LIS ERMAS PAR FELIP REIG SUR RADIO NÎMES - MISTRAL BOUTANISTO

31 janvier 2025
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

-------------------------------------------------------------------------------------

MISTRAL BOUTANISTO


Brave mounde, bèn lou bon-jour en tóuti… Vuei, i’a quicon que me tafuro… Quàuqui jour en rèire legiguère dins lou journau que lou Secours Poupulàri festejè si vuetanto an d’eisistènci. Galeto di rèi, vin emé vo sènso bulo, rire, gau e l’aurre. Fau-ti n’èstre fièr d’acò ? D’autant que demié tóuti aquéli qu’èron presènt à-n-aquelo fèsto, n’i’avié pas un soulet qu’èro ja aqui i’a vuetanto an. Iéu pènse que poudran bèure tout lou vin de la croto s’un jour poudèn barra lou « Secours » estènt qu’acò voudra dire que i’a plus degun en quau fau pourta secours. De cop que i’a coumprene pas lou mounde mounte sian. Enfin…
En 2024, lou Felibrige festejè soun anniversàri cènt setanten. Es à dire que poudèn pensa que tout es esta di sus Frederi Mistral. Se trobo que noun. Pèr eisèmple, se poudèn questiouna sus la santa dóu pouèto de Maiano. Emai prenguèsse lis aigo à Grèus-li-Ban, semblarié qu’èro en bon pourtamen, tant sarié meme que se pourtè coume blad d’óuriero. Basto, n’en counvène, i’a pas rèn d’interessant à cava mai founs aquelo questioun… Dimenche 19 de janvié en Arle, Doumenico Serena-Allier, counservatriço ounouràri dóu Museon Arlaten e mèmbre de l’Acadèmi d’Arle alarguè ‘no counferènci sus lou tèmo : lou jardin de Frederi Mistral : entre souveni d’enfanço, literaturo e regiounalisme. Verai que degun veguè un jour Frederi Mistral carga lou coustume de Micoulau lou jardinié. Se saup dóu meme biais qu’èro pas éu lou Felibre di pèd terrous, èri lou Tòni Béraud de Mandiuel. Se counèis pèr lou Pouèto de Maiano quatre oustau : lou mas dóu Juge, l’oustau dóu Lesert, l’atuau museon Mistral e la capoucho blanquinello au cementèri. Li simbole qu’ornon soun oustau à-n-éu es un liame entre sa propro creacioun e lou Felibrige. Es uno signaturo pouëtico, ço diguè madamo Serena-Allier. Se souvenèn dins Memòri e Raconte de sis escapado quand èro un enfantoun, pèr ana bela lis iris d’aigo jaune e que tournè au siéu lou cuou bagna. Pèr ço qu’es dóu jardin dóu Mèstre, lou de vuei a pas rèn de vèire emé lou dóu tèms de Mistral. Encaro que sabèn pas en dequé ressemblavo d’aquéu tèms. Se saup qu’èro lou jardin de l’oupulènci. Mistral avié crea un perterro emé de pervenco, signe de prouvençalita, avié planta dous óume, vint-e-cinq laurié d’Apouloun que ié dison tambèn laurié-sausso, belèu en referènci à Petrarco que quand s’èro basti un oustau à la Font de Vau-Cluso avié mes dous jardin qu’un èro reserva pas que pèr de laurié. Mistral avié mes tambèn un magnoulié, un aubre-de-Judas, d’aubre fruchau, d’àutri flour e d’àutris aubre. Pèr un « jardinet pas plus grand que lou moucadou de Mirèio », ço diguè dins Memòri e Raconte, li vegetau èron en abounde… Dich acò, l’interès de Mistral pèr la boutanico èro inmènse. Mai que tout, poudèn afierma qu’avié un soucit etnougrafi que faguè que s’interessavo tambèn i vertu di planto. Tre 1848 recampavo ja d’entre-signe sus aquel item. Basto de vèire dins soun Tresor mounte i’a mai de tres cènt referènci pèr l’óucurrènço « erbo ». À l’óucurrènço « jardin », Mistral cito jardin fruchau, jardin flouristo, jardin d’ourtalaio e jardin campèstre. Dounc de dela di referènci óubligatòri, fasié bèn la diferènci entre li jardin. Li couneiguè tóuti, entre lou mas dóu Juge, l’oustau dóu Lesert e lou siéu oustau. S’agissié pèr éu de trouba soun equilibre dins un councèt que lou mestrejè de cap en cimo. I’a pièi un detai que ié fau regacha de proche. Soun oustau se douno d’èr emé lou d’un noutable, es pas ‘n oustau de l’estile prouvençau. Pamens dins soun jardin i’avié – e i’a encaro – uno font agricolo, simplo, em’un roubinet desesperamen banau. Acò nous forço la man pèr leva lengo à l’entour de l’aigo. Sènso aigo, ges de jardin. Es verai que dins lou relarg de Maiano, i’a d’aigo en pertout dins lou sòu. Basto de vèire lou noumbre d’ourtoulan que i’a dins lou relarg. E dins soun obro literàri, poudèn faire la mesuro de l’improurtanço de l’aigo, sènso parla dóu Pouèmo dóu Rose. Souvènti-fes, es questioun d’uno font : « Quand avès set, uno font d’aigo vau-ti pas mai qu’uno font d’or ? », o encaro « E s’avian jamai de gròssi plueio, quau es qu’avenarié li pous e li sourgènt, li font e li ribiero ? Fau de tout, mis enfant ! » tout acò’s dins M&R, ounte i’a vint-e-quatre fes lou mot « font ». E dequé dire de Font-Segugno e de si de sourso que i’a sèmpre d’aigo que rajo dins un pesquié ? Alor belèu que se fau dire qu’avèn panca tout di à l’entour de Frederi Mistral. Soulide.
Gramacìe calourentamen madamo Doumenico Serena-Allier. Vaqui, aro la crounico es acabado, vous laisse à la vostro refleissioun e vous doune rendès-vous la semano venènto. Un cop de mai tenès-vous fièr e gaiard. Vous brassège amistousamen. Brave mounde adissias !
Felip