Lis Ermas - La Santo-Estello d'Arle

16 juin 2022
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

LA SANTO-ESTELLO D’ARLE
Cars ami, lou bon-jour en tóuti e siegues li bèn-vengu dins lis ermas. La Santo-Estello es lou noum dóu Coungrès annau dóu Felibrige. Se debano cade an dins uno vilo diferènto dóu païs d’o. Lou premié cop èro en Avignoun en 1876. Se ié tèn de sesiho estatutàri, d’assemblado infourmello, d’acamp de travai e es à-n-aquéu moumen que lou Felibrige se prounóuncio sus lis óurientacioun avenidouiro dóu mouvemen. Pamens aquéu coungrès es tambèn uno manifestacioun duberto en tóuti que sa toco es de valourisa l’eiretage lenguisti, culturau, literàri, artisti e tradiciounau d’un territòri. Es un evenimen festiéu, ‘mé de manifestacioun publico mounte s’espremisson tóuti li formo de la culturo d’o. En mai d’acò, la Santo-Estello afourtis li liame entre felibre e ‘mé li territòri.
Aquest an de 2022, la Santo-Estello dóu Felibrige se debanè en Arle, dóu 3 au 7 de jun. Lou darrié cop èro en 1974. Quaranto-vuech an après, aguerian, en Arle, un coungrès santestelen de trìo. L’ourganisacioun èro perfèto e aquest an, l’envenimen mage èro uno annado d’eleicioun d’un nouvèu capoulié. Lou capoulié sourtènt En Jaque Mouttet noun se voulié presenta à sa sucesssioun. Èro capoulié desempièi sege annado. Dins lou debana de l’acamp dóu Counsèu generau dóu Felibrige, erian arriba au point 14 e la voues dóu capoulié anounciè :
Capoulié En Jaque Mouttet
Adounc, lou majourau Paulin Reynard qu’èro baile dóu Felibrige se presentè. Es un ome jouine, valènt qu’es pas de dire :
Tros de dicho Capoulié nouvelàri.
Aro, lou sabèn, lou baile dóu Felibrige es lou majourau Pèire Imbert, Cigalo di Mauro e la tresouriero n’es la felibresso manteneiris Jano di Sarno. Es ansin que pèr lou Coungrès santestelen d’Arle, lou 6 de jun 2022, lou majourau Paulin Reynard fuguè ‘legi quàsi à l’unanimeta e venguè lou segen capoulié dóu Felibrige. Osco ! en longo-mai.
En Arle aquest an i’aguè d’àutri moumen esmouvènt, coume pèr eisèmple lou divèndre de sèr au teatre anti. Emé lou councours dóu reitourat de z-Ais-Marsiho, quàsi sièis-cènt-cinquanto enfant dis escolo de l’acadèmi èron sus lou pountin. E de canta e de jouga de sceneto pendènt gaire mens de dos ouro de tèms. Pas un drole, pas uno chato mudè e cantavon tóuti coume d’Ourfeoun. Pèr la musico, un ourquèstre beileja pèr Tibaud Plantevin, lou fiéu dóu cantaire-coumpousitour e autour Jan-Bernat Plantevin qu’es pèr faire parèisse soun dès-e-seten disque sarra. Li musician, éli, soun tóuti sourti dóu counservatòri. L’ensèn dounè un espetacle u-fa-nous. De cop que i’a, sian à nous demanda coume faire pèr douna un sèns à ço que fasèn. La responso, l’aguerian souto nòstis uei, sus lou pountin dóu teatre anti. Ço que veguerian nous leissè ‘mé forço espèr dins lou cor. Qunto béuta !
Tros de cant.
L’endeman, meme endré, memo ouro, èro lou group arlaten que se sono l’Estello de l’Aveni, un group de danso que nasquè en 1906, beileja vuei pèr Celino Faïsse que dounè un espetacle vertadieramen meravihous. Encaro de jouine bèn-voulènt que nous espantèron. Semblarié que i’aguèsse quicon de pousitiéu que se passo desempièi quàuqui tèms. Coume que siegue poudèn faire uno poulido capelado en tóuti aquéli que beilejèron la chourme dis enfant. Osco ! en éli. Poudrien tambèn parla de la court d’amour que la rèino dóu Felibrige, Adelino Bascaules-Bedin presidè. Cado mantenènço èro representado pèr un group e se sian coungousta de vèire sauteja, voulateja, dansa lou mounde sus lis èr de la musico de soun relarg. Pèr la mantenènço de Lengadò-Roussihoun, aguerian lou plasé de recebre l’escolo de Trencavel-Farandoulo de Beziés beilejado pèr lou flame mèstre d’obro Sèrgi Boyer
De-segur lou moumen mai soulenne es la Taulejado de la Coupo, mounte es poussible de béure dins lou caliço escrincela pèr l’estatuàri d’engèni que ié disien Louïs-Guihaume Fulconis, vole parla de la Coupo di Catalan. En fin finalo, nous entournerian un cop de mai de la Santo-Estello dóu Felibrige lou cor gounfle d’espèr e de joio. Soulide.
Vaqui, la crounico es acabado. Vous doune rendès-vous la semano venènto. D’eici aqui, gardas l’esperit siau e tenès-vous fièr. Vous brassège amistadousamen. Brave mounde, adissias ! Felip