LIS ERMAS PAR FELIP REIG SUR RADIO NÎMES - FLOURIAN 1

12 juin 2024
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

-------------------------------------------------------------------------------------

JAN-PÈIRE CLARIS DE FLOURIAN (1755-1794) 


Bràvis ami, bèn lou bon-jour en tóuti e sigués li bèn-vengu dins nòstis Ermas. Aquest an, la Santo-Estello dóu Felibrige se debanè à Scèus, en regioun parisenco. Fuguè un Coungrès meravihous. Pamens se poudèn demanda ço que fai lou liame entre entre lou Felibrige e aquest relarg proche la Capitalo de Franço. Se trobo que l’encauso d’acò a ‘n noum, lou de Jan-Pèire Claris de Flourian, qu’anan n’en parla vuei. Jan-Pèire Claris de Flourian sourtiguè d’uno famiho proutestanto dóu Gard que ié disien li Claris. Flourian nasquè lou 6 de mars 1755 à Sauve, en Ceveno, emé un cuiereto d’argènt coume l’anan vèire. Manjavo dins si dous an quand la siéuno maire se mouriguè. Tre que venguè véus, soun paire plantè caviho au castèu de Florian que se trobo dins lou vilage de Lougrian-Flourian proche Sauve. Fisè lou jouine Jan-Pèire Flourian à soun ouncle, lou marqués de Flourian que s’èro marida ‘mé Marìo-Eisabèu Mignot. Es éli dous que presentèron lou jouine Flourian à Francés-Marìo Arouet, que ié disien tambèn Voltaire (1694-1778) que Marìo-Eisabèu n’èro la neboudo. Part acò, se saup que la sorre de Marìo-Eisabèu, qu’avié noum Louïso Mignot, qu’èro uno femo escarrabihado, èro tambèn la gouvernanto dóu filousofe. Se dis que d’à cha pau venguè sa coumpagno e s’óucupavo di relacioun de Voltaire ‘mé la Coumèdi-Franceso foundado en 1680. Voltaire e Louïso Mignot recebien forço persounalita à soun castèu de Ferney dins lou despartamen de l’Ain mounte lou parèu demouravo desempièi 1760. Flourian manjavo dins nòuv an quand venguè dins aquel endré pèr lou premié cop. E sian pas estouna d’aprene que d’aquéu biais, Flourian trevavo li gènt dóu pessu e d’artisto de touto meno tre 1765. Fuguè à l’aflat de Voltaire que « Flourianet », coume l’escais-noumè soun prouteitour, aprenguè la literaturo, la filousoufìo, l’umanisme e que descurbiguè li fablo de Jan de la Fontaine.
Es bono-di lou meme Voltaire que Flourian rescountrè Louïs Jan Marìo de Bourboun (1765-1793), felen dóu rèi Louïs XIV, amirau de Franço, Du de Pentièvre e de forço àutris endré coume lou doumaine de Scèus que noumè Flourian « page » en 1768. Se counèis d’astrado mens daurado ! Basto es de saupre qu’un page es un jouine noble estaca au service d’un rèi, d’uno rèino, d’un prince vo d’un du, que n’en porto la liéurèio e que recèu ‘no educacioun civilo e militàri en aprenènt li règlo de segui à la court. Es ansin qu’en 1770, Flourian coumencè uno carriero d’óuficié militàri e lou Du lou noumè capitàni refourma de soun regimen de Dragoun en 1777. Devié servi l’armado pas que quàuqui mes dins l’annado e la mage part dóu tèms que ié restavo, l’emplegavo à l’escrituro enjusqu’en 1792. En 1799, emé si premiéris obro pèr lou teatre aguè lèu fa de gagna en noutourieta. Soun pouèmo Voltaire et le serf du Mont Jura recebè un prèmi de l’Acadèmi franceso en 1782. N’en fuguè elegi membre en 1788 ; avié 33 ans. Mau-grat qu’èro proche dis eiretié dóu rèi, militàri, qu’èro noble e que venguè un escrivan recouneigu, pèr l’encauso de la Revoulucioun, fuguè coustren de s’aluncha de Paris e s’anè metre à la sousto à Scèus, carriero de Brutus, atualo carriero dis escolo, mounte countinuè à escrièure e se rounsè dins la reviraduro dóu Don Quichot de Cervantes. Pamens au mes d’abiéu 1794, un decrèt enebissié is ancian noble de demoura à mens de dès lègo de Paris. Mau-grat ‘cò, lou du de Pentièvre estènt defunta, Flourian faguè la chausido de tourna à Paris. Sarié esta denouncia e arresta lou 15 de juliet 1794, sus l’ordre de Roubespierre. Uno epistro dedicatòri à la Rèino, publicado vuech annado en rèire, en 1786, dins Numa Pompilius segound rèi de Roumo fuguè l’encauso d’aquelo arrestacioun ; Flourian escriguè : « Reine, votre nom seul assure mon succès ; de Louis, de vous, des François, On croira que j'écris l'histoire ». Dóu cop capitè pas coume èro de prevèire. Fuguè engaubia à Port-Libre, ancian couvènt e atuau espitau Couchin, e demandè ges d’ajudo esteriouro à la debuto de soun empresounamen estènt que la Republico avié d’afaire urgènto de regla, ço escriguè Flourian dins uno letro dóu 15 de juliet 1794. Pamens sa santa e soun mourau se desgrunèron. En fin finalo fuguè deliéura lou 8 d’avoust 1794, es à dire lou 21 thermidor de l’an II, bono-di lou Coumitat de Segureta generalo e de soun ami Boissy d’Anglas. Pamens à Scèus, tout-d’un-cop la malautié l’empourtè, se mouriguè lou 13 de setèmbre 1794. Fuguè enseveli au cementèri coumunau, proche la glèiso de Scèus. Avié tout-bèu-just trento-nòuv an. Vaqui, avèn
presenta l’ome. Lou cop venènt parlaren de soun obro e dóu biais que venguè celèbre encò nostre e dins lou Felibrige. Soulide.
Pèr l’ouro, la crounico es acabado, vous doune rendès-vous la semano venènto. D’eici aqui, sigués fièr e gaiard. Vous brassège amistousamen. Brave mounde adissias !

felip