 que venguè la Nacioun Gardiano lou sege de setèmbre 1909. La manado dóu marqués èro au mas de l’Amarèu, i Sànti-Marìo-de-la-Mar. Jóusè d’Arbaud venguè manadié à soun tour. De courso fuguèron ourganisado e balin-balan li tradicioun se meteguèron en plaço. Lou marqués anavo dins li vilage pèr ié faire d’abrivado. Brigo à brigo, li tradicioun de bouvino se mesclèron i fèsto dóu coustume.
Ço segur, es qu’un acamp se debanè en Arle en 1912 que la decisioun ié fuguè preso de ramplaça lou premié crouchet pèr un qu’avié mant uno branco. Poudèn dire qu’aquéu crouchet fuguè l’antecessour dóu crouchet atuau. Dins aquelo istòri, se fau rapela que la premiero courrida se debanè en Franço, à Baiouno, au mes d’avoust en 1853, souto l’aflat de l’emperaire Napouleoun Tres que l’avié facho ourganisa pèr soun espouso Èugenìo de Montijo. Dès an après uno courrida fuguè ourganisado à Nime. Pèr tourna à noste item, la courso camarguenco, poudèn afierma que li pajo li mai bello de l’istòri de la courso camarguenco fuguèron escricho, après la premiero guerro, pèr de biòu coucardié coume Lou Sanglié e pèr de rasetaire que ié disien Julian Rey, un bèu-cairen de la bono e pèr lou carrat d’As tambèn emé Rougié Pascal, Francis Sant Juan, Francés Canto e lou grand rasetaire Andriéu Soler que lou pintre camarguen Jan Marignan ié faguè soun estatuo que se trobo dins lou vilage d’Auriho, entre Mouriès e Eiguiero. À-n-aquelo tiero de noum ié fau apoundre lou de Manolo Falomir qu’aurié pouscu èstre emé la colo de Dede Soler s’aguèsse pas ‘gu un marrit caratère. Lou mounde de la bouvino venguè impourtant emé de noum coume lou de Pau Laurent, escais-nouma lou Papo de la bouvino. Es éu que beilejè lou carrat d’As. D’aquelo pountannado, arribavo que li rasetaire fasien tres courso dins la journado. I’avié tambèn Fanfouno Guillierme, la Grando Damo de Camargo emé sou capelas negre que quand intravo dins uno areno mounte que siegue, lou mounde se levavon en signe de respèt. I’aguè pièi d’assai pèr ourganisa de courrida ‘mé de biòu de Camargo. Pamens emai lou mounde tournèsson lèu à la raço dóu biòu de Camargo, la questioun se pausè pèr ço qu’es dóu crèis di capitau, es à dire en francés les cheptels, un crèis que s’óupausavo à la demenucioun di terro cultivablo. À la mita dis annado vuetanto, se recensavo vuetanto manado e douge milo bèsti. D’aquelo pountannado, la rentableta èro l’óujeitiéu de dela dóu fatour culturau. Es poussible que la courrida ja en plaço aguèsse ispira lou bandimen di jo camarguen emé la toco de rèndre lèu li jo lou mai esteti poussible pèr rejougne l’espetacle tras-que bèn mes en sceno de la courrida. L’entervencioun di biòu de Camargo en presènci di rasetaire arribè plus tard dins un espetacle que ié disien la courso libro. Pamens, un code èro pèr arriba pèr faire de la courso libro, ço qu’èro pèr veni la courso camarguenco.
Vaqui, pèr aro es acaba. Pamens, vous doune rendès-vous la semano venènto pèr la seguido d’aquelo crounico emé la fédéracioun franceso de la courso camarguenco. D’eici aqui, tenès-vous fièr e gaiard e basto que lou tèms fuguèsse doucinèu. Brave mounde, adessias !