LIS ERMAS DU 4 NOVEMBRE 2020 PAR FELIP REIG - COUVIDO 15

04 novembre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 4 NOVEMBRE 2020: COUVIDO 15

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 4 NOVEMBRE 2020 par Felip Reig.

Cars ami, lou bon-jour en tóuti. Avès vist, dimècre passa, aqui la dato a ges d’impourtanço, coume moun
ami Gabriéu qu’es majourau dóu Felibrige me l’a di : « Lou presidènt de la Republico a planta lou clavèu ! »
Aqui, pèr acò faire, a pres un clavèu de courouno, un clavelas bèn rouvihous e pèr chausi lou martèu, a
pas chicaneja. Bèn talamen que n’i’a proun pèr jougne lis espalo. E lis espalo, lis avèn bono. Pamens, fau
pas manda lou le trop luen. E lou sabèn, nautre, que sian tóuti de mounde resounable, noun ? la critico
es eisado. Es pèr acò que jusqu’aro ai assaja de pas passa la rego pèr ço qu’es de critica. Pamens, aro,
sian à marcha sus la tèsto e l’envejo me pren de dire moun avejaire. Alor me vau grata mounte me prus.
Pèr n’en faire la mesuro dóu biais que l’afaire de la couvido es esta trata, basto d’ausa regarda sus lis
espalo. Deja, la jouinesso a pas moustra soun nas pèr Halloween. Acò’s pas grèu estènt qu’aquelo fèsto,
se poudèn souna acò uno fèsto qu’es pulèu de moun avis un afaire coumerciau, basto, aquelo fèsto dounc
à soun óurigino encò dis irlandés, i’a trente siècle de tèms d’acò. Pamens es de saupre que li bounbouniho
que sian a óufri is enfant simboulison la mangiho que lou mounde depausavon à l’intrado di vilage pèr fin
que sis oustau fuguèsson proutegi dóu malastre. Es de crèire que li bonbon èron pas tant bon qu’acò
quand vesèn la merdarié que sian à patuscla dedins. Nourmalamen, pèr Halloween, se dis en
Irlando : « Trick or treat ! », es à dire « Farço vo lipitarié ! » Lou presidènt, éu, a chausi pèr nautre, la farço.
E sabe pas quau es lou farcejaire qui nous a jita un sort, que dise, un sort ? uno mascarié ! Poudèn même
dire qu’es Halloween despièi lou mes de mars. Es de bon que despièi l’espelido de la babaroto, a faugu
n’avala de coulobro. Avèn la gargamelo bèn talamen duberto que poudrié ié passa un biòu emé si bano.
Soulide. Franc d’acò, fau dire que tre la debuto a faugu crèire la tristo istòri di masqueto. N’i’avié pas, pièi
subran n’i’avié que nous li jitavon à la figuro. Lou pres fasié de mounto-davalo e basto, èro uno engano
vertadiero. Après a faugu supourta la caro entristesido de tóuti li pensiounàri dóu gouvèr pèr dire, de bèlli
fes, li mémi causo, souvènti-fes en pedalant à coustat dóu velò. Belèu me troubarès un brigoun sévère,
carous un brisoun ? I’a pas de mau à dire qu’an pres mant un cop de caulet-flòri pèr lis aubre dóu cous.
Ato ! pièi, aquelo criso es pas un afaire de poulitico, mai es bèn uno criso sanitàri. I’a ‘gu pièi lou papafard
qu’a faugu rensigna pèr fin que li chin pousquèsson s’ana vueja la boufigo. Li paure chin, an jamai autant
escoumpissa lou campagnòu que dins aquelo tempourado ! Pèr sourti mai d’uno ouro, falié rensigna dous
papié emé un decalage de l’ouro. Pamens se i’avié un countourrole, se falié pas engana e presenta lou
bon. Es de recounèisse que dins li vilage sian pas esta countourroula. En mai d’acò, ié tournan à rensigna
lou papafard. Alor, mèfi ! Ço que s’amerito d’èstre marca, es lou devouamen di persounau dins lis
establimen de santa. Osco ! e gramaci à-n-éli, d’autant que soun tourna-mai dins lou jambin. Pèr ço qu’es
de saupre quouro se n’en poudran leva, lou sabèn pas à l’ouro d’aro. En revenge, ço que m’a fa chifra, es
l’erso de vióulènci qu’a subrounda lou mounde. Es de cregne qu’acò tournèsse e m’agradarié de
m’engana. I’a ‘gu d’espèr tambèn e encaro vuei emé belèu de chanjamen dins la soucieta. Mai sabès ço
que se dis, lou fau en francés se voulès : « chasser le naturiste et il revient au bungalow ». Es coume acò
que fau dire, noun ? Noun. Belèu à quicon proche… Crese que lou pieje s’es passa après lou
descounfinamen, emé tout aquéu mounde que soun parti en vacanço. Acò’s esta lou bestige mai grand.
Estènt que d’aquéu biais, li Franchimand soun vengu nous empesta e avèn vist la resulto à la rintrado. En
Lousèro avien agu ges de mort. À la rintrado n’i’a ‘gu vounge. Noun countènt d’agué fa uno counarié
d’estiéu, pèr li vacanço de Toussaint, an remés acò. Fau èstre couioun quand même ! Aro, n’en sian à
mai de 40 000 cas pèr jour. Alor fau pas dire que lou gouvèr mestrejo l’afaire. Part acò, Aubert Einstein l’a
di : « Poudèn pas coumta pèr resóudre nòsti proublèmo sus lou mounde que lis an crea. De moun vejaire,
aquel ome es sèmpre esta lou mai grand. Quand èro jouine, anas agué uno idèio de moun age, mis idolo
èron Einstein, segur, mai subre-tout Soufia Loren, Glaudia Cardinale, Marilyn Monroe e mai que lis autro,
Raquel Welsh. De que voulès ? Cadun soun guide ! Pamens acò nous aluencho dóu sujèt. Mai coume
dins l’entre-vau la grando aguïo a passa sus lou douge se fau dessepara. De la couvido, ai ! las, n’en
poudrian encaro parla. Sara pèr lou cop venènt.
Vaqui, vous doune rendès-vous la semano venènto. Lou felip vous souvète uno semano bi bono e vous
fai la brassado… de-segur, de luen. Mesfisas-vous e gardas-vous de la babaroto e basto que lou tèms
fuguèsse doucinèu. Brave mounde, adessias.