Lis Ermas - Rescontre literàri de Salinello 2

30 juin 2022
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

RESCONTRE LITERÀRI DE SALINELLO

Cars escoutaire, lou bon-jour en tóuti e siegues li bèn-vengu dins nòstis ermas. Mis amis ! qùnti bèlli rescontre literàri avèn viscu à Salinello. Es simple, tre rintra au miéu, après agué parteja un darrié repas ‘mé lis ourganisaire, i’avié ja quicon que m’èro de manco. L’ambianço generalo, la qualita dóu mounde que venguèron, lis ami que li vesèn cade an à Salinello. Aquelo iniciativo de Pau Martin que beilejo l’oustau d’edicioun que ié dison L’Aucèu Libre que conto pas sis esfors emé Marìo-Eleno pèr faire en modo que tout se debanèsse dóu miéus que se pòu, pèr respondre en tóuti ‘mé forço paciènci e forço gentun. Pamens, sabèn tóuti, que l’encensié, de lou faire vouga noun fa fourçadamen li bèllis amista. Cercas pas acò dins la Clau dóu Tresor, lou vene d’enventa, ispira que siéu pèr l’esperit d’aquéli Rescontre à l’entour de la lengo e la culturo nostro. Basto dins lis Ermas, sian sèmpre à dire ço qu’avèn dins lou cor, em’acò, pas mai. Alor lou bèu e lou verai èron ounnipresènt à la Capello Sant-Julian, vo proche lou rode subre-bèu dóu lavadou que i’a de tèms se i’ausis plus ni la voues di femo, nimai lou rire dis enfant. I’a tambèn lou pargue dóu castèu que recampè pendènt gaire mai d’un parèu de jour d’editour, d’escrivan, de counferencié, lou publi e li media. Iéu, me vole ramenta d’aquéli bon moumen que coumencèron sus d’èr de musico óurientalo emé la voues suavo de Naima Chemoul à l’entour dóu cant di femo sefarado, qu’èro acoumpagnado pèr Nawras Ibrahim que faguè mirando emé soun lahut. La musico embeliguè li counferènci de Felip Martel qu’em’éu faguerian la remountado dins lou tèms pèr parla di relacioun di troubadou emé l’Espagno e l’Itàli, mentre que Miquella Stènta alarguè sa dicho à respèt de la grando damo que ié disien Alienor d’Aquitàni, e de soun biais d’espandi la lengo óucitano encò dis Anglés. Pèr lou demai, siéu segur que Brunò de la radiò, qu’èro presènt emé nautre, parlara de tout acò pèr lou menut. Lou dimenche de sèr, me plantave pièi davans lou fenestroun encò miéu e, quatecant, tournère à la realita, la tristo realita de noste mounde, mounte la maje part di gènt marchon sus la tèsto, mounte fournigon d’espèrt de touto meno que nous volon aprene de qunt biais nous fau mena nosto vido. Ço que pènse dis espèrt, es que se couneissien soun mestié, e bèn lou farien. Verai qu’à Salinello, n’i’aguè d’espèrt, de vertadié, qu’éli soun mestié, sa lengo e sa culturo la counsèisson mai-que-mai. L’esperit fraternau di Rescontre de Salinello es uno terapìo eficace contro lou mal-èstre, lou mounde se prenon pas la tèsto, soun naturau e soun sèmpre aculissènt. Aqui, lou mot « Rescontre » pren tout soun sèns e n’en rescountrerian de mounde qu’es pas rèn de dire. Se recouneiran li qu’em’aquéli, pousquerian escambia quàuqui mot. Ço de dire, es que la literaturo d’o es proulisso e n’espelis de libre coume aquest an emé Jan-Ive Casanova e Maëllo Dupon e diren jamai proun la necessita d’èstre di revisto coume la dóu Felibrige, Òc, Lou Diari e que sabe encaro. Se vèi aqui l’intérès de fourma de legèire tant que poudèn, n’avèn lou devé pèr faire viéure aquelo literaturo. Tout aquéli qu’ensignon la lengo que siegue is enfant, i licean, is estudiant vo is adulto an de lou prene en comte. Es uno respounsableta di grando. Li sesiho de travai noun empachèron de rire, e de cacalas, n’i’aguè tambèn. E vague de rire. La participacioun dis calandretoun nimesen fasié gau de vèire tambèn que venguèron legi de tros de pouësìo de pouèto qu’an despareigu. Osco ! à-n-éli. Lou dissate, à vèspre, se debanè un acamp en presènci dóu Cirdoc e de la Regioun Óucitanío pèr basti un proujèt que sa toco sarié de baia d’ajudo à l’edicioun pèr assabenta lou mounde di nouvéuta literàri pèr eisèmple en créant uno banco de dounado giganto. Acò permetrié de vèire tóuti li relarg dóu Miejour de Franço recampa. Basto qu’acò se faguèsse lèu ! Lou dissate de sèr avèn agu lou flame councert dóu Cor de la Plana pèr clava aquelo poulido journado. L’ourganisacioun d’aquelo manifestacioun douno uno mountagno de travail, pamens lou bonur qu’aduson aquéli Rescontre es grandaras tambèn. Gramaci Pau, Marìo-Eleno e tóuti li pichòti man qu’an oubra pèr qu’acò venguèsse poussible. Se disèn simplamen à l’an que vèn. Soulide.
Vaqui, aro la crounico es acabado. Vous doune rendès-vous la semano venènto. D’eici aqui, gardas l’esperit siau e tenès-vous fièr. Vous brassège amistadousamen. Brave mounde, adissias !
Felip