LIS ERMAS DU 30 SEPTEMBRE 2020 PAR FELIP REIG -

01 octobre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 30 SEPTEMBRE 2020 :COUVIDO

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 30 SEPTEMBRE 2020 par Felip Reig.

Cars ami, brave mounde, bèn lou bon-jour en tóuti. Desempièi quàuqui jour, lou vese qu’à moun entour
lou mounde s’escarpouisson, s’esfourçon de tourna viéure uno vido quàsi nourmalo. Acò’s légitime e
naturau. Faire si croumpo, tourna vèire sa famiho e sis ami, segui li manifestacioun de soun assouciacioun,
faire d’esport, e l’aurre. Pamens emé la masqueto acò vèn mal-eisa. Se fau mesfisa en cade moumen e
sabèn pas se la persouno que sian à charra em’elo es pas pèr nous trasmetre, sènso lou saupre, es segur,
aquelo salouparié. De cop que i’a fau la chausido de demoura encò miéu. E n’en counèisse de mounde
qu’an la cagueto de se faire aganta pèr la babaroto. Belèu que ço que douno encaro mai la petocho, es
de vèire que li règlo soun pas li memo pèr tóuti. Vesèn de situacioun e soun countràri. Sèmblo qu’aquéli
que decidon pèr nautre n’en sabon pas mai. Boulegon pèr boulega, pèr faire crèire que soun inquiet pèr
nautre. Basto, sènso se voulé douna à la pòu, es de recounèisse que sabon pas mounte anan. D’un autre
las, fau bèn viéure e faire d’avans. D’autant que lou sabèn ja, es foro questioun d’un nouvèu counfinamen.
Es pas iéu que lou dise, es lou Menistre. Ma fisto, coume fan pèr lou saupre alor que la demoustracioun
que nous fan li decidaire es de nous moustra que soun pas mai qu’uno bando de perdu. Segur que fau
pas gasta li fèsto de fin d’annado. Pamens quant va cousta acò ? Vole dire en noumbre de vido. Vuei,
legiguère dins lou journau – m’anas dire que siéu souvènt à lou legi –, basto, dounc legiguère dins lou
journau lou comte-rendu dóu Menistre de la santa que diguè, tenès-vous bèn : « il n’y a pas de courbe
exponentielle avec un facteur de reproduction du virus très élevé. » Faudrié qu’aquéu Menistre saberu me
diguèsse coume fai un virus pèr se reproudurre. Verai, un virus a ges de metaboulisme. Alor, coume fai
la babaroto pèr se reproudurre ? M’agradarié de lou saupre. Aqui poudèn parla de duplicacioun e subretout pas de reprouducioun. Acò’s pas parié e acò mostro que l’èsse uman jogo bèn un rôle dins tout acò,
tant aquéli paraulo n’en sarié la provo soulido. D’efèt, un grand proufessour de biouteinoulougìo nimesen
me diguè, au tèms dóu virus aviàri, sabès, lou H5N1, qu’un virus a-n-uno clau. E que i’a autant de chanço
qu’un virus qu’ataco lou póumoun dóu porc agarissèsse lou póumoun de l’ome qu’aviéu, iéu, emé la clau
de moun oustau de durbi la banco de Franço. E aquéu cercaire reputa ‘poundeguè : « E l’image de la clau
es bon, estènt qu’un virus a-n-uno clau e uno souleto ». E iéu de ié demanda : « E si l’ome lou patricoulejo,
un brigoun lou virus ? » Me respoundeguè tout-d’uno : « Aqui acò vèn poussible. Mai sabès, moussu que
la naturo a plus rèn d’enventa. » Quand disèn que sian vitimo de desenfourmacioun ! Part acò, dins aquelo
tempourado de la pèsto aviàri, li journalisto parlavon de gripo aviàri, mentre, qu’en Franço, degun n’en
mouriguè, leva de quàuquis aucèu que s’entournèron de sa migracioun en Óuriént. Adounc, acò’ro pas la
gripo, mai la pèsto. Enjusqu’aro i’avié uno diferènci entre epidemìo e epizououtìo e sèmblo pas qu’acò
aguèsse chanja. Mai degun bouleguè en ausissènt un tau prepaus. Es pas lou premié cop que nous fan
prendre de caulet-flòri pèr lis aubre dóu cous. En francés, se dis « prendre les vessies pour des
lanternes ». Acò’s poulit tambèn.
Coume que siegue, fau viéure emé lou dangié que gasto, lou fau bèn dire, un pau lou plasé de se recampa.
Ço desagradiéu es que sabèn pas pèr quant de tèms n’i’a de viéure coume acò. Fau entre-teni li liame
entre nautre e anan faire esquino de crouchoun pèr teni targo au mau que nous agarris. Óublidaren pas
tóuti aquéli que pagon de sa vido lou bestige d’aquéli que leissèron la babaroto se passeja. E un cop de
mai lou mounde dis espitau se van trouba en premiero ligno. Ié sian devèn e es de pensa que li decidaire
s’acountentaran pas de ié dire soun gramaci. E pièi avèn lou devé de prendre suen de nòsti pichot que
counèisson, dóu cop, de coundicioun que soun pas ourdinàri. Li fau proutegi emé tout l’amour que ié
poudèn pourgi.
Vaqui, aro vous doune rendès-vous la semano venènto. Ni pèr lou countèste, lou felip vous souvète uno
semano bi bono e vous lou tourne à dire : basto, que lou tèms fuguèsse doucinèu. Brave mounde,
adessias.