28 novembre 2022
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
--------------------------------------------------------------------------------------------------
DE QUNT FLANC SE VIRA1
Mi cars ami, bèn lou bon-jour en tóuti e siegues li bèn-vengu dins lis ermas. Souvènti-fes, siéu à me demanda s’ai encaro ma plaço dins la soucieta de vuei. Belèu que vous anas bouta à pensa que passe rego. Es poussible. Pamens tout comte rebatu i’a dequé chifra. Me tourno à l’esperit lou biais dóu mounde pèr fin de trouba uno soulucioun asatado i proublèmo coume se pauson. Einstein disié que l’inteligènci de l’ome es de trata li proublèmo à sa baso vertadiero. Acò sèmblo evidènt. Belèu pas pèr tóuti. À l’ouro d’aro mounte es passa lou service au mounde, à la pratico ? Que siegue à l’espitau, dins li coumerce, lis amenistracioun e que sabe encaro i’a de delai que soun pas de crèire, sènso fin, pèr óuteni uno simplo carto d’identita, pèr prene rendès-vous ‘m’ un medecin, pèr coumenda de marchandiso que soun pas dispouniblo. E encaro quand avès passa un eisamen medicau, avès de vous despatouia ‘mé un ourdinatour pèr agué la resulto. E s’avès ges de machino enfourmatico aurès de vous fisa en vòstis enfant, vòstis ami vo vòsti vesin. Tóuti se n’en trufon de saupre coume farés. E dise pas que que siegue estènt qu’es d’aquéu biais que li causo se debanon dins nosto bello realita d’encuei. Degun es à se demanda coume fan lou mounde qu’an ges d’ourdinatour o qu’arribon pas de se n’en desembouia. La soucieta fai d’avans e laisse darrié lou mounde que podon pas segui la cadènci. Sian dins uno soucieta de dos vitesso. Lou vese dins mis entour tóuti li jour. Avèn afaire à de proufessiounau de pacoutiho, d’especialisto de teatre e ame miéus de rèn dire d’aquéli que decidon, emai i’aguèsse de ràris eicepcioun. De-segur me vesès arriba : « Èro miéus avans ». Verai, la questioun a d’èstre pausado : lou cervèu uman es-ti capable de s’adata à la marcho dóu prougrès ? Fau teni comte qu’avèn panca tout vist. Vous lou dise, deman saren sousprés de vèire l’evoulucioun de la vido vidanto. Aquéli que tiron li feicello lou sabon bèn e ni iéu, nimai vous o quau que siegue se pòu óupausa à-n-aquelo avançado. Ai ! las, aqui se parlo de prougrès teinoulougi, pas de prougrès souciau, vesès ? Pèr coumprene, basto d’eisamina li counsequènci de l’envencioun dóu telefounet, dóu barrulaire. D’un coustat es agradiéu de poudé charra quatecant emé quau que siegue, pèr assabenta sis entour de bòni vo de marrìdi nouvello. Es lou biais pousitiéu de vèire. D’un autre las, sènso nous en rèndre comte, sian óurienta vers uno soucieta de counsoumacioun que, tóuti tant que sian, ié leissèn la brido sus lou còu. Dóu barrulaire, n’avien ges de besoun avans que fuguèsse enventa. La soucieta creè lou besoun sournamen, en nous presentant lou bèu coustat de l’afaire, en escoundant soun coustat catiéu. E ma fisto, l’avès vist, acò marcho poulidamen. Lis aciounàri, de la mouralo, se n’en lavon li man, en revenge pèr ço qu’es dóu gasan se n’en li freton. Quand la causo ecounoumico bouto l’arpo sus un afaire proumetèire, sian despoutenta, tout-bèu-just bon pèr jouga lou role de l’agnèu davans lou loup. Lou barrulaire es pas qu’un eisèmple estènt que n’i’a d’autre. La veituro eleitrico n’es un tambèn. Ja, que i’a pas proun d’eleitricita pèr satisfaire lis afaire quoutidian, fau apoundre lou besoun pèr carga li baterìo di veituro. Lou piège es esta bèn alesti ‘mé li coumtour Linky que van permetre de metre de tasso sus l’eleitricita emplegado pèr ramplaça l’essènci. Fau cerca en quau prouficho la messo en plaço de tàli afaire. La soulucioun en tóuti aquéli situacioun tihouso sarié de tourna i valour que nòsti davancié nous an ensigna. L’ounesteta, la cerco dóu bonur avans la dóu proufié, l’esfors à gratis, lou respèt de la persouno, dis enfant, di viéi e de jamai óublida que lou mounde es pas à nautre, es nòstis enfant que nous lou preston. Souvète à-n-aquéli que decidon de rescountra un fouletoun, un esperitoun que ié baiarié uno banasto de bon sèns e de coumpassioun. Pamens es de cregne que la banasto sieguèsse jamai proun grando tant i’a de gramo à tria. Lis eisèmple soun pas de manco pèr moustra, de cop que i’a, lou bestige de decisioun que soun presso. Verai, de dardeno e de soulèu, n’i’a pèr tóuti, de bonur, es tout parié. Malurousamen, l’uman es pas bèn plaça pèr diregi, mena vo gouverna la reparticioun d’aquéli richesso naturalo e renouvelablo. Despièi que lou mounde es mounde, lou loup manjo l’agnèu e lou bonur fai pòu à l’uman qu’amo miéus la guerro, la mort e la misèri. E quand li causo van bèn, es que lou chafaret es pas luen. Un pau coume dins d’ùni relarg mounte quand plòu pas es que vai plòure. Vous laisse chifra en tout acò. Pamens, avèn lou devé de coumbatre tout ço que fai de l’uman un souto-animau. Ato ! pièi, se dis que la provo que l’ome es superiour à l’animau, es que, de fes que i’a, saup i’èstre inferiour. L’animau poussède quicon que defauto à l’ome : l’istint. Pèr ço qu’es de l’intelingènci, acó depènd de ço que se n’en fa. Soulide.
Vaqui, aro la crounico es acabado. Vous doune rendès-vous la semano venènto. D’eici aqui tenés-vous fièr e gaiard. Vous brassège amistadousamen. Brave mounde, adissias !
felip
