25 avril 2025
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
UNO VENDETO EN AVIGNOUN
Bràvis ami, bèn lou bon-jour en tóuti… Pèr pau que se boutan à regacha de proche l’istòri de la vilo d’Avignoun, se poudèn rèndre comte di bèlli pajo que se soun escricho dins la Ciéuta papalino, à coumença justamen pèr la presènci di papo dins li bàrri avignounen, un afaire que nous remando au siècle quatourgen. Pamens quand se legis aquéli pajo d’istòri sian pas à nada dins l’aigo roso e se n’en manco. E pèr aquéli qu’amon de viéure dins lou passat i’a de grame à tria. Poudèn afourti que de toustèms, Avignoun fuguè ‘no ciéuta cousmoupoulito Li famiho que ié venguèron d’en pertout planta caviho èron de banquié, negouciant e èron tóuti dóu gros grum de la soucieta. La pajino que m’agrado de vous n’en parla vuei conto un drame que se jouguè entre 1606 e 1614 e que lis istourian ié meteguèron Uno Vendeto en Avignoun, vendeto que vèn de l’italian vendetta. D’aquéu tèms, à vegado, de tempèsto bourroulavon lou cor de la ciéuta di Papo en ribo de Rose. E lou meiour d’acò, estènt que lou cop passa parlerian di famiho flourentino di Galiani vo Galéans e di Guadagni que dounèron soun noum à Castèu-Nòu de Gadagno, es que veiren li famiho Galéans e Baroncelli emplicado dins aquel afaire. Basto, sabèn que li garrouio e li rivalita s’encagnèron en Itàli ‘mé la counjuracioun di Pazzi lou 26 d’abriéu 1478. Pèr tourna à noste item, à l’óurigino dóu coumplot, lou papo Siste IV, nascu Francesco della Rovere pratiquè le nepoutisme de la grand escalo en favour de si bastard e de si nebout. Pèr ansin, voulié óufri lou fièu de la segnourié d’Imoula à soun nebout Girolamo Riario. Pèr acò faire demandè un prèst d’argènt i Médicis qu’èro la famiho la mai pouderouso de Flourènço. Pamens Laurèns de Médicis avié, éu tambèn, uno visto sus aquelo segnourié e la famiho Médicis rebutè la demando dóu Papo. Acò rai ! Girolamo s’adreissè i rivau di Médicis, à la famiho Pazzi, uno autro grando famiho de banquié de Flourènço. Verai, li Pazzi èron mau-countènt d’agué esta priva pèr l’encauso di Médicis d’ùni founcioun fruchouso, coume aquelo de la founcioun de viguié de Flourènço e l’afaire s’enverinè ; li raisso de soutiso dis un sucediguèron i vitupèri dis autre e lis escorno, is óufènso. Bèn talamen que l’ounour dis un e dis autre èro en jo e souleto la mort poudié lava li counchaduro e li brutisso. Dòu cop, lou cap de filo di Pazzi sautè sus l’óucasioun pèr regla soun comte i Médicis. Pèr acò faire, ourganisè ‘no couspiracioun emé lou soustèn de l’archevesque de Piso Francesco Salviati, sourti éu tambèn d’uno grando famiho de Flourènço que rintrè au service dóu papo Siste IV en 1471. Francesco Salviati fuguè pièi nouma archevesque de Piso en 1474, pamens restè proche di nebout dóu Papo, Girolamo e Pietro Riairo della Rovere. Adounc, aquéu Salviati èro contro li Medicis e defendié lou Papo. De coutarié se coustituïguèron autour di principàli famiho e veguerian s’óupausa autour de la famiho Crillon, Jan e Jaque de Baroncelli, Bernart Bandini Baroncelli, la famiho Berton, li Sade et d’autre contro lis Issart emé Li Galéan noumbrous, la Meisoun de Fortia e l’aurre. Lis espaso sourtiguèron de soun fourrèu, li dago tambèn e ma fisto, daut ! e pau enchauguè au mounde li counsequènci. Pamens, tre l’endeman, d’ouro, vai-ti pas que Toumas de Baroncelli e Carle de la Royère piquèron à la porto de l’oustalarié di Galéan. Aqui, i’avié lou chivalié Francés de Galéan, lou baroun de la Roche e Louvis de Galéan. Toumas Baroncelli, cousin german de Francés de Galéan counèissié li liò e l’anè querre dins sa chambro. Baroncelli, espaso en man, entrinè Francés dins la grand salo e sènso faire d’espèro fasié gravamen d’ascle à soun ounour. Francés prenguè pòu pèr sa vido e dounè dous cop de dago dins lou còu de Baroncelli e ‘n autre à ‘no autro partido de soun cors. Toumas Baroncelli toumbè rède mort. Li bramadisso aguèron lèu fa de faire veni La Royère que bataiè proche ‘mé Louvis de Galéan e La Roche e que se rounsè sus lou Chivalié Francés de Galéan pèr lou pica de sa lamo. Pamens, un varlet de chambro s’entre-pausè e la lamo de l’espaso lou traversè. Éu tambèn s’abóusounè de mourre, rede mort. Tres àutri varlet arribèron e s’arrapèron d’espaso pèr defèndre si mèstre. La Royère, nafra éu-meme, escampè soun espaso pèr sòu e aguè lèu fa de garça soun camp. Emai li cieutadan fuguèron tóuti
esbaubi de l’ourrour, à-n-aquéu premié muertre n’en seguissié ‘n autre en 1612 après l’eleicioun de Francés de Galéans que dounc fuguè pas puni pèr lou muertre de Toumas Baroncelli, coume premié conse. Soun fraire Louvis de Galéans tuè Jaque de Baroncelli, chivalié de Malte e fraire de Toumas de Baroncelli. Coume se vèi, li Galéans e li Baroncelli fuguèron enemi long-tèms, subre-tout au siècle dès-e-seten. Es de saupre qu’aquéli dous crime demourèron impuni, d’abord que l’autourita roumano impausè ‘no recounciliacioun i dos famiho. Soulide.
Aro la crounico es acabado. Vous doune rendès-vous la semano venènto. D’eici d’aqui, tenès-vous fièr e gaiard. Vous brassège amistousamen. Brave mounde adissias !
Felip
