LIS ERMAS PAR FELIP REIG SUR RADIO NÎMES - LA BIERRO 1

05 février 2024
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

-------------------------------------------------------------------------------------

Mi bràvis ami, bèn lou bon-jour en tóuti e sigués li bèn-vengu dins lis Ermas. Avès vist que i’a 
toujour mai de mounde que se bouton à brassa sa bierro ? E belèu qu’amas la bierro ? E vous 
sias jamai demanda de quent biais la poudèn fabrica. Dóu cop, anan assaja d‘esplica ço qu’es 
la bierro estènt que i’a un voucabulàri propre i bieraire o s’amas miéus i brassaire, un 
voucabulàri qu’es un pau especiau e que, la maje part dóu tèms, li mot sorton di lengo 
fourestiero. Alor s’agis de li revira en lengo d’o. Belèu faudra-ti un parèu de crounico pèr mena 
l’afaire à soun rode e vendras d’especialisto en bierroulougìo. À quicon proche sabèn tóuti ço 
qu’es la bierro. Premié quant de meno de bierro eisiston ? Es de saupre que i’a de milierado 
de bierro diferènto que li poudèn desparti en uno deseno de gràndi famiho. Li bierro que ié 
dison li Lager, li Pilsener e li Bock soun li mai poupulàri. Es de bevèndo lougiero e qu’an pas 
forço goust. I’a gaire d’alcol dins aquéli bierro amagestrado premié en Tchequìo vo en 
Alemagno. La Pils fuguè creado dins la viloto de Pilsen en Tchequìo au mes d’óutobre 1842 
pèr Jóusè Groll que brassè sa bierro segound un processus nouvatour. De noumbròusi 
brassarié s’ispirèron de sa teinico que ié permeteguè de proudurre uno bierro tras-que 
poupulàri. Pamens d’èstre la biero la mai poupulàri n’en faguè la bierro mai imitado dins lou 
mounde. La Pils represènto nonnanto dóu cènt di vèndo dins lou mounde. I’a tambèn li bierro 
Ales que vòu dire bierro en anglés. Mentre que li Lager que vòu dire bierro bloundo en anglés
tambèn soun facho emé de levaduro de la fermentacioun basso, li bierro Ales que soun facho 
emé de levaduro d’auto fermentacioun soun mai óudouranto e embaumon mai. La mai 
couneigudo es la Pale ale, bierro bloundo tambèn. Se trobo de versioun mai amaro emé lis 
Extra Strong Bitter, lis ESB e l’India Pale Ale vo Ipa qu’es forço amaro. Si redoulènci 
s’endevènon em la di fru. Poudèn destria li bierro Porter que soun de bierro tradiciounalamen 
brassado en Anglo-Terro. Soun de la coulour founso emé un goust e un perfum renfourça. 
Tóuti couneissoun la Guiness, la bierro mai couneigudo dins la categourìo di bierro Stout. Sa 
coulour es founso tambèn, quàsi negro, un pau de la coulour dóu quitran. Aquelo bierro es 
forço moussouso e i’a un brigoun d’amarun dins soun goust. Li bierro blanco soun uno autro 
famiho de bierro froumentouso. Sa coulour es quàsi blanco, un pau lachouso e i’a dos soutofamiho : li bierro de Belgico e li bierro blanco preparado en Baviero emé de blad. Ié dison li 
Weizenbier. Part acò, wiezen vòu dire blad en alemand. D’aquésti bierro s’enauro uno óudour 
de banano vo de clavèu de girofle. Pamens pèr ço qu’es di bierro bèljo s’agis pulèu d’un goust 
de fru emé d’espèci. I’a pièi de bierro especialo que fan l’óujèt de teinico de brassage 
particuliero, ‘mé uno paleto de sabour. Dins aquesto categourìo, poudèn destria li bierro de 
gardo coume la Jenlain. À l’óurigino, fuguèron preparado dins lou Nord de Franço. Soun 
brassado d’ivèr. Li bierro d’abadié, que ié dison perèu bierro trapisto coume li de la gamo di 
bierro Grimbergen soun brassado en Belgico e prepauson d’óulour de fru pouderouso e soun 
un pau mai alcoulisado. Podon èstre de mant uno coulour. Dins la categourìo di bierro 
especialisado se trobo tambèn li bierro Lambic que dedins i’a la Krieck, uno bierro à la 
cerieso que la couneissès belèu. La Lambic fuguè brassado pèr lou premié cop au siècle dèse-seten e soun noum vendrié de la vilo de Lembeek au sud de la Belgico. Se dis qu’aquésti 
bierro soun facho emé de levaduro sóuvajo. Soun pièi counservado dins de boutarèu de roure 
e dounc beneficion d’un segound reboulimen. Lou reboulimen es parié la fermentacioun. 
Darriero famiho, li bierro de sesoun. Emai i’aguèsse forço alcol, soun douço dins la bouco. 
La bierro de Nouvè, la bierro de mars n’en fan partido. Vaqui pèr li principàli famiho de bierro. 
Aro, vesen ço que fau pèr faire de bierro. Uno bierro se coumpauso d’aigo, de malte de cerealo, 
d’óubloun e de levaduro. Lou cop venènt veiren en dequé servon tóuti aquélis ingrediènt. 
Soulide.
Vaqui, aro la crounico es acabado. Óublides pas que la bierro es de counsouma ‘mé 
mouderacioun ! Dich acò vous doune rendès-vous la semano venènto. D’eici aqui, sigués fiér 
e gaiard. Vous brassèje amistadousamen. Brave mounde à-Diéu-sias !
felip