Lis Ermas - Le Felibrige en 2022

07 juillet 2022
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

LE FÉLIBRIGE EN 2022
Cars ami, lou bon-jour en tóuti e siegues li bèn-vengu dins nòstis ermas. À la debuto dóu mes de jun 2022, lou Felibrige a ourganisa soun Coungrès santestelen en Arle. La Vilo dóu Lioun es à mié camin d’uno encountrado mounte demoron la mage part di Felibre. Adounc, èro pas uno souspresso de ié vèire un fube de mounde. En mai d’acò, èro pas uno Santo-Estello coume lis autro estènt que li felibre avien d’elegi un nouvèu capoulié. Soun li majourau dóu Felibrige, li sendi e li delega di mantenènço qu’elegisson lou capoulié. Anan vèire pèr lou menut l’impourtanço d’aquel evenimen. Lou capoulié En Jaque Mouttet a tengu l’empento dóu mouvemen sege annado de tèms à-de-rèng e noun se representié à sa sucessioun. Alor, perdequé, l’eleicioun dóu capoulié es-ti impourtanto ? De dela de la questioun umano, pèr-ço-que, pèr aquéu qu’acedis à la founcioun supremo, lou coumprendrès eisadamen, es quicon de grand e de bèu. S’agis ni mai, ni mens que de prene la seguido de Frederi Mistral emé tóuti lis enjò pèr l’aveni de la lengo. Mai l’afaire va mai luen qu’acò. Fasèn, se voulès un brigoun d’istòri, dise bèn pas qu’un brigoun estènt que siéu pas istourian, acò vai soulet. Basto, tóuti li mouvemen literàri couneiguèron uno double questioun : premier, se fau-ti rounsa dins l’aventuro poulitico, vo fau-ti demoura en foro d’acò ? Segound, fau-ti entre-teni un mouvement inteleituau, vo pulèu resta dins un envanc poupulàri ? Vesès, poulitico vo noun ? Inteleituau vo poupulàri. Que que siegue, lou mouvemen, l’Istitut d’Estùdi Oucitan o lou Felibrige, aquéli questioun se li fau pausa. Es pas dire de messorgo qu’afierma que l’IEO a couneigu de criso desempièi sa creacioun. Es mal-eisa de countenta tout lou mounde. Dins l’entre-vau dis annado 50 à 60, ùni voulien d’acioun pas que sus lou plan culturau, mentre qu’ùnis autre èron à souveta uno presènci dins lou doumaine pouliti. À la fin dis annado setanto e à la debuto dis annado vuetanto, i’avié tourna-mai dos tendènci que s’óupausavon : la tendènci poupulàri e la tendènci universitàri. De decisioun soun estado presso e de-segur acò agradè pas en tóuti parié. Pamens, l’IEO subre-mountè aquéli proublèmo. Lou Felibrige pièi reglè la questioun poulitico en fasènt la chausido de demoura en foro d’acò e lou marquè dins sis estatut. Ato ! pièi, es tout-parié pèr la questioun religiouso qu’avèn pas de metre en avans dins nòsti relacioun au sen dóu Felibrige, emai i’aguèsse d’eclesiasti de trìo que soun, desempiè lou premié counsistòri, marca dins lou cartabèu dóu Felibrige. Empacho pas que de cop que i’a se n’en parlo à la chut-chut dins lou respèt de tóuti. Sian tóuti de fraire ! Pèr ço qu’es de la questioun de chausi entre inteleituau e poupulàri, vo poupulisto, justamen, desempièi cènt-sieissanto-vuech an, es l’alternanço di capoulié que gardo l’equilibre sus aquel item. Adounc, avèn pas de prene acò en counsideracioun. Tèms en tèms, la tendènci va de-vers l’inteleituau e, segound li capoulié, la chausido se fa de-vers lou poupulàri. Coume que siegue, dins lou Felibrige, e dounc dins lou counsistòri, se trobo de mounde inteleituau e de mounde mai poupulisto. Hóu ! dise pas que lou Felibrige couneiguè ges de criso tout de long de soun istòri. Sarié ‘stre messourguié. Pamens lou Felibrige de Frederi Mistral, coume l’Istitut d’Estùdi Oucitan traversè li decenìo e li siècle e tóuti tant que sian, sian sèmpre aqui pèr apara e espandi la lengo e la culturo nostro. Vaqui perdequé l’eleicioun dóu capoulié es impourtanto mai-que-mai. Aquesto an, aro lou sabès, es lou valènt majourau Paulin Reynard que fuguè brihantamen, superbamen, elegi capoulié dóu Felibrige. Lou segen capoulié dóu Felibrige. Paulin manjo dins si trento-un an. Alor, es segur qu’anan garda la foudamento, lou founs que carateriso lou Felibrige. Pamens, lou Capoulié nouvelàri aura à cor de metre sa marco sus lou siéu capouleirat. Pèr acò faire, saup s’entoura e a un talènt naturau pèr parla au mounde, escouta, prene de decisioun justo e l’aurre. D’aquelo eleicioun, tóuti li felibre n’en soun fièr. Evidentamen, nòsti pensado s’adrèisson tambèn au rèire-capoulié En Jaque Mouttet qu’a presida lou counsistóri felibren emé voio, eficaceta e gentun. Oubra proche d’éu fuguè un ounour di grand. Vole assoucia à-n-aquel óumage madamo Iveto Martin, espouso de Jaque Mouttet que tourno à si founcioun de majourau, coume lou mjourau Pèire Fabre que tenguè, éu, li maneto de l’araire pendènt douge annado, de 1992 à 2006. Pode afierma, nosto voulounta pleno e entiero de travaia coutrìo emé lou Capoulié atuau, lou majourau Paulin Reynard, cigalo de Camp-Cabèu. Soulide. Osco ! en longo-mai.
Vaqui, aro la crounico es acabado. Vous doune rendès-vous la semano venènto. D’eici aqui, gardas l’esperit siau e tenès-vous gaiard. Vous brassège amistadousamen. Brave mounde, adissias !
Felip