LIS ERMAS DU 30 JUIN 2021 PAR FELIP REIG - ÓUMAGE À JAN MARIGNAN

01 juillet 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mecredis à 6h00, 13h30, 19h00.

--------------------------------------------------------------------------------------------------

ÓUMAGE À JAN MARIGNAN
Cars ami, lou bon-jour en tóuti. La nouvello toumbè i’a quàuqui jour : lou pintre camarguen Jan Marignan mouriguè. Es tout un pople qu’èron aclapa d’aprene acò. Lou falié vèire emé sa barbicheto sus lou mentoun que s’endevenié emé la de Frederi Mistral, sa caro sèmpre risarello e soun gentun. Jamai Jan rebutavo en quau que siegue de rèndre service. Jan Marignan nasquè lou 21 de mai dóu bèl an de Diéu de 1933, à Mihau dins Aveiroun. Avié un ouncle que soun pichot noum èro Andriéu. Èro un pintre pas forço couneigu. Sa femo èro uno nimensenco. Mai Jan lis avié pas vist long-tèms pèr-ço-qu’èron parti pèr s'istala au Marrò. Pamens soun ouncle avié ’gu lou tèms de ié moustra si pinturo. En 1938, la famiho faguè soun Sant-Miquèu e lou Jan que manjavo dins si cinq an se retrobavo à Bernis dins lou despartamen de Gard. Aqui, dins lis areno, faguè la descuberto d'un biòu di grand que ié disien Sarraié. Sarraié èro un biòu gris de la manade Delbosc, crese. Fau dire que Jan couneissié pas la courso libro, mai l'image dóu biòu marquè lou Janet. Aqui, se parlo de courso libro pèr-ço-que d’aquesto pountannado, se parlavo panca de courso camarguenco estènt que i'avié ges de reglamen. Encò di Marignan, à Bernis, si grand parlavon pas que sa lengo meiralo. Si gènt la couneissien tambèn sa lengo, mai éli, charravon en francés.
Adounc, poudèn dire que Jan toumbè dins l'oulo quand èro enfantoun. Vuei, is areno, parlo soun patoues coume dis. Mai i'a pas forço loucutour. En 1938, Jan faguè sa rintrado à la meiralo e... ié rescountrè Nicolo que vendra sa gènto mouié ! En seguido d'acò, frequentavo ''l'Escolo Pratico'' de Nime, routo de Genera. Aquelo escolo eisisto encaro vuei. Aqui fasié de dessin au tablèu pèr sa classo e se faguè remarca doumàci soun talènt. En 1947, Jan avié 14 an. D’aquéu tèms, la guerro èro tout-bèu-just acabado e i'avié forço reistricioun encaro. Un jour, la coumuno de Bernis dounè à soun paire d'ùni caussaduro dins uno bouito de cartoun. Jan n'en prenguè lou cubert e ié pintè soun premié tablèu... Un biòu. Èro lou premié d'uno serìo tras-que longo...
Jan amavo pas l'escolo. Ço que l'adoulescènt voulié, èro de pinta tout lou sant clame. Coume lou dis èu-meme : « lou soulet bac qu’aguèsse passa dins ma vido es lou dóu Sóuvage, pèr travessa Pichot-Rose ». Alor, en fin finalo, soun paire ié diguè que se l'escolo i'agradavo pas, ié faudrié se gagna la vido. Adounc, Jan se fasié... pintre dins li bastimen. Acò s'envento pas ! Pamens, countinuavo si pinturo.
Venguè pièi lou moumen dóu service militàri que duravo tres annado de tèms que Jan passavo pèr mita à Nime, pièi en Africo. S’entournè en Franço e reüssiguè de se faire engaja dins li camin de ferre à Oulins, proche Lioun, mounte fasié mestié de... pintre en letro ! Ansin sa vido touto, Jan aguè un pincèu dins li man.
Mai coume countinuavo sa pinturo, tournavo à Nime cado semano pèr i'adurre si tablèu e de cop que i'avié pèr tourna is areno. Se faguè roulaire, pièi magasinié i camin de ferre.
Assajè mant un cop de tourna à Nime, mai i'avié pas cap de plaço. Pamens, un jour, toumbè sus un ome que voulié, éu, tourna à Lioun. Faguè uno permutacioun en 1969 e plantè caviho à Miramas avans de veni à Sant-Martin-de-Crau en 1991 mounte demouro jusqu’à la fin de sa vido. Sa passioun pèr li biòu demourè e de bèlli fes se gandissié is areno e subre-tout dins li manado. Anavo tambèn dins li voto pèr ié vèire de biòu.
Jan e Nicolo se maridèron e aguèron tres enfant : dous garçoun e uno fiho. Cadun de sis enfant an dous pichot, ço que fai sièis felen e dintre éli uno souleto chato, Angelico. Angelico fuguè damisello d'ounour de la XXIco Rèino d’Arle, Astrid Giraud. Dins soun reinage, Angelico faguè peraqui vuetanto representacioun. Vuei escriéu pèr lou journau quoutidian La Prouvènço.
Pèr ço qu'es de soun felen Vincèn es pas un paneiraire, mai un rasetaire de la grand saco dóu Troufèu de L'Aveni, coume fuguè soun paire Estefan.
Vaqui pèr l'ome...
L'artisto se dis autoudidate, valènt-à-dire qu'a tout aprés d'esperéu. Es pas un pintre inteleituau, estènt que pinto pèr sentido, pèr entuicioun : « Vese un païsage, diguè, e n'en fau uno pinturo, coume acò, de tèsto ». Pinto sus de telo de juto, telo de lin e de cop que i'a sus la fàci granudo d’un panèu d’isorel que sa surfàci s’endevèn emé la d’uno telo groussiero. Fai de destrempo, es à dire de gouacho e de pastèu, mai subre-tout de pinturo à l'òli. Belèu avès entendu parla d’Andriéu Soler qu’èro un rasetaire dóu Carrat d’As, emé Francés Canto que mouriguè, éu, dins lis areno de Bèu-caire en 1965. I'avié tambèn Francis San Juan que defuntè dins un acidènt de veituro en 1966 e Rougié Pascal que nasquè au mes d’avoust 1932. Andriéu Soler, éu, mouriguè en 1998 e lo siéu paumarès es remirable mai-que-mai. Après la despartido d'Andriéu Soler, un jour, quàuquis ami se demandavon coume faire pèr rèndre un bèl óumage à soun ami. N’i'a un que faguè : « perdequé pas ié faire uno estatuo ? » E vaqui, l'idèio faguè camin e Jan realisè l’obro que se trobo dins lou vilajoun d’Auriho. En 2012, lou Matagot de Jóusè d’Arbaud fuguè reedita e Jan faguè autant de tablèu que i’a de dessin dins lou libre. Faguè tambèn de milierado de tablèu autour dóu tèmo de la bouvino e un tablèu de Marcèu Raynaud bèu que-noun-sai. S’avès l’óucasioun de n’en vèire quàuquis-un, la fau pas manca. Ai ! las, aqui, l’image es de manco pèr vous moustra soun talènt qu’es pas de crèire. Nous mancara forço. Soulide.
Vaqui, pèr aro es acaba. Sieguen segur que lis porte dis camp d’Alis, à brand, se soun duberto pèr faire à noste ami Jan Marignan l’acuiènço que s’amerito. Vous doune rendès-vous la semano venènto pèr uno nouvello crounico. Tenès-vous fièr e gaiard. Brave mounde, adessias !
Felip