LIS ERMAS DU 23 SEPTEMBRE 2020 PAR FELIP REIG - KENVIN BRUGUIERE

24 septembre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 23 SEPTEMBRE 2020 : KENVIN BRUGUIERE

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 23 SEPTEMBRE 2020 par Felip Reig.

Cars ami, brave mounde, bèn lou bon-jour en tóuti. Vuei, avèn mes un riban negre à la crounico en lengo. D’efèt, vous vau parla d’un acidènt dramati mai-que-mai. Noun, parlarai pas dóu mounde que dins la darriero dimenchado soun esta nega pèr l’encauso d’un cèu en coulèro. Verai, mentre qu’ère espoumpi dins moun fautuei, de famiho qu’avien tout perdu en quàuqui minuto èron atravalido pèr assaja de sauva quàuqui besougno dóu naufrage. Es la provo soulido que la vióulènci es de pertout e vèn d’en pertout. Meme dins nòstis areno e malurousamen dins lou cor dóu mounde qu’emai que sachèsson pas de que viro, acò lis empacho pas d’escupi soun veirin sus la telaragno. Vole parla de l’acidènt que se debanè dins lou round de Valabrego e que faguè passa de la vido au noun-rèn un jouvenome de vint-e-tres an, afouga de courso camarguenco. Vole parla d’un garçoun que voulié counsacra sa vido i tradicioun de bouvino e que ié disien Kevin Bruguière. Après uno pountannado que traversère anequeli pèr uno ouperacioun, me vouguère entourna is areno, viéure un moumen de tradicioun. Chausiguère lou vilajoun gardesen de Valabrego estènt que lou presidènt dóu Mamai que ié dison Jouèl Dijon, es un ami de la bono que beilejo aquéu clube de biòu qu’a mai de nounanto an. Vouliéu ounoura soun travail en ié rendre uno vesito. Arribère à Valabrego un brigoun tardié e tre arriba, veguère lou mounde deforo. Me diguère dintre iéu qu’en fin finalo ère tras-que tardié e qu’èro l’ouro de l’entracte, em’acò, pas mai. Lou tèms de parqueja la veituro, me gandiguère pièi vers l’areno. Veguère pas que de mounde de la caro entristesido. Subran, un camioun de poumpié arribè coume uno ballo de fusiéu. Uno dono qu’èro aqui me baiè lis entre-signe e me diguè qu’un jouine rasetaire venié d’èstre nafra gravamen. En fin finalo fuguè traspourta à l’enfiermarié dis areno pèr ié reçaupre li premié suen. Aqui lou manège di secouristo, di mege e alia durè un tèms infini. L’elicoutère qu’ère arriba dins l’entrevau esperè à l’estade lou jouvenome. Pamens veguère lou mege dis areno ié faire de massage cardia pendènt de lòngui minuto. Un marrit sentimen m’envahiguè l’esperit… Après mai de dos ouro, enfin, Kevin fuguè evacua emé l’elicoutèri. Passave un parèu de minuto pèr agacha la caro de secouristo ; ié legiguère pas qu’uno marido impressioun. Ère atterra, esterni, coume l’èro tambèn lou presidènt de la Federacioun Franceso de la Courso Camarguenco, Micoulau Triol. Un parèu d’ouro plus tard, que m’ère entourna au miéu, reçaupeguère lou message que cregniéu : Kevin èro mort. L’afaire èro terrible pèr la famiho de Kevin e sis ami. Lou mounde de Camargo avien l’amarun sus li labro. Mai, vai-ti pas qu’un parèu de jour après lou dramo, uno bando de nèsci inoudèron li maiun souciau de bestige e de prepaus meichant que-noun-sai, escupissènt sa counarié, escusas-me pèr lou mot. Verai, èro ja un dramo counsiderable, alor, perdequé i’apoundre lou couiounige e lou meichantige ? Pamens avès remarca coume la vióulènci se desvouloupo despièi la fin dóu counfinamen ? D’acò, se n’en parlo en-liò, coume s’erian dins un mounde de bisounours. Pamens, lou mau es ancra dins nosto soucieta e degun demié li persouno que poudrien faire agi li grand ressort boulego lou nanet. Es ja malurous d’agué de viéure emé aquelo babaroto que nous empouisouno la vido, fau encaro ié metre de vióulènci au mitan. Aquéu fenoumène nasquè pas ièr, acò’s verai. Ço grèu es que la vióulènci es toumbado dins lou coumun. O, lou sabe, despièi que lou mounde es mounde, l’ome a pas qu’uno souleto idèio en tèste, es d’èstre superiour à soun vesin. De toustèms l’ome se mostro un vertadié cóupourtaire de malur. Pamens, à L’ouro d’aro, sian assabenta di causo e sian toujours autant couioun, nautre qu’avèn pas coumprés la manipulacioun e l’engano. Pènse que sarié tèms de se boulega li nèurone, de chifra sènso teni comte de ço que se dis dins lou fenestroun o dins li journau. De qu’anan gagna à semena lou mau ? Li plasé de la vido soun simple d’óuteni. Coumprene plus rèn dins l’èsse uman. Micoulau Triol noun plus. Es pèr acò que lou patroun de la Federacioun Franceso de la Courso Camarguenco pourtè sa denóuncio. Es de se demanda mounte es passa lou respèt dóu jouine Kevin e de sa famiheto. Urousamen, sa despartido acampavo forço mounde respetuous e reculi. Ié devèn acò à-n-aquéu jouine qu’un biòu negre ié levè la vido. Lou fau pas óublida. Lou malur a besoun de degun pèr aparèisse. Alor quand i’a ges de malur, es pas que de bonur. Soulide.
Vaqui, aro vous doune rendès-vous la semano venènto. Lou felip vous souvète uno semano bi bono
e vous lou tourne à dire : basto, que lou tèms fuguèsse doucinèu. Brave mounde, adessias.
lou felip