Lis Ermas - Gaspard de Besso

06 mai 2022
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

GASPARD DE BESSO
Cars ami, lou bon-jour en tóuti e siegues li bèn-vengu dins lis ermas. En fin finalo, avèn pensa que counta d’istòri es un biais agradiéu pèr passa un moumenet de requisto. Alor, se voulès, vuei anan parla de Gaspard de Besso. L’istòri nous ensigno que Gaspard Bouis, escais nouma Gaspard de Besso estènt que nasqè à Besso-d’Issolo dins lou despartamen dóu Var en 1757, se mouriguè en 1781 quand manjavo dins si 24 an. Èro un bregand prouvençau que soun doumaine èro essencialamen la Santo-Baumo, li Maure e lou bos de l’Esterèu. Èro bravamen engaubia pèr despuia, escoufia lis estrangié fourtuna e bèn-astra. Lou fru de si rapino, lou dounè i pauro. Ansin se farguè uno legèndo de Mandrin prouvençau, de Roubin di Bos, s’amas miéus. Aro vous anan counta un tros de la vido d’aquéu bregand de garrigo. Un cop que i’avié, lou 25 de juliet 1780, à miejo-nue, un fraire dóu mounastèri de Sant-Pèiro-di-Canoun èro enfounsa dins la meditacioun sus lou releisset de la font. Èro forço preóucupa à chifra i proublèmo pecuniàri pèr fin de poudé faire pedassa la tèulisso dóu mounastèri. Li mejan financié de la coungregacioun descreissien à bèl èime e l’aveni s’ennivoulié. Basto, èro perdu dins si pensamen, quand, tout d’uno, la campano dindinè dous cop. Lou fraire s’acoursè au pourtau dóu Mounastèri. Sus lou lindau, i’avié un ome enmantela dins uno jargo de grosso lano d’ounte sourtié uno man que tenié la brido de soun chivau. Lou fraire ié venguè :
« Bèn lou bon-jour , de qué vous arribo moun fiéu ?
— Ma mounturo a perdu un ferre e a besoun de repaus. Pèr quant à iéu, m’agradarié uno bolo de soupo e un tros de gibassié.
— Intras, Vous vau alesti un repas ».
Lou mounge se gandiguè de-vers la cousino e mau-grat lou lassige que lou prenié, coumencè d’espeluca li liéume. Óusservavo dins lou meme tèms lou vesitaire qu’èro à neteja la bato de soun paramen. Se pausavo de questioun à respèt de soun atrencaduro estènt que l’ome avié carga un mantèu au cor de l’estiéu. Pas gaire de tèms après, lou mounge sounè soun oste :
« Vosto soupo es lèsto ! Venès vous asseta au refetòri ». Ansin fuguè fa. Lou cavalié leissè lou chivau s’abéura e intrè dins la salo. Retirè sa roupo, enfin, sa jargo, la pleguè ‘mé suen avans que de la pausa sus un banc de bos cira. Pourtè tambèn dous pistoulet e un sabre courtet. Li pausè delicadamen à coustat de la sieto fumadisso e diguè :
« Ges de làgui moun paire. Saras paga pèr aquéu dina ».
Lou mounge quitè lou vesitaire di maniero delicado, à la flour de l’age, e se demandavo, en vesènt soun vèsti riche s’èro pas un aristoucrato. Quàuqui minute après lou fraire s’entournè vèire l’ome dins la toco d’assista à la fin de la frugalo pauseto. L’incouneigu èro dre coume un cèri, siau coume uno gerlo d’òli, lou capèu vissa sus la tèsto, lis armo sus lis anco. Se clinè pèr escriéure un mot e lou meteguè dins uno pichoto pòchi de pèu que l’abandounè pièi au bout de la taulo. Venguè au mounge :
« Paire, poudès me dire lou camin de la capello ?
— Seguissè-me ».
L’ome intrè plan-planet d’un pas respetuous. Pausè sis armo sus un prègo-diéu, s’agenouiè e se boutè à prega. Tournè prene pièi sis armo, sourtiguè, boutè sello à soun chivau, e s’enanè au grand galop dins la nue founso. Lou mounge alassa s’anè jaire e pensè tourna-mai à soun vesitaire dóu coumpourtamen noble.
L’endeman enfourmè la coumunauta de la vesito e dounè lou saquet de pèu à ‘n mounihoun que lou durbiguè, leissènt toumba pèr sòu un fube de pèço d’or. Lou mounihoun venguè pièi :
« Aquéu vouijaire nous a leissa uno vertadiero fourtuno ! I’a mai de cinquanto pèço d’or… » Despleguè primamen la biheto que i’avié pas qu’un soulet noum escri dessus : Gaspard de Besso.
Plus tard, Gaspard de Besso fuguè embarra pèr li gendarmo, s’escapè e fuguè embarra tourna-mai. Quàuqui mes après, Gaspard de Besso mouriguè sus lou chafaud, à z-Ais-de-Prouvènço. Avié 24 an, 8 mes e 14 jour. Lou pople prouvençau gardo lou souveni d’une ome fièr de l’atitudo quouro autièro, quouro devoto. Desempièi aquelo vesprado de 1780, se dis que cade an, lou 25 de juillet s’ausis dindineja dous cop la campano dóu priéurat de Sant-Pèire-di-Canoun pèr counmemoura lou gèst generous de Gaspard de Besso que permeteguè de repara la tèulisso dóu mounastèri. Soulide.
E tra e tri, lou conte es fini, e tri e tra, lou conte es acaba. Vous doune rendès-vous la semano venènto. D’eici aqui, gardas l’esperit siau e tenès-vous gaiard. Vous brassège amistadousamen. Brave mounde, adissias !
felip