LIS ERMAS DU 24 JUIN 2020 PAR FELIP REIG - LA COUVIDO

21 septembre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 24 JUIN 2020 : LA COUVIDO

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 24 JUIN 2020 par Felip Reig.

Cars ami, brave mounde, bèn lou bon-jour en tóuti. Se trobo qu’aviéu demanda is escoulan de nòstis escolo
de lengo de manda de tèste pèr dire soun sentiment à l’entour de ço que nous arribavo au moumen dóu
counfinamen. Avèn recebu de poulìdi causo que vous n’aviéu presenta en escapouloun tras un tèste de nosto
amigo Gileto Guichard de Sant-Gile e vuei es l’ami Jan-Pèire Ode que ié dison tambèn Plumeto, un Bèu-cairen
de la bono que nous a manda un tèste sus la pòu. Adounc, coumo vous l’aviéu di i’a quàuqui jour, anan parla
de la pòu. Veici à quicon proche ço que Jan-Pèire Plumeto escriguè en parlant de la couvido : « Chasque jour
a carreja soun fai de misèri e de desoulacioun. Lis autourita sanitàri en moustrant si limito an mes lou pople en
bourreladis ». Alor iéu, pènse pamens que soun pas lis autourita sanitàri que faguèron acò, mai pulèu li catau
de la poulitico que parlèron de quicon que mestrejavon pas brigo. La criso èro, e es encaro, uno criso sanitàri
e pas uno criso poulitico. De-segur aquelo criso venguè lèu uno criso ecounoumico. Poudèn pas manda la
pèiro à-n-aquéli que coumprenien pas ço qu’arribavo. Ato ! pièi, degun coumprenié que que siegue à respèt
d’aquel auvàri nouvelàri. À la debuto, semblavo meme qu’acò’ro lou camin d’en-liò. Part acò, siéu pas segur
que i’aguèsse forço mounde que coumprenien grand causo à l’afaire, leva de quàuquis-un qu’an pas lou dre
de dire soun franc-valentin. Pèr quant à la pòu, l’ami Plumeto apound : « Pòu pèr éli-meme e si gènt, aqui parlo
dóu mounde di service sanitàri, pòu de rèn saché faire en despié di counsigno, pòu di marìdi nouvello
qu’aguarisson de-countùni entre dos cansouneto li bravi gènt e pòu de l’escapado dóu virus di labouratòri
chinés qui n’i’a que cridon au coumplot, pòu enfin d’uno guerro gigantasso entre li nacioun que d’ùni que i’a,
coumo lou Trump empuro sènso relàmbi lou fougau de la discordo ». Verai que siéu souvènti-fes à me pausa
la questioun coumo faguèron lis american pèr pas trouba demié tres-cènt milioun d’estajant un ome vo uno
femo mens couioun que lou que chausiguèron ? Acò rèsto un mistèri pèr iéu. Basto, es de bon que la pòu
s’istalavo dins lis esperit estènt que forço mounde pecaire ! faguèron sa despartido. Vuei, belèu que se n’en
saup un pau mai. Pèr eisèmple semblarié segur que la couvido prenguèsse un pau de repaus. Pamens quau
saup coumo acò virara au mes d’óutobre ? D’acò se n’en parlo en-liò. Avèn lou tèms pèr li marìdi novo. Tout
acò pèr dire que Plumeto, moun ami Jan-Pèire escriguè dins sou tèste : « Dins aquéu bourroulamen, es ja de
cregne que la guerro se faguèsse entre nàutri, que li banlègo n’en fan la mostro mant uno fès de l’anarquìo
que segnourejo dins li cantoun li mai miserable. Pènse que despièi de decenìo li gouvèr que que siegon an
jamai sachu redurre lis inegalita, nimai restrègne li catau de la finanço. Lou tèms se pensavon, fara soun obro
e li mai rascassin mouriran. Pamens, acò’s óublida que li rascassin de vuèi s’acampon, s’aboulegon e se fan
entèndre dins un chafaret qu’es pas de dire. Li maiun souciau i’apoundon soun biais mouderne de s’espremi,
de fes que i’a, d’un biais triviau, pas toujour à la règlo gramaticalo de sa lengo. Pèr prene l’acourchi, diren que
la counsciènçi, la resoun, l’esperit, valour d’aquéli que soun li mai sena, de quente coustat que vengue a de
peno pèr se faire entèndre. La póu, pèr tourna sus lou sujèt, de toustèms es presènto e s’esperloungo sènso
fin ». E Plumeto, emé sa sapiènci nous dis encaro : « lou mounde regardon desenant pas plus liuen que son
embouligo e se garçon de son vesin emai aguèsse besoun d’ajudo. Cadun sa virado, li fedo saran bèn
gardado ! Es d’aquéu biais que sian dins lou bourboui ! Qu’es mai un clouaco, uno sueio que d’ùni que i’a
cresien que lou mounde mouderne carrejarié tóuti li privadié coungreiado pèr lou sistèmo benfasènt e bènvoulènt dóu libéralisme. Ai ! las ». Ah ! verai, lou Plumeto es en enferouna. Fau dire que Plumeto amo pas
l’injustiço. Dóu cop, prene plesi de vous n’en faire counèisse encaro un pichot tros avans que la campano tinto
e Plumeto parlo : « Tóuti aquéli counsumaire noun se doutavon dóu desastre qu’èro pèr espeli, tant pèr
l’ecoulougìo que pèr li valour filousoufico que van en desbrando. Subran lou castèu que cresien imbrandable
s’afoundrè. Lou pople counsciènt de la fragileta de soun eisistènçi prèn pòu. Pòu de tout. De se passeja pèr
carriero, d’èstre agarri dins soun pavihoun, di veituro que crèmon, di boujarroun en cavalo e l’aurre. La pòu
nous talouno tambèn e metèn de camera de pertout. Adounc, lou descounfinamen, en fin finalo, es pas
eisatamen la liberta ». E l’ami Plumeto cito Hugo : « le plus grand ennui c’est d’exister sans vie. » E pèr acaba
emé Plumeto : « Vaqui, lou crèse, ounte nous meno la counsigno à grand tarabast televisuau, quand lis esperit
se soun gasta, que li voues se soun amoussado dins un païs que ié disien ʹʹdes lumièresʹʹ. I’a forço tèms
qu’aquéli lume esbrihaudon pas mai que li calèu d’antan. E noun, la pòu, n’en sian pas sourti encaro ». Gramaci
Plumeto e sènso vergougno e sènso pòu, aproufichen dóu soulèu de la lus emé aquéli que lis aman e turten
lou got en touto amista en longo-mai !
Anen ! n’ai proun di e aro, es acaba. Se voulès, se capiteren mai la semano venènto. Lou felip vous souvète
uno semano de requisto e basto, que lou tèms fuguèsse doucinèu. Brave mounde, adessias.