02 octobre 2024
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
AUFRED NOBEL
Bràvis ami, bèn lou bon-jour en tóuti e sigués li bèn-vengu dins nòstis Ermas… I’a cènt vint an d’acò, Frederi Mistral daverè un prèmi prestigious, lou Nobel de literaturo. Prepause de vous baia quàuquis entre-signe à respèt d’acò e premié pènse que fau presenta lou persounage que dounè soun noum à-n-aquest prèmi. Quau èro aquel enventaire, aquel ome qu’es mal-eisa de lou coumprene dins soun paradosse, dins sa demarcho ? Se parlo aqui d’Aufred Bernat Nobel que nasquè lou 21 d’óutobre 1833 à Stockholm.
Es lou tresen fiéu d’Inmanuau e Carolina Ahlsell, emé Roubert, Ludvig e Emile. Es dins sa premiero annado quand sa famiho anè planta caviho à Sant-Petersbourg, d’abord que soun paire avié de i’ana pèr fabrica de mino souto-marino e de tourpiho pèr lou gouvèr de Russìo. Manjavo dins si sege an, lou jouine Aufred que parlave ja cinq lengo. Voulié veni pouèto, pamens lou siéu paire decidè autramen. Fau dire que lou jouine Aufred trantaiejavo entre fisico-chimìo e literaturo. En 1850, soun paire lou mandè is Estat-Uni, en Alamagno, en Franço e en Itàli pèr faire d’estùdi sus la chimìo e subre-tout sus lis afaire coumerciau. Aqui crousè la routo de persouno que s’èron ilustrado dins soun païs e principalamen à Paris lou jouine chimisto italian Ascanio Sobrero que venié tout-bèu-just d’enventa la nitrouglicerino que sa capacita esplousivo trespasso forço aquelo de la poudro à canoun. Lou manejamen de la nitrouglicerino es dangeirous e Nobel met touto sis atencioun e soun suen pèr n’en mestreja sa puissanço esplousivo. Part acò es pèr serendipita, coumprenès pèr cop d’asard, que Nobel descuerb qu’un cop que la nitrouglicerino es mesclado emé un soulide inerte, vèn eisadamen segur de la carreja e de la maneja. Nobel s’entourno pièi en Russìo mounte l’usino de soun paire emplego mai de milo oubrié. Ai ! las, en 1856, à la fin de la guerro de Crimèio, Inmanuau fai quinquinello e es la falido de soun afaire. Es en aquelo annado que Nobel envento lou detounatour. Es la coumençanço d’uno astrado d’enventaire pèr Nobel que depausara tres cènt cinquanto-cinq brevet. En 1866, Nobel envento la dinamite, dóu mot gré « dynamis » que vóu dire « poudé ». En 1868 Aufred e Inmanuau soun recoumpensa pèr l’Acadèmi suedeso di Sciènci ‘mé lou prèmi Letterstedt pèr « descuberto impourtanto aguènt uno valour pratico pèr l’umanita ». Es un labèu que Nobel tournara prene trento an plus tard. Sa caminado es impourtanto. Pèr l’essenciau, en 1875, Nobel envento la gelinito, un esplousiéu proche la nitrò qu’es mesclado ‘mé de coutoun. Pamens Nobel noun s’aluencho jamai de la literaturo. Lou poudèn defini coume un ome coumplèisse que jamai se maridè, uno meno de pacifisto que souvetavo enventa uno armo talamen pouderouso que poudrié vèire la fin de tóuti li guerro. Dóu cop èro tambèn un utoupisto. En 1864, la despartido d’Emile, soun cago-nis de fraire, l’aclapo. Nobel legis dins la presso : « Lou dóutour Aufred Nobel que venguè riche en troubant lou mejan de tua mai de gènt mai vite es mort ièr ». Lou journalisto pas finocho avié counfoundu Emile e Aufred. Quento vergougno ! Pamens Aufred Nobel es pertouca e forço nafra pèr l’encauso di mot d’aquéu tartavèu de journalisto. S’es di forço causo ineisato à respèt d’aquel ome qu’es à flour de camin de la misantroupìo e dis envencioun destrùssi. Es lou cas quand lou mounde assajon d’esplica l’assènci d’un prèmi Nobel de matematico. Vitour Hugo l’escais-noumè lou vagabound miliounàri. En fin finalo lou falié vèire coume un marchand d’armo pacifi, entre Pasteur e Rockfeller. En 1891, mentre que demoro à Paris, es acusa de treitresso e d’auto trahisoun contro la Franço estènt qu’aurié vendu de la balistito à l’Itàli. La balistito es un esplousiéu que fuguè enventa en 1887. Dóu cop garço soun camp de Franço e planto caviho quouro en Itàli, quouro en Suedo enjusqu’à la fin de sa vido. Aufred Nobel se mouriguè lou 10 de desèmbre 1896 en Itàli d’uno emourragìo cerebralo.
La leituro de soun testamen prouvouquè un turt. D’efèt, lou 27 de nouvèmbre 1895, au clube suedò-nourvegian de Paris, Nobel signo la darriero versioun de soun testamen, un doucumen d’uno souleto pajo. Avié ni femo, nimai d’enfant, laisso 6 dóu cènt de sa fourtuno à sa parentèlo. Emé li nounanto-quatre pèr cènt que rèston, acò represènto peraqui cènt vuetanto million d’éurò, creè cinq prèmi decerna cado annado. Diguè : « L’ensèn de moun patrimòni restant coustituïra un founs que sis interès saran distribuï cade an souto la formo d’un prèmi que, au cours de l’annado passado, auran counferi lou benefice mai grand à l’umanita ». Vesèn aqui la represo dóu labèu dóu prèmi Letterstedt.
Soulide que lou cop venènt se parlara dóu prèmi Nobel de literaturo de Frederi Mistral.
Aro la crounico es acabado, vous doune rendès-vous la semano venènto. D’eici aqui, avanças d’un pas lèri. Vous brassège amistousamen. Brave mounde adissias !
felip
