LIS ERMAS DU 29 AVRIL 2020 PAR FELIP REIG - ENCARO LOU COUVIDE

21 septembre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 29 avril 2020 : ENCARO LOU COUVIDE

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 29 avril 2020 par Felip Reig.

Cars ami, bèn lou bon-jour en tóuti. Se vèi que l’istòri dóu couvide vèn sèmpre mai tihouso. Aro soun li
medecin que soun ordre li tèn d’à ment. Soun dins lou coulimatour. Segur que pèr fin de poudé prescriéure
un remèdi n’en fau demanda l’autourisacioun à-n-un ourganisme especialisa que i’an mes l’ARS, es à dire
l’Agènço regiounalo de la santa. Pamens i’a de causo qu’an bèn marcha, coume la plaquino mesclado àn-un antibiouti, pèr eisèmple. Se trobo que siéu pas proun qualifica pèr n’en parla d’un biais pertinènt.
Siéu pas un espert. Ato ! pièi, lis espert soun pas de manco. Basto de legi lou journau, tóuti li jour que
Diéu fa mounte n’i’a toujours un que nous baio d’entre-signe pèr bèn viéure counfina. Nous fison si
refleissioun coume s’èron de verita universalo. D’espert, n’i’a tambèn un fube à la televisioun pèr lou
journau d’enfourmacioun. I’a uno catastrofo, un fenoumène dins l’espàci vo que que siegue, vesèn arriba
un espert o uno esperto que nous dis sa verita. L’avèn vist emé Chernobil, li couiounige que soun esta di.
E d’acò, n’en pode parla. L’avèn vist au moumen de la pèsto aviàri emé li journalisto qu’an panca
coumprés la diferènci entre épidemìo e ‘pizóutìo. De cop que i’a, l’enfourmacioun vèn desenfourmacioun.
Ansin va lou mounde. N’en siéu à me dire que se lis espert couneissien soun travail, e bèn lou farien.
Em’aquéu couvide es tout parié. Li rato-penado e li pangoulin an pas rèn de vèire emé un virus qu’agarris
li póumon dis uman. Soulide. Escoutas : la naturo envento pus rèn. Dóu tèms de la pèsto aviàri, emé lou
H5N1, sabès lou virus de la galinaio, ère journalisto e vouliéu coumprene perqué d’uman poudien èstre
agarri tambèn pèr aquéu marrit virus. Pèr acò faire, me gandiguè au Pargue Jòrgi Besse à Nime pèr ana
à l’endavans d’un proufessour qu’es un catau pèr ço qu’es de biouteinoulougìo. E aquel ome me diguè
acò : « Moussu, i’a autant de chanço qu’un virus qu’agarris le póumoun dóu porc o dóu poulet agarrissèsse
le póumoun de l’ome qu’avès, vous, de durbi la porto de la banco de Franço emé la clau de vosto cavo.
E l’image de la clau es pertinènt estènt qu’un virus a-n-uno clau e uno souleto. En mai d’acò me diguè
l’ome, un virus a ges de metaboulisme e se pòu pas reproudurre. Se pòu duplica e acò’s pas parié segur
estènt que lou pòu faire pas que dins uno celulo pariero. » Vaqui ço que me diguè aquéu grand
proufessour qu’apoundeguè à sa dicho : « Se quau que siegue vous dis lou countràri, me lou fau adurre ! »
Adounc, es dóu tout impoussible que lou virus passo dóu porc à l’ome, à mens que fuguèsse patricouta…
pèr l’ome segur. Aqui ié sian. Tóuti sabon que sian intra dins de guerro baterioulougico. Me ramente d’uno
fraso que lou presidènt dis Estat-Uni diguè en 1945. S’agis, l’avès coumprés de Franklin-Delano Roosevelt
que quàuqui mes avans la fin de la guerro diguè : « Vole plus vèire li pople óucidentau se batre entre éli. »
Ai ! las, aquel ome mouriguè au mes d’abriéu 1945 e fuguè Harry Truman que venguè lou presidènt
vincèire de la guerro. Demourè presidènt enjusqu’en 1953, au mes de janvié, crese. Lis american, subretout la CIA se rounsèron dins lou countourole demougrafi. Pèr acò faire, veguèron la questioun di
neissènço encò di chinés, dis indian e dis african. Pèr ana lèu, vau prene l’acourchi pèr dire que soun
iniciativo noun marchè e que se falié mesfisa dóu noumbre d’estajan sus la terro que crèis à bèl èime.
Cade an, i’a mai de vuetanto-nòu milioun d’abitadou de mai sus la terro, ço que fai que tóuti li douge
annado, i’a un miliard d’abitadou de mai sus nosto terro. Se fau prene en comte qu’erian 7,6 miliard
d’abitadou à la fin de 2017, acò mostro que saren peraqui 9,8 miliard en 2050 e 11,2 miliard en 2100. Es
de bon saupre que 11 miliard es uno chifro que fau pas trepassa e d’ùni dison que faudrié limita la
poupulacioun terrèstro à 9 miliard. Questioun : coume faire ? Alor sias pas estouna vautre de vèire naisse
de salouparié coume lou SIDA, lou virus EBOLA, lou SRAS, la pèsto aviàri e aro, lou couvide ? Iéu siéu pas
sousprés. E vous lou dise cars ami que m’agradarié de m’engana, mai es de cregne qu’aqueste cop
fuguèsse pas lou darrié. Alor fau pas faire d’espèro pèr coumença à chanja nòstis abitudo alimentàri e
faire en modo d’alenti seriousamen la poulucioun. Sian arriba cap à la fin d’un sistèmo ecounoumi founda
sus l’argènt e lou proufiéu. N’en siéu segur. Pamens quand vese de fòu coume lou Trump, siéu espaventa
e me fau de marrit sang pèr mi felen. Sarié tèms de reviha li counsciènci ! Pamens ai pas la recèto pèr
faire béure un ase que se vòu pas leva la set.
Anen ! n’ai proun di e aro, es acaba. Se voulès, se capiteren mai la semano venènto e anan faire un cop
de mai, dóu bon dóu cor, uno capelado di bello pèr aquéli que mènon batèsto. Soulide que tóuti li jour de
Diéu pense à-n-éli. Osco ! Vaqui, vous souvète proun courage e vous dise au revèire. Brave mounde,
adessias.