Lis Ermas - Nouvé1

14 décembre 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

NOUVÈ 1


Cars ami, lou bon-jour en tóuti. Sian pèr se sarra di fèsto calendalo. La tempourado de Nouvè tèn uno plaço
di grando dins li conte prouvençau. De-segur, Carle Galtier s’impauso en embassadour. Part acò, es éu
que nous baiè l’envejo de cava mai founs pèr fin de saupre ço que represènto li fèsto calendalo dins l’èime
prouvençau, à flour de camin de la fe religiouso e de l’esperit proufane. Lou sustantiéu « Nouvè » es atesta
ja au siècle dougen, pendènt li tres premié siècle de l’èro crestiano. Verai, la glèiso roumano avié pas lou
soucit de celebra l’anniversàri de Jèsu simplamen pèr l’encauso que degun couneissié sa dato de
neissènço. Felip Conrad diguè : « Lou cretianisme primitiéu descounèis aquelo celebracioun, e, dins la
premiero mita dóu siècle tresen, lou filousofe Aleissandrin Origène, que visquè i siècle dousen e tresen,
refusè encaro que fuguèsse pausado la questioun de neissènço de Jèsu que lou fau pas counfoundre
em’un soubeiran tempourau que que siegue ». Dins l’Evangèli de Lu, poudèn legi aquéli mot en raport emé
Nouvè : « I’avié, dins aquelo encountrado, de pastre que passavon dins li pra à-nue pèr garda si troupèu ».
La presènci di pastre dins li pra au cor de la nue temounio d’uno sesoun douço que s’endevèn pas ‘m’
aquelo que se counèis au mes de desèmbre. Pèr quant à la chausido dóu 25 de desèmbre, mant uno
ipoutèsi soun avançado que la maje part soun contro-versado e avèn pas la pretencioun de faire lus sus
aquel item, emai lou soulet detai dóu soulstice d’ivèr precedi di Saturnalo roumano s’ameritèsse d’èstre
marca. Nouvè festejo lou sacra que soun propre es de s’óupausa au proufane. De dela d’aquéu coustat,
tre la premiero ligno de soun avans-prepaus, Rougié Caillois afiermo dins soun libre titra L’Homme et le
Sacré publica en 1961 : « Tre que s’estacan à precisa la naturo e li modo d’aquelo óupousicioun, se turtèn
i entravadis li mai grèu ». Aqui, moussu Caillois fai alusioun à la coumpleisseta laberintico di fa. Verai, ges
de fèsto dóu calendié, franc de Pasco, beneficìo d’autant de poupularita en Prouvènço e belèu autro-part
tambèn, Nouvè estènt festeja, pas toujour d’un biais religious, quàsimen dins lou mounde entié. De deguno
autro fèsto subroundo un esperit d’óupousicioun autant prounouncia dins lou biais qu’es viscudo. Nouvè
s’es bravamen secularisa, es à dire laïcisa e lou liame religious se destibè dins li mémi proupourcioun. La
devoucioun dis un pèr la messo de miejo-nue, l’estacamen dis autre pèr la tradicioun dóu gros soupa, dóu
cacho-fìo, dóu biais de dreissa la taulo calendalo e li trege dessert, pèr parla que d’acò, n’an de coumparant
que lou caractère proufane di repas e di presènt pèr la satisfacioun dis autre e acò’s propre à-n-aquelo fèsto
mau-grat soun foundamen religious. Lou bon paire Nouvè, autant que lou sapin, lis iluminacioun dins li
carriero e li marcat de Nouvè ié soun pas pèr rèn noun plus. Part acò, lou sacra s’acoumpagno dóu proufane
pèr la maje part dóu mounde. Ansin ana à la messo noun empacho de s’entaula pèr gousta i plesi de la
taulo e à la gau de recebre de presènt. Alor se poudèn pausa la questioun pèr saupre se la fèsto es pas un
boumbimen contro tout ço qu’aclapo l’ome, lou coustren o l’esfraio ? Manja coume quatre, béure coume
sièis permet d’óublida li soucit, de faire un pan de nas au destin e de se deliéura, de desbounda. Un cop
apasima, l’ome pòu tourna à la grisaio de la vido vidanto. Pamens, aquéu boumbimen es nécite estènt que
se poudian pas gangassa lou destin, n’en poudrian creba. Es ço que n’en dis Carle Galtier dins soun conte
titra « Lou Jo dis amelo » qu’es dins soun premié recuei que soun titre es L’Erbo de la routo. Aqui, sian mai
proche de la desbroundado de Carnavau que dóu caractère sacra de Nouvè. Sènso asseca li benechié di
glèiso, poudèn recounèisse lou caractère rituau e religious de Nouvè e acò empacho pas de faire quàuquis
eicès, en de moumen demasia. Lou sacra es dessacralisa à la favour dóu proufane. Dins lou conte, fasèn
counneissènço emé Manoun que malautejo d’un mau que la rousigo e que degun saup de mounte vèn.
Belèu qu’aquelo revòuto de l’autour es un biais d’apasima sa coulèro contro l’injustiço. Pamens es segur
que l’esperit de la fèsto aluencho lis óuvi de sa fe religiouso. Jamai Galtier se sentié ras dóu precepice
religious, ounte lou mendre escart sarié fatau à l’amo d’un cresènt quau que siegue. Res e rèn, valènt-àdire
deguno entita trascendentalo ié faguè d’empacho pèr vaca à sis óucupacioun, sènso encidènci sus sa
sauvacioun, soun salut, deliéura de touto enebicioun religiouso. Lou cop venènt veiren de proche ço que
soun aquéli dous mounde, l’un religious e l’autre proufane. Soulide.
Adounc, coume n’i’a encaro de causo de dire sus Nouvè, vous prepause de se retrouba la semano venènto
pèr n’en parla e pèr aro es acaba. Acò dis vous souvète uno semano di bello e d’eici aqui, tenès-vous fièr
e gaiard. Brave mounde, adissias !

felip