LIS ERMAS - TRADICIOUN CALENDALO 2

09 janvier 2023
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

--------------------------------------------------------------------------------------------------

TRADICIOUN CALENDALO 2


Mi cars ami, mi saludacioun calendalo en tóuti e gramaci de nous escouta. Lou darrié cop, avèn parla dóu blad de la Santo-Barbo e avèn baia d’entre-signe à respèt de l’óurigino di sustantiéu crècho e belèn. Vous prepause vuei de parla di simbole que caupon dins la crècho e de la genèsi d’aquelo tradicioun.
Premié fau que, dins la crècho, lis elemen ié siegon representa : l’aigo, lou fiò, l’èr e la terro, qu’aquélis elemen coumpauson l’univers. La terro, es ounnipresènto dins la crècho, souto la forme dóu sòu que se coustituïs de papié, de pichot caiau e l’aurre. Fau marca que la roso de Jericò e li sietoun de blad simboulison tambèn la terro boulegado e fruchouso. Lou fiò es simboulisa pèr la lus qu’escleiro l’estable. Pòu èstre tambèn uno bougìo, vo lou calèu tengu pèr un santoun que ié dison Roustido. Lou papié que poudèn metre en founs, emé lou cèu e lis estello douno uno idèio de la lus celestialo. L’aigo es representado pèr uno font, uno ribiero que la poudèn faire emé de papié d’aluminion. L’èr enfin es presènt bono-di lou moulin de vènt. Pamens pèr lou vènt, la simboulico que m’agrado miéus es lou santoun que ié dison lou cop de vènt. Es un santoun clina pèr teni targo au vènt-terrau, es un ome, un vièi pastre encapela que cargo uno jargo e tèn soun capèu de la man. Em’aquéu santoun, lou vènt es superbamen representa e es un chale vertadié de lou remira. Aquéu ventaras que boufo, qu’ourlejo dins la nue coume un desespara, coucho li nivo dóu cèu que vèn linde. Ansin, poudèn vèire lis estello qu’uno dintre éli es mai impourtanto : l’estello dóu pastre qu’aviso lou mounde que i’a quicon de meravihous que se preparo e que baio d’entre-signe pèr moustra lou camin de segui.
Lou pichot pople di santoun que soun dins sa bouito de cartoun, enmantela dins lou coutoun desempièi uno pichoto deseno de mes o gaire se n’en manco, s’esvihon e an bèu pas boulega nous fan chifra coume s’èron anima, abita pèr uno amo. Ato pièi ! soun-ti pas ‘bita pèr uno amo ? Fau pas óublda pièi de pausa li rèi mage que ié dison Gaspard, Marchioun e Bautezar, premié, luen de la crècho e entre lou 25 de desèmbre e lou 6 de janvié li fau faire se sarra cade jour un pau mai dóu belèn estènt qu’aduson à l’enfant Jèsu, la mierro, l’encèns e l’or. Li santoun van demoura ‘qui enjusqu’au dous de febrié, jour de Candelouso, pèr clava la quaranteno dóu cicle de Nouvè qu’es tambèn lou jour di relevaio de la Vierge Marìo. Aquelo tradicioun de la crècho animado dato de l’age mejan. En 1223, lou qu’èro pèr veni sant Francés d’Assiso que foundè l’ordre di Franciscan e qu’es aro lou sant partroun di santounié presentè au Castèu de Greccio en Itàli, uno crècho vivènto. Aquéli persounage venguèron pièi de pichot persounage de ciro, de bos, de gip e meme de mico-pan o encaro de papié, vole dire de papié mastega, qu’èron vesti ‘mé d’estofo qui li poudien vèire pas que dins li glèiso. Pamens à la Revoulucioun franceso en 1789, la decision fuguè presso de barra li glèiso pèr fin de teni targo à ‘n clergié enfluènt, saberu e deçaupu pèr la Revoulucioun, un clergié que rebutè la pensado de se plega is idèio revouluciounàri e de vèire si bèn rejougno li caisso de l’Estat. Adounc, en barrant li glèiso, la curìo poudien plus s’óupausa à la messo en plaço de la nouvello poulitico. Dóu cop, pèr garda ço qu’èro vengu ‘no tradicioun, lou mounde se boutavon à istala de crècho encò siéu. Es d’aquéu biais que nasquè aquelo tradicioun. Se dis qu’acò venguè premié en Prouvènço. Emai n’en fuguèsse pas segur, acò’s proubable. En 1798, un moussu Lagnel que demouravo à Marsiho óuservè que la terro ié pegavo is caussaduro. Aquelo terro qu’èro maleablo dounè l’idèio à moussu Lagnel de n’en faire un persounage. N’en fauguè pas mai pèr que li santoun d’argielo nasquèsson. Es de marca que dins la Genèsi de la Biblo es escri : « Adounc lou Segne Diéu fourmè l’ome de la limo de la terro, ié boufè dins la caro l’alen de la vido, e l’ome fuguè fa em’ uno amo vivènto ». En fin finalo, l’uman tambèn venguè de la limo de terro… coume li santoun. En 1800, li crècho tournèron dins li glèiso e moussu Lagnel aguè l’idèio de representa lou mounde de sis entour, li gagno-petit ‘mé lou pastre, lou moulinié, lou vitrié, l’amoulaire, lou pescadou e l’aurre. Li santoun que couneissien aro, nasquèron en aquelo pountannado e aquéli santoun aduson à Jèsu lou fru de soun travai e de cop que i’a, pas rèn. Pèr ço qu’es di rèi mage, dins la Biblo soun pas jamai esta de rèi, avien ges de noum e degun saup s’èron tres. Tout acò empacho pas que la premiero fiero di santoun se debanè à Marsiho en 1803. Desempièi, la crècho es lou doumaine de Jèsu, Marìo, Jóusè, l’ange boufarèu, l’ase, lou biòu, lou curat, lou maire, li pastre, li gènt de mestié, lou ravi, l’avugle e soun fiéu, l’incredule que vòu pas crèire que lou divin enfant es nascu, Pistachié lou paurugas, l’estouna que ié dison badin-badau e jigèt, lou que bretounejavo. Se i’apound d’animau de touto meno e de persouno publico qu’an pas rèn de vèire emé la nativeta, pamens acò douno de belèn poulit mai-que-mai. Li santoun, acò’s l’innoucènço, l’espèr e lou meravihous. Es uno counvidacioun au pantai, es un liame ‘mé l’enfanço. E se trobo que dins aquelo pountannado di fèsto calendalo avèn besoun de bèuta e de bounta encaro mai de coustumo. Soulide.


Vaqui, aro la crounico es acabado. Vous doune rendès-vous la semano venènto. D’eici aqui tenés-vous fièr e gaiard e vous souvète, dóu bon dóu cor un bon bout d’an e de poulìdi fèsto calendalo. Vous brassège amistadousamen. Brave mounde, adessias !

Felip