
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
MURET 1213
.............................................
Brave mounde, bèn lou bon-jour en tóuti… Pèr èstre sincère, deve dire que, de cop que i’a, lis idèio soun de manco. De que voulès ? Poudèn pas sauta de la cabro à la periero tout lou sanclame dóu jour sènso counèisse, tèms en tèms, un proublèmo. À-n-un moumen douna li causo se mesclon. À pausado, farié mestié de poudé pausa lou craioun e chifra un brigoun en tout acò pèr tira de plan. Verai, pamens aqui lou tèms es de manco, éu tambèn. Dich acò es de recounèisse que sian jamai desespera estènt que i’a toujour uno pisto que se trais di nèblo de la pensado. Pèr ansin, recebère i’a pas gaire de tèms lou libre que pareiguè encò de l’editour Vent Terral que soun titre es Muret, 1213, la bataille decisive de la croisade des Albigeois. Aquest libre es uno reviraduro de l’espagnòu dóu libre ecri pèr Martin Alvira Cabrer qu’es un proufessour titulàri à l’Universita coumplutènci de Madrid. Perqué « coumplutènci » vo « complutense » en franchimandeja ‘no idèio ? Simplamen pèr-ço-qu’èro la souleto universita espagnolo qu’acourdè lou titre de dóutour à la fin dóu siècle XIXen e à la debuto dóu siècle XXen. I’an mes tambèn « la Docta », l’université publico mai anciano de Madrid. Aquest libre d’aqui parlo pèr lou menut de la crousado albigeso sa preparacioun e di counsequènci de soun debana e de sa sourtido. N’en poudren tourna parla d’aquéu libre que sara presenta à Salinello lou dissate 17 de mai e que belèu, de mounde se podon demanda en dequé sèr ? Justamen, la responso se trobo dins un autre libre, un libret pulèu, lou de Simono Weil la filousofo, l’Ispiracioun Óucitano, publica en 2014, mounte l’autour evaluo la pourtado di 214 laisso e di quàsi 9 500 vers de la Cansoun de la Crousado. Simono Weil vèi la Canson de la Crousado coume un temouniage precious d’uno periodo essencialo de l’istòri de Franço e un episodo clau de l’istòri de la civilisacioun óucidentalo. Es un sujèt impourtant quand sian à pensa mounte n’en sarian vuei se li crousa avien couneigu la desfacho aquéu dijòu 12 de setèmbre 1213. Verai, quau s’es pas pausa ‘quelo questioun. Simono Weil acoumoulo li coumparesoun emé l’Iliado d’Óumero, tant dins la puissanço dis acioun que dins li noucioun d’ounour coume lou parage. Emé de mot grèu de sèn orgolh, engan, pretz, mercés, drechuro e l’aurre. La sensibleta de Simono Weil sourgènto pas que lou rèire-plan ideoulougi coume lou catarisme, l’autour s’interèsso i coundicioun de vido dóu mounde emé l’Inquisicioun, lou sa de Beziés, li segnour faidit, l’acioun dis autourita religiouso, li denounciacioun, lis arrestacioun arbitràri, li discriminacioun, etc. Tourne sus uno civilisacioun en plen vanc e que se troubè à l’agounìo. La vilo de Toulouso es pèr Muret ço que Troio es pèr l’Iliado. Es de marca que dins aquelo guerro religiouso, i’a ges… de religioiun, tant es verai que i’avié ges de dissencioun, à quicon proche, dins la ciéuta de Toulouso demié sis aparaire. Lou malastre que toumbè sus la vilo aurié pouscu coungreia l’ahiranço envers lis eirege ou l’ódi di catouli. I’aguè ni l’un, nimai l’autre. Acò’s la provo que lis idèio noun se turtavon, pamens circulavon. Em’acò, pas mai. Li Catare e li catouli vivien costo à costo e lou cho de la terrour pousquè pas li dessepara. Es lis armo dóu mounde que davalavon dóu Nord qu’impausèron la coustrencho. Dóu cop la liberta espiritalo periguè e ressuscitè jamai. Sian à se demanda se de dela de la religioun, lou Nord voulié pas tua ‘no civilisacioun cavaleirouso. Simono Weil afiermè : « Ansin, à nosto epoco encaro, tóuti soufrèn tóuti li jour di counsequènci d’aquelo desfacho ». Lou pople de Toulouso se soumeteguè i vincèire que fuguèron pas en chancello pèr l’umilia e l’escarni. Aquelo plago se rebarrè jamai. Lis ome libre venguèron, riboun-ribagno de guerrié, pamens abandounèron sis idèio e si counvicioun. Aquelo crousado tué tambèn li sentimen de respèt e d’ounour.
Lou libre de Martin Alvira Cabrer respond en tóuti li questioun o pau se n’en manco que lou mounde se podon encaro pausa vuei à l’entour d’aquelo batèsto istourico e que chanjè lou cours de l’istòri. Lou fau legi pèr se senti un enfant dóu Miejour. Soulide.
Vaqui, aro la crounico es acabado, vous laisse à la vostro refleissioun e vous doune rendès-vous la semano venènto. Un cop de mai tenès-vous fièr e gaiard. Vous brassège amistousamen. Brave mounde adissias !
Felip