20 novembre 2024
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
ESPOUSICIOUN « MISTRAL SUPERSTAR » À MOUNT-PELIÉ
.............................................
Brave mounde, bèn lou bon-jour en tóuti… Divèndre 18 d’óutobre passa, nous gandiguerian à Mount-Pelié pèr viéure l’inaguracioun de l’espousicioun « Mistral, super star, de Maillane à Stockholm » qu’èro estado istalado is archiéu despartementau dóu doumaine de Peirovivo de la capitalo erautenco. Après li discours dis elegi e dóu Prefèt d’Erau, après li cant de la couralo « Les Garrigues » de Sant-Bausèli-de-Mount-Mèu, avèn vesita à la lèu-lèu aquelo espousicioun, en nous fasènt la proumesso de ié tourna pèr prene lou tèms d’espepidouna tout ço qu’es douna de vèire i vesitaire. Pamens avian à cor de coumprene de qunt biais acò se faguè. Lou rescontre emé Fanìo Reboul, cap-counservatriço dóu Parimòni e coumessàri de l’espousicioun fuguè salutàri. Se trobo qu’un ome qu’avié noum Glaude Goyard deguè un jour rejougne sa grand à Castèu-Nòu-de-Gadagno. Aquelo damo que carguè lou vèsti s’adreissavo à soun felen pas qu’en lengo prouvençalo. À cha pau, la leituro de l’obro de Frederi Mistral e li prepaus escambia ‘mé sa grand faguèron naisse dins lou cor de Glaude Goyard soun amour pèr la lengo provençalo. Èro encaro un jouvenome quand s’interessè is autour prouvençau. Glaude Goyard faguè pièi sis estùdi de dre à faculta de Mount-Pelié avans que de veni ensignaire éu-meme à Mount-Pelié e se coustituïguè un founs impourtant à l’entour de Frederi Mistral. Restè ansin trento an en Óucitanìo avans que d’ana à Paris. Pamens fau saupre que tre l’endeman de la despartido dóu Mèstre, es Marìo Mistral sa gènto mouié qu’amenistrè – n’èro meme la souleto eiretiero – li dre de l’obro de soun espous jusqu’à sa propro mort en 1943, avié cinquanto-vuech an. Lou faguè d’un biais menimous mau-grat lis auvàri juridi, estènt que pèr se defèndre de rebuta quàuqui demando fantasco, escrivié en de mounde : « M’acourdaras qu’autourisa de reviraduro fantasiouso de Mirèio sarié un autre escandale qu’aquéu d’apara jalousamen sa memòri e soun obro contro aquéli que riscarien de la coumproumetre ». De cop que i’avié, apara l’obro èro mal-eisa pèr l’encauso de Mistral nebout qu’avié ‘no talo se de glóri que ié rendié la vido impoussiblo. D’efèt lou nebout avié de pretencioun sus li dre avans la despartido de Marìo Mistral que dins si letro lou sounavo en francés « Frederic Mistral-petit ». Après Marìo Mistral, fuguè lou nebout qu’assegurè evidentamen la gestioun dóu patrimòni de soun ouncle. Es éu que fisè li dre de l’obro de Mistral à Glaude Goyard qu’éu-meme depausè aquéu founs is archiéu de Mount-Pelié en 2020. Basto, pèr tourna sus noste item, es pas ‘no espousicioun autoubiougrafico, es uno partido de ço que fuguè descubert dins lou founs que represènto cinquanto mètre lineàri. Adounc i’a forço doucument e un fube de letro. Is archiéu erauten descurbiguèron dins li courrespoundènci la devoucioun pèr Frederi Mistral dóu mounde de tóuti li païs. Lou titre « Frederic Mistral, super star » fuguè chausi à bèl esprèssi quand se saup l’amiracioun pèr lou grand Maianen despièi toujour, « uno devoucioun, sènso raro » coume l’afourtis Fanìo Reboul. Es incresable lou noumbre de demando que Marìo Mistral recebè de longo. Acò partié dóu noum de si chin Pan-Panet e de soun pichot Pan-perdu, enjusqu’à veni à Maiano pèr s’embuga de ço que fuguè la vido de l’autour de Mirèio. Part acò, lou fau bèn dire, nautre tambèn anan pas à Maiano vo à Castèu-Nòu-de-Gadagno coume dins un rode quau que siegue. Fau marca tambèn la drudesso icounougrafico e videò de l’espousicioun. Lou pres-fa coumpli es simplamen meravihous que parle de l’obro que se perseguiguè à l’oupera e au cinema, meme après la desparicioun de soun autour. L’enventaire dóu founs depausa pèr Glaude Goyard se trobo dins la telaragno, sus lou site dis archiéu despartementau. L’espousicioun es duberto jusqu’au 8 de febrié 2025. Leissan lou mot de santo Claro au proufessour Felip Martel que signo la prefàci dóu catalogue de l’espousicioun e que vèi en Mistral « un auteur français suffisamment important pour avoir été couronné en Suède, mais pas assez pour mériter d’être étudié en France ». Adounc gramaci is escolo que nous fan d’acuiènço pèr parla de Frederi Mistral. Óublides pas de l’ana vèire aquelo espousicioun. Soulide.
Aro la crounico es acabado. Vous doune rendès-vous la semano venènto. D’eici aqui, tenès-vous fièr e gaiard. Vous brassège amistousamen. Brave mounde adissias !
felip
