Lis Ermas - Roumavage Nacioun Gardiano

07 décembre 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

LOU ROUMAVAGE DE LA NACIOUN GARDIANO


Cars ami, lou bon-jour en tóuti. I’a quàuqui semano, à la fin dóu mes d’óutobre, li 22 e 23, se debanè à Lourdo lou Roumavage de la Nacioun Gardiano. Èro lou dès-e-nouven, eisatamen. Aquéu roumavage tourno à cha dos annado, lis annado par. Aro, aquelo manifestacioun es ourganisado lis annado impar, pèr l’encauso de la couvido que sautè uno annado. Aquelo aventuro fuguè iniciado pèr quàuqui gardian que Gui Chaptal, lou capitàni atuau de la Nacioun Gardiano n’en prenguè sa part. Pamens lou manadié que ié disien Ive Janin, que mouriguè lou sèt d’avoust 2015, èro lou premié qu’ausissié uno voues que ié diguè de se gandi à Lourdo. Vaqui ço qu’Ive n’en diguè : « Un jour, ausiguère uno voues que me diguè d’ana à Lourdo pèr vèire santo Bernadeto. Ausère pas en parla à mis entour, pamens, i’anère e aqui, Bernadeto me diguè de ié veni emé li gardian. Iéu, ère en chancello. Pamens, lou paire Icher, lou prèire de moun vilage que i’avié counta l’istòri, me baiè d’encourajamen pèr fin que ié venguèsse. Rescountrère lou capitàni de la Nacioun Gardiano d’aquéu tèms, qu’èro Enri Aubanel, lou felen de Folcò de Baroncelli, que se leissè counvincre pèr ourganisa un roumavage emé la Nacioun Gardiano ». Dóu cop, Ive Janin n’en parlè au clavaire Andriéu Rouquairol, soun ouncle que n’en parlè au Counsèu de la Nacioun. Es coume acò qu’Ive Janin, Andriéu Rouquairol e Gui Chaptal, qu’èro l’ajoun au clavaire, se gandiguèron tóuti tres à Lourdo la premiero annado, en 1985. Pamens, prenguèron pas li chivau. Rescountrèron la capelanaio emé lou paire Baraquer qu’èro lou grand direitour dóu santuàri pèr ié demanda s’èro poussible de veni emé li chivau. À la debuto, l’eclesiasti èro pas favourable. Pamens, lou paire Borde qu’èro proche dóu paire Baraquer, avié vist, un jour que s’entournè de Roumo, lou roumavage di gardian i Sànti-Marìo e dounè soun temouniage que li chivau èron siau e brandavon pas. Dóu cop, lou paire Baraquer aceitè en disènt qu’au mendre proublèmo, li chivau sarien enebi à Lourdo. Li representant de la Nacioun Gardiano anèron pièi à l’endavans dóu maire de Lourdo, qu’èro moussu Francés Abadie qu’èro d’acòrdi de vèire veni mai de mounde dins sa vilo, au cor di Pirenèu. E vaqui de quent biais s’endraiè aquel afaire dóu roumavage. À cha pau, lou roumavage prenguè sèmpre mai d’impourtanço em’aquelo particularita, d’abord que lou chivau Camargo es lou soulet animau, leva di chin d’avugle, que trobo d’acuiènço à Lourdo. Despièi se vèi peraqui entre vuetanto e nounanto chivau au roumavage. E de vèire lou mounde que soun pas de Camargo s’espanta en vesènt li gardian d’à chivau emé soun seden es un plasé grandaras. An de mau de crèire que i’a encaro de mounde que travaion em’un chivau. E nautre, sian proun fièr de vèire nòsti tradicioun camarguenco s’espremi de dela di raro de Prouvènço e de Lengadò. En mai d’acò, i’a tambèn quàsi tres cènt raubo d’Arlatenco que soun de tóuti li coulour de l’arc-de-sedo. Daumage que, de cop que i’a quand lou tèms es aragnous, lis Arlantenco s’enmantellon dins di gràndi capo de la coulour negro.
Me ramente li mot de mounsegnour Cristòu Dufour, archevesque de z-Ais e d’Arle que diguè soun emoucioun quand vesié la fervour dóu mounde miejournau, que venguèsson de Prouvènço vo de Lengadò. Lou capoulié dóu Felibrige En Jaque Mouttet ié vèn cado fes emé Iveto sa gènto espouso pèr ounoura la counvidacioun de la Nacioun Gardiano. Lis óufice soun celebra en lengo emé de couralo de trìo, subre-que-tout, la de Rougnouna, uno viloto proche de Maiano e Gravesoun. Es de saupre que lou premié prèire que diguè la messo en lengo fuguè sanciouna pèr l’autourita religiouso. Èro pèr la Sant-Vincèn, lou 23 de janvié 1966, dins la glèiso di Baus-de-Prouvènço que l’abat Debernardi diguè, pèr lou premié cop dins l’istòri de Prouvènço, uno messo en prouvençau, emé lou Pater de Mistral. Acò agradè au Felibrige, pas forço is autourita eclesiastico qu’avien pòu que fóuclore e liturgìo s’endevenguèsson. L’abat Debernardi s’amoussè lou 26 d’óutobre 1971 e lou Felibrige jamai l’óublidè. Pamens, fauguè espera quàuquis annado pèr fin que la glèiso aceitèsse la lengo dins li messo. Tre que veguèron qu’acò adusié de mounde dins sis oustau, lis eclesiasti èron d’acòrdi et acò lèvo pas rèn à la soulennita dóu moumen. Mounsegnour diguè tambèn : « Fasen l’unioun, fasen l’unita, fasen la pas, meten-nous à l’unissoun di cor ». Verai, coume lou diguè lou paire Michèu Desplanches : « Sian à Lourdo pèr viéure lou mistèri de la fe ». Adounc, lou rendès-vous venènt sara en 2023. En mai d’acò, sara un bèl anniversàri estènt que se festejara lou vinten roumavage di Gardian à Lourdo. Ié fau veni. Soulide.
N’i’aurié encaro de causo de dire sus acò, pamens, pèr aro es acaba. Acò dis vous souvète uno semano di bello e d’eici aqui, tenès-vous fièr e gaiard. Brave mounde, adissias !
Felip