LIS ERMAS PAR FELIP REIG SUR RADIO NÎMES - LA RÈINO D’ARLE 2

21 mai 2024
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

-------------------------------------------------------------------------------------

LA RÈINO D’ARLE 2
Bràvis ami, bèn lou bon-jour en tóuti e sigués li bèn-vengu dins nòstis Ermas. Nous anan entourna un cop de mai en Arle… La darriero fes avèn parla di chatouno, quand manjon peraqui dins si vuech an e que laisson soun beguin, soun bounet pèr prene, à la Fèsto di Mireieto, li baneto, sabès, lis auriho de lapin, la premiero couifo. Plus tard li chato, quand fan si quinge-sege an, prenon lou riban i Sànti-Marío-de-la-Mar i Fèsto vierginenco ourganisdo pèr la Nacioun Gardiano. Aqui fan un pas en avans impourtant dins lou port dóu coustume. I’a peraqui vuetanto chatouno e chato que participon à-n-aquéli fèsto. Tóuti aquéli pichoto coustituon un pesquié que n’en sourtira li rèino d’Arle de deman. Pamens poudrian èstre estounant que, coume aquest an, i’aguèsse pas que quatre candidato pèr rèino d’Arle. Lou noumbre déurié aumenta tre l’an venènt estènt que la fèsto di Mireito eisisto desempièi 2012. M’anas dire emai aquelo fèsto eisistèsse pas, acò empacho pas que i’avié mai de candidato. Mau-grat ‘cò sian fisançous que i’aura proun de candidato pèr lou règne venènt. Dich acò, li candidato rensignon un doursié e an de passa l’esprovo di preseleicioun. Après ié fau espera lou jour dóu premié de mai pèr la sesiho de l’eleicioun dins lou cadre de la Fèsto de l’Antico Counfrarié di Gardian de Sant-Jòrgi. Aquest an, pèr l’encauso di refoulèri de la meteouroulougìo, l’eleicioun se fagué lou vue de mai. Aquèu jour d’aqui, la plaço de la Republico èro coumoulo dóu mounde, coume cado fes. I’avié meme encaro mai de mounde que n’i’a de coustumo. La journado coumencè ‘mé lou passo-carriero tradiciounau, ufanous bono-di la presènci dis poulìdis Arlatenco, bello mai-que-mai, di group de tradicioun e di cavalié noumbrous bèn talamen que lou parvis de la Majour, la glèiso mountre rèsto l’estatuo de sant Jòrgi, èro cafido de gardian emé si paramen que rèston sènso pèd branda pendènt la durado de la messo. Parlèn pas dóu publi vengu tambèn en grand noumbre. Après l’óufice religious li participant tournèron metre lou camin souto si pèd pèr se recampa davans la coumuno, lou fèrri en man pèr li cavalié. Pèr troumpa lou tèms, lou mounde tiravon de prounousti, cadun ié vai de soun vejaire. Ni pèr acò li minuto s’esperloungavon. Tout-d’uno, Pàtri de Carolis, lou maire d’Arle apareiguè sus lou bescaume e alarguè uno dicho amistouso. Après li premié picamen de man, prenguè soun alen e cridè lou noum di damisello d’ounour : Faustino Bret, Saloumè Espelly… e Nina Graillon, la sorre de Mandy Graillon que fuguè la XXIIco rèino d’Arle. Sènso faire d’alòngui estènt qu’avèn tóuti coumprés, lou maire i’aguè d’un brave alen pèr crida au mounde : « Pople d’Arle, veici ta rèino, Amelìo Laugier ! » N’en fauguè pas mai pèr bouta fiò. Cridadisso, picamen de man entre que li gardian bravamen, levèron si fèrri pèr faire ounour à la vint-e-cinquenco rèino. Lou 7 de mai passa Amelìo intrè tout-bèu-just dins sa vint-e-dousenco annado, fai d’estùdi en master « Estrategìo d’entre-presso » e demoro à Moulés. Cavaliero de trìo e forço atravalido tèn la mestrìo de sa lengo. Es elo que sucedis à Camiho Oteman-Moya, vint-e-quatrenco rèino d’Arle e que n’en prendra la seguido à l’óucasioun de la Fèsto dóu Coustume lou trento de jun venènt. Sian fisançous que la nouvello rèino e si Damisello d’ounour nous van óufri un règne di bèu. Verai aquest jour d’aqui dóu mes de mai 2024, erian encaro mai fièr d’aparteni au mounde di tradicioun, de la culturo e de la lango d’o. Es de se ramenta que la rèino d’Arle nasquè pèr miéus marca l’anniversàri centen de la neissènço de Frederi Mistral. Fau dire qu’à la coumençanço dóu siècle xxen, lis Arlatenco abandounèron lou coustume arlaten pèr se sarra de la modo parisenco pèr fin d’èstre recouneigudo coume de damo eleganto. Pamens, Mistral diguè : « Tant qu’auran lou riban e la capello, lis Arlatenco saran li pus bello. » Voulié moustra is Arlatenco que l’eleganço èro tout-bèu-just de pourta lou coustume e pèr acò faire, ourganisè uno fèsto que sa toco èro de metre en lume li damo e soun atrencaduro. La premiero fes que se faguè ‘cò, èro lou 17 de mai 1903 e la fèsto se debanè en Arle, dins lou teatre anti. Tre la debuto, Leo Lelée (1872-1947), un pintre talentuous, prenguè part à la fèsto e dessinè lou diplomo que li vint-e-vue chato reçaupeguèron. La Fèsto vierginenco èro pèr veni uno tradicioun. En 1904, tre la debuto de l’estiéu, fuguèron bandido li baso de ço que vendra la Nacioun Gardiano. Lou 4 d’abriéu, Frederi Mistral ourganisè la dousenco Fèsto vierginenco. Folcò de Baroncelli (1869-1943), patrounime di segnour de Javoun que venguèron de Flourènço (Itàli), fuguè esbaubi pèr la bèuta d’aquelo fèsto. Mistral fuguè pas en chancello pèr ié demanda de countribuï i preparatiéu. Aguè l’idèio de ié faire participa li gardian pèr lis abrivado, li jo e l’aurre. Pas gaire de tèms après, lou Marqués e sis ami creèron lou Coumitat vierginen au cor de Camargo, au mas de l’Amarèu, i Sànti-Marìo-de-la-Mar. Èro lou 24 de jun 1904, i’a 120 an d’acò. Lou 16 de setèmbre 1909 nasquè óuficialamen la Nacioun Gardiano que ramplacè lou Coumitat
vierginen e qu’ourganiso sènso fali, cade an au mes de juliet, la Fèsto vierginenco i Sànti-Marìo-de-la-Mar. Soulide.
Pèr l’ouro, la crounico es acabado, vous doune rendès-vous la semano venènto e belèu que se n’en parlara encaro un brigoun de la rèino d’Arle e de tout ço que fai lou tourdouloun autour d’acò. D’eici aqui, sigués fièr e gaiard. Vous brassège amistousamen. Brave mounde adissias !
felip