LIS ERMAS DU 26 MAI 2021 PAR FELIP REIG - FOUTBOL

27 mai 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mecredis à 6h00, 13h30, 19h00.

--------------------------------------------------------------------------------------------------

FOUTBOL


Cars ami, la bono saludo en tóuti. Devinas un pau lou sujè 5t de vosto crounico de vuei. Vous pode tout-bèu-just dire qu’es liga à l’atualita. Li salo de cinema e li cafè que tournèron durbi si porto au mounde ? Noun. Lis eleicioun despartementalo e regiounalo ? Pas mai. Lou maridage de TF1 e M6 ? Noun plus. La Feria nimesenco dóu mes de jun ? Nenni. La lèi Molac que dous article soun esta rebuta ? Emai s’ameritèsse de n’en parla, es pas ‘cò. Encaro que pèr la lengo crese que fau dis ate e pas di mot. La courso camarguenco qu’es pèr tourna dins lis areno dóu relarg ? Intéressant e impourtant, pamens es encaro noun. Avès proun manja de favo ? Karim Benzéma que pren tourna-mai sa plaço dins la chourmo naciounalo de foutbol ? Acò caufo, pamens es panca lou sujèt. Alor vous lou vau dire : anan parla de foutbol e de Nime Oulimpico. Acò’s de marca dins lou calendié estènt que de foutbol, vous n’en parlarai pas cado semano. Es pas lou foutbol que m’interesso gaire, sarié pulèu li jougaire e soun coumpourtamen. Pamens, me ramento dóu dilun dès-e-sèt de mars que legiguère dins lou journau : « C’est fini ! », es à dire « aquest cop, es acaba ». E o, parle de Nime Oulimpico, lou clube de foutbol nimesen. Lioun ié leissa ges de chanço i foutboulaire gardés e Rèno pas mai pèr lou darrié rescontre. Dóu cop, es la falido, la toumbado, la davalado, la catastrofo. Ansin, i’a pas mai de tres annado que li croucò s’èron leva de la Ligo dos e ié van tourna un cop de mai. Vole pas pourta de jujamen sus acò estènt qu’ai pas segui la sesoun. Ni pèr acò me rejouïsse pas d’aquelo resulto. Pamens, se saup qu’uno relegacioun es pas quicon de forço grèu s’es pas de durado. Se duro pas vint-e-cinq an coume lou darrié cop. Sabe ço que represènto aquéu clube pèr la vilo de Nime. Un clube que soun istòri es ligado à la de la vilo emé de grand noum que faguèron ounour à-n-aquel esport e à-n-aquéu clube. Jan Orsi, belèu qu’acò vous parlo, noun ? Qu’escriguè l’istòri de Nime Oulimpico. N’i’a que lou counèisson bèn à la radiò. Ai viscu dóu tèms de télé Bleu de rescontre que poudien filma en aquelo tempourado e me ramente bèn l’ambianço que i’avié à l’estade Jan Bouin. Cade rescontre èro uno fèsto qu’es pas de crèire e se parlè pas de racisme nimai de que que siegue. N’i’a que passèron sa vido touto à baia soun soustèn à la chourmo di croucò. Vuei, pèr ço qu’es de l’ambianço, es de figo d’un autre panié. Lou cèu larguè d’enclume sus lou su di foutboulaire, de supourtaire e di salaria. D’efèt, fau apoundre au proublèmo espourtiéu, lou proublèmo pecuniàri, estènt que lou presidènt dóu clube que ié dison Rani Assaf parlo de depausa lou bilans e de leissa lou clube emé soun déute. Lou 22 de mai passa, lou journau anóuncié : « Assaf es proche de parti : la boumbo ! » Tout d’uno pensave is vuetanto salaria que se gagnon la vido au clube. Sènso quaucun pèr reprene l’empento, sarié uno davalado majouralo. Alor me boutave pièi à pensa i supourtaire tambèn, i supporters coume se dis en franglés. Éli, pèr un cop an bèn reagi e an assegura de demoura fidèu à soun clube. Emai Nime fuguèsse desclassa en CFA2, soun decida à countinua d’ana baia soun soustèn. Es bèu acò, noun ? Pèr l’ouro Assaf a pas counfierma sa decisioun de se leva dóu clube. Se rèsto, fau metre mai de dès milioun d’éurò sus la taulo. Sarié miéus la ligo dos que de descèndre is infèr. Pènse qu’aquel ome a ‘no repounsableta dins la situacioun atualo e pòu pas vira l’esquino coume acò. Sabèn tóuti qu’es l’argènt que coumando. L’ounour e lou sens dóu devé passon après. Alor tout es poussible. Jan-Pau Fournier, lou maire de Nime, éu, fai la sourdo auriho : « Que se desmerdon, diguè, es pas moun afaire. Es uno soucieta privado ». Fin de citacioun. Diguè pas parié pèr baia d’ajudo au mèstre de la courrida, Simoun Casas que beilejo, éu tambèn, uno soucieta privado. Es verai qu’aqui s’agis de cènt-vint-e-quatre-milo éurò, pas de dès milioun. Es pas i nimesen de paga tambèn. Alor, n’en sabèn pas mai, aro. Pamens, pèr regla tout acò, es de saupre que la sesoun venènto coumenço dins un parèu de mes. Dóu cop, se fau boulega. Soulide. Alor, l’afaire es de segui.
Vaqui, pèr aro es acaba. Pamens, vous doune rendès-vous la semano venènto pèr uno noyvello crounico. D’eici aqui, tenès-vous fièr e gaiard e avanças d’un pas lèri. Brave mounde, adessias !
Felip