20 novembre 2024
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
LI ROUGE DÓU MIEJOUR 1
........................
Brave mounde, bèn lou bon-jour en tóuti… La dimenchado en rèire, lou flame majourau dóu Felibrige Jan-Bernat Plantevin venguè au rescontre di felibre de la mantenènço de Lengadò-Roussihoun pèr alarga ‘no counferènci à l’entour dóu libre de Fèlis Gras Li Rouge dóu Miejour. Pamens parla dóu libre impauso de dire quàuqui mot à respèt de l’autour. Es bèn entendu Jan-Bernat Plantevin que parlo… Fèlis Gras nasquè lou 3 de mai 1844 à Malo-Mort-dóu-Comtat dins la Vau-Cluso. Sourtiguè d’uno famiho qu’avié lou dequé, de mounde qu’apartenien à ‘no longo lignèio de prouprietàri, de bourgés de vilage proun couneigu e respeta. Fèlis Gras manjavo dins si dès an quand fuguè fisa au coulège dóu pichot Seminàri de Santo-Gardo à Sant-Deidié, coumuno de Vau-Cluso, que se trobo entre Perno-li-Font, Venasco e Mazan, pèr ié faire d’estùdi segoundàri. De 1858 à 1860, Fèlis Gras perseguiguè sis estùdi au pensiounat di Fraire dis Escolo Crestiano de Beziés. Roso-Anaïs, sa sorre cavè founs tambèn sis estùdi e se sarrè di pouèto prouvençau. Au mes de setèmbre 1862, i Jo Flourau de n-At dins la Vau-Cluso, rescountrè Jóusè Roumaniho e tóuti dous se maridèron l’an seguènt. Pèr tourna à Fèlis Gras, en 1863, manjavo dins si dès-e-nouv an quand s’istalè en Avignoun e cinq an de tèms èro clergue encò dóu noutàri Pau Giera, prouprietàri dóu castèu de Font-Segugne à Castèu-de-Gadagno, que fuguè tambèn un di primadié dóu Felibrige. Li liame proufessionau e famihau venguèron ajuda la voucacioun neissènto d’escrivan de Fèlis Gras que trèvavo de mounde sourti dóu mitan de la pouësìo franceso e prouvençalo : Frederi Mistral segur, Estefan Mallarmé, Antòni e Pèire Grivolas, artisto-pintre, mai tambèn Anfos Daudet, Pau Arene, Prouspèr Mérimée, Guihèn Bonaparte-Wyse e l’aurre. Alor fau dire que lou jouine afouga de pouësìo prouvençalo èro un rouge esmara au mitan di blanc. Pamens soun afougamen felibren tant fort sachè faire óublida sa coulour poulitico. En 1868, à la fin dóu segound Empire Fèlis Gras qu’èro dins 24 an s’istalè pèr noutàri à Vilo-Novo-d’Avignoun. En 1871, escriguè ‘no pèço que fuguè enebido La Carmagnolo pèr l’encauso de soun caratère insurreiciounau. En 1876, fuguè publica Li Carbounié, uno epoupèio en douge cant, en recouneissènço di Carbounié dóu Ventour. La memo annado de 1876, Fèlis Gras fuguè elegi majourau dóu Felibrige, Cigalo dóu Ventour. Lou 22 de mai 1878, se maridè ‘mé la neboudo de Roumaniho, Jousefino Peireto Garcin. Dous enfant nasquèron d’aquelo unioun : Pèire en 1879 e Angelo en 1880. Es en 1879 que Fèlis Gras venguè juge-de-pas en Avignoun. En 1880, Fèlis Gras acabè soun segoun libre Toloza. Aquéu libre meteguè la papauta en accusacioun (emé la crousado albigeso) e soun bèu-fraire Roumaniho refusara de l’estampa estènt que pèr éu lou prouvençau dèu servi pas qu’à manteni lou pople sus lou camin de la vertu tant bèn poulitico que mouralo. Pamens, fuguèron pas ‘quéli vertu qu’empachèron lou sa de Beziés pèr li crousa dóu Nord. En 1883, nasquè Daniso, sa segoundo fiho. En 1887, Fèlis Gras publiquè encò de l’editour parisen Aufred Savine soun Roumancero prouvençau, que ié caupon pouèmo e cansoun. En 1890 venguè lou tour dóu Catechisme dóu bon Felibre que pareiguè dins lou journau L’Aiòli. Jóusè Roumaniho, bèu-fraire de Félis Gras e ouncle de soun espouso, se mouriguè en 1891. Dóu cop Fèlis Gras fuguè elegi lou 11 d’avoust 1891 e sènso escrutin, Capoulié dóu Felibrige e lou rouge sucediguè au blanc. Lis edicioun Roumaniho beilejado pèr Roso-Anaïs Roumaniho, véuso, publiquèron Li Papalino, premié libre en proso de Fèlis Gras qu’es uno satiro, un serventès dóu premié papo d’Avignoun Clemèn lou cinquen. Es de marca qu’en 1892, li felibre fuguèro acusa d’èstre de separatisto. En aquelo escasènço, Fèlis Gras e Teoudour Aubanel cridèron d’uno souleto voues : « Vive la Franço ! » En 1895, Gras acabè l’escrituro de soun libre Li Rouge dóu Miejour. Aquéu recit epi meravihous couneiguè ‘no istòri de requisto qu’es encaro mau-couneigudo à l’ouro d’aro. Bono-di lou majourau Jan-Bernat Plantevin qu’eiretè de la cigalo de Fèlis Gras, vuei poudèn counèisse li particularita d’aquéu cap d’obro. E coume quàuqui mot sus Li Rouge dóu Miejour bastarien pas pèr resumi coume se dèu un libre tant poulit, anan en parla un brigoun vuei e gardaren lou mai bèu pèr lou cop venènt. Alor disen soulamen que dins lou libre caupon un rouman emé un founs d’istòri à respèt de la Revoulucioun Franceso. D’efèt, l’istòri conto lou mouvemen di Federa de Marsiho que se gandiguèron à Paris pèr coucha la famiho reialo dóu Palais di Téularié. Soulide que n’en diren lou demai pèr lou menut lou cop venènt.
Vaqui, aro la crounico es acabado, tourne dire mi gramaci calourènt au felibre majourau Jan-Bernat Plantevin e dich acò, vous doune rendès-vous la semano venènto. D’eici aqui, avanças d’un pas lèri e tenès-vous fièr e gaiard. Vous brassège amistousamen. Brave mounde adissias !
felip
