LIS ERMAS DU 8 AVRIL 2020 PAR FELIP REIG - ENCARO LOU COUVIDE

21 septembre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 8 avril 2020 : ENCARO LOU COUVIDE

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 8 avril 2020 par Felip Reig.

Cars ami, bèn lou bon-jour, basto que tout anèsse charmant pèr vautre dins aquelo tempourado
estranjo. Dóu couvide, sabès aquelo bestiouleto meichantasso que-noun-sai, n’en vouliéu plus
parla. Pamens es impoussible de faire coume se tout acò èro acaba, d’autant que dins tout ço
que se dis, i’a de countradicioun, de causo que se contro-iston, que fan parié li lavo-vitro de la
veituro, sabès quand vènon un en fàci de l’autre coume se s’anan turta. Ansin, emai acò fuguèsse
enebi, de mounde an parti en vacanço. Nourmau, li campano vouiajon pèr Pasco. Foro questioun
pèr iéu de pourta un jujamen, lou tèms jujara d’éu-meme. Avèn vist pièi dins lou fenestroun lou
mounde que se passejon pèr carriero dins li gràndi vilo. Segur que tóuti n’an soun gounfle dóu
counfinamen, pamens es pas resounable de prene de risco parié pèr se-meme e subre-tout pèr
lis autre. I’a tambèn li boutigo e li grand magasin de bricoulage que soun à mand de tourna durbi.
Pèr i’ana, es pas buteto, d’autant que sus lou papafard qu’es de rensigna avans que de parti dóu
siéu, i’a pas la rubrico : « ana croumpa de pinturo pèr li contro-vènt ».
 Un brigoun de musico emé Mauresca, Lo pont…
Pèr tourna au couvide, à vegado, me vau passeja emé mi bastoun pèr faire de marcho nourdico.
Vèse à bèlli fes un cèu de la coulour unenco, sènso poulucioun. Alor me dise que belèu, soun
pas li pet fouirous di vaco que fan de poulucioun coume d’ùni lou diguèron i’a pas gaire de tèms.
Dóu meme biais, li tratour que soun emplega pèr fatura li champ podon countinua soun obro pèr
fin de cultiva de fru e liéume e abali lou mounde. Es pas acò noun plus que fai de poulucioun e
dóu cop poudrian avé de mangiho sènso metre la planeto sèns dessus-dessouto. Alor, de qu’es
que fai aquelo nivoulado que se vèi eilalin au-dessus de la vilo de Nime ? Belèu li veituro, li
camioun, lis avioun e tout acò. M’agradarié de crèire quand la vido vidanto tournara à la nourmalo,
qu’aquelo leissoun sara retengudo. Mai es de cregne que la memòri di decidaire fara coume de
coustumo. Bèn-lèu, faudra carga lou masco e de gant pèr ana pèr carriero. Quand n’i’avié ges,
se n’en parlavo pas e aquélis eisino semblavon utilo mai pas pas necite. E tout-d’uno li fau metre.
Valènt-à-dire qu’en jusqu’au jour d’uei, erian pas bèn proutegi e degun lou diguè. Siéu pas segur
que tóuti tendran targo à la situacioun que ié sian óupausa. La castagno tubo !
 musico Cylsée canto Mas Rouqueto. Anan nada dins d’aigo roso…
En fin finalo, la famouso pouncho que se fasié espera, semblarié que ié sian. Aro, quant de tèms
faudra pèr ajougne lou zerò mort ? Capoun qu’es mal-eisa de pausa de questioun coume aquelo !
Lou zerò mort, vous rendès comte ? Acò nous ramèno à la realita vertadiero. Es de bon que sian
pas de plagne e esperaren lou tèms que faudra. E pièi, acò’s talamen eisa de critica. Coume se
dis fau garda resoun e avèn de se dire que sian tóuti bagna parieramen. Fau faire contro malo
fourtuno, bon cor.
Anen ! n’en fau leissa un pau is autre e dóu cop, pèr aro, es acaba. Se voulès, se capiteren mai
la semano venènto e anan marca un cop de mai un picamen de man pèr aquéli que soun sus lou
front pèr mena batèsto contro aquel enemi invesible. Emé un o pensa esmougudo pèr aquéli que
mènon si camioun pèr fin que manquessian de rèn. Éli tambèn, li fau pas óublida emé tóuti aquéli
que soun à sougna lou mounde. Soulide que se n’en faudra souveni après aquéu malastre.
Osco ! à-n-éli. Vaqui, lou felip vous souvète proun courage e vous dise au revèire. Brave mounde,
adessias.


lou felip