Lis Ermas - Rescontre literàri de Salinello

23 juin 2022
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

RESCONTRE LITERÀRI DE SALINELLO
Cars ami, lou bon-jour en tóuti e siegues li bèn-vengu dins nòstis ermas. Aquest an, pèr lou tresen cop, auren lou bonur e la joio de viéure li Rescontre literàri de Salinello. Pau Martin, istalè aquéu rendès-vous à Salinello, proche Soumèire e, lou fau bèn dire, l’idèio faguè camin. Tre la premiero annado nous pousquerian rèndre comte de la qualita d’aquéli rescontre emé d’editour, d’autour, d’artisto, de mounde bèn-voulènt, d’ami de la lengo e de la culturo nostro. De persouno de trìo fuguèron counvidado e escouterian la premiero annado uno voues que nous es de manco vuei, aquelo de Frederi-Jaque Temple. Pousquerian ausi tambèn de counferènci, de presentacioun de libre dins li categourìo medeviau, pouësìo e literaturo, de councert e lou sèr, i’a lou balèti. Pamens, lou cèntre dis interès es la literaturo d’o. Pèr l’edicioun 2022 que se debanara dóu 24 au 26 de jun, lou prougramo es chanu. Lou divèndre 24 de jun tre vuech ouro, i’aura à la capello Sant-Julian uno serado medievalo emé Felip Martel e Miquella Stenta. Lou dissate 25 tre lou matin à dès ouro, souto la beilié de Flourian Vernet, i’aura uno taulo redouno e uno counferènci de Silvìo Fraïsse à l’entour de la nouvello en óucitan e en Gascou, emé de tros de leituro. Lou tantost, i’aura la siesto pouëtico à l’Aurenjarié dóu Castèu, emé un óumage i pouèto despareigu : Sèrgi Bec, Glaudo Salvagno, Jan-Marìo Petit e Miquèu Decor. En seguido i’aura de leituro e de conte pèr lis enfant emé Catarino Ramoundo. À cinq ouro de tantost, la capello Sant-Julian aculira de pouèto e de pouëtesso e la serado festivo se debanara pièi dins lou pargue dóu Castèu, pièi,i’aura l’animacioun de l’Espàci editour e à nòuv ouro de vèspre, un councert emé Lou Cor de la Plano. Vaqui pèr vous douna belèu l’envejo de veni escouta la colo de Manu Therond  tros de musico
Lou dimenche 26, à l’Aranjarié dóu Castèu, tre 9 ouro de matin : Agriculturo e tradicioun emé dos counferènci emé Jan-Felipe Martin e Jan-Nouvè Pelen e Nicolo Coulomb. En seguido à Vounge ouro d’uno counferènci emé Amy Cros. Pendènt la durado di rescontre, i’aura d’espousicioun, lou saloun di libre d’o, la presènci d’editour, de revisto emé ma la Marpoc, lou CREDD’O, Édite-moi, Jorn, l’Aucèu Libre, Aquò d’Aquí, Òc, lou Felibrige, Li Nouvello de Prouvènço, Letras d’Òc, Papiers coupés, Édition des Monteils e l’aurre.
Se voulès d’entre-signe, basto de souna lou 06 84 90 73 92, vo lou 06 23 53 25 32. Soulide.
Vaqui, aro la crounico es acabado. Vous doune rendès-vous la semano venènto. D’eici aqui, gardas l’esperit siau e tenès-vous fièr. Vous brassège amistadousamen. Brave mounde, adissias !
Felip